ବ୍ୟାଙ୍କ୍ ଉପରେ ସନ୍ଦେହ ପ୍ରକାଶ କଲେ ସରକାର: ବ୍ୟାଙ୍କରେ ଟଙ୍କା ନିରାପତ୍ତା ନେଇ ସତର୍କ କରାଇଲେ; ସବୁ ବିଭାଗକୁ ଚିଠି ଲେଖିଲେ ସରକାରଙ୍କ ପ୍ରମୁଖ ସଚିବ
ସରକାରୀ ଟ୍ରେଜେରିରୁ ଟଙ୍କା ଉଠାଇ ସିଧାସଳଖ ଖର୍ଚ୍ଚ କରିବାକୁ ନିର୍ଦ୍ଦେଶ
କନକ ବ୍ୟୁରୋ: ବ୍ୟାଙ୍କ ଉପରେ ସରକାରଙ୍କ ସନ୍ଦେହ । ବ୍ୟାଙ୍କରେ ଜମା ଟଙ୍କାର ନିରାପତା ନେଇ ସନ୍ଦେହ ପ୍ରକାଶ କରିଛନ୍ତି ସରକାର । ଏ ନେଇ ସବୁ ବିଭାଗକୁ ଚିଠି ଲେଖିଛନ୍ତି ସରକାରଙ୍କ ପ୍ରମୁଖ ସଚିବ । ଗତ ୨୧ ତାରିଖରେ ଲେଖାଯାଇଥିବା ଏହି ଚିଠିରେ କୁହାଯାଇଛି, ବ୍ୟାଙ୍କଗୁଡିକର ଅବସ୍ଥା ଭଲ ନାହିଁ ବୋଲି ଖବରକାଗଜ ଓ ବିଭିନ୍ନ ମହଲରେ ରିପୋର୍ଟ ପ୍ରକାଶ ପାଉଛି । ଯେକୌଣସି ମୂହୂର୍ତରେ ଦେବାଳିଆ ଘୋଷଣାର ମଧ୍ୟ ଆଶଙ୍କା ରହିଛି । ଏଭଳି ପରିସ୍ଥିତିରେ ସରକାରୀ ଟଙ୍କା ବ୍ୟାଙ୍କରେ ଜମା ନରଖିବା ପାଇଁ ପ୍ରମୁଖ ସଚିବ ସବୁ ବିଭାଗର ସଚିବ ଓ ଅନ୍ୟ ଅଧିକାରୀଙ୍କୁ ଚିଠି ଲେଖି ସତର୍କ କରାଇଦେଇଛନ୍ତି । ବ୍ୟାଙ୍କ ଦେବାଳିଆ ଘୋଷଣା ହେଲେ ମାତ୍ର ୧ ଲକ୍ଷ ଟଙ୍କା ବୀମା ବିବାଦରେ ମିଳିବାର ବ୍ୟବସ୍ଥା ରହିଛି ବୋଲି ଚିଠିରେ ଉଲ୍ଲେଖ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେଣୁ ଜମା ପୂର୍ବରୁ ଭଲ ଭାବରେ ବ୍ୟାଙ୍କର ରାଜକୋଷୀୟ ସ୍ଥିତି ବିଷୟରେ ଅନୁଧ୍ୟାନ କରିବାକୁ ଏହି ଚିଠିରେ ପରାମର୍ଶ ଦିଆଯାଇଛି । ଏପରିକି ସରକାରୀ ଟଙ୍କା ବ୍ୟାଙ୍କରେ ଜମା ରଖିଲେ ଏବଂ ପରବର୍ତୀ ଅବସ୍ଥାରେ କୌଣସି ଅଘଟଣ ଘଟିଲେ , ଟଙ୍କା ଜମା ରଖିଥିବା ଅଧିକାରୀ ଦାୟୀ ରହିବେ ବୋଲି କୁହାଯାଇଛି । ତେଣୁ ସରକାରୀ ରାଜକୋଷରୁ ଟଙ୍କା ଉଠାଇ ସିଧାସଳଖ ଖର୍ଚ କରିବାକୁ ପରାମର୍ଶ ଦିଆଯାଇଛି । ଆଇଏଫଏମଏସ ଅର୍ଥାତ ଇଂଟିଗ୍ରେଟେଡ ଫାଇନାନସିଆଲ ମ୍ୟାନେଜମେଂଟ ସିଷ୍ଟମ ମାଧ୍ୟମରେ ଟଙ୍କା ଖର୍ଚ କରିବା ପାଇଁ ଚିଠିରେ ଉଲ୍ଲେଖ କରାଯାଇଛି ।
ଏପରିକି ବ୍ୟାଙ୍କରେ ଟଙ୍କା ଜମା କରିବାରୁ ଅଧିକାରୀଙ୍କୁ ବିରତ ରଖିବା ପାଇଁ ସରକାରୀ ରାଜକୋଷରୁ ଟଙ୍କା ଉଠାଇବା ଉପରେ କଟକଣା ଜାରି କରାଯାଇଛି । ଯଥେଷ୍ଟ କାରଣ ନଥାଇ ରାଜକୋଷରୁ ଟଙ୍କା ଉଠାଇପାରିବେ ନାହିଁ ବୋଲି ଚିଠିରେ ସତର୍କ କରିଦିଆଯାଇଛି । ଆର୍ଥିକ ନିରାପତାକୁ ଦୃଷ୍ଟିରେ ରଖି ରାଜ୍ୟରେ ୧୭ଟି ପିଏସ୍ୟୁ ବ୍ୟାଙ୍କ, ୮ଟି ପ୍ରାଇଭେଟ୍ ସେକ୍ଟର୍ ବ୍ୟାଙ୍କ ଗୋଟିଏ କ୍ଷୁଦ୍ର ବ୍ୟାଙ୍କ ଓ ୨ଟି ଆଂଚଳିକ ଗ୍ରାମ୍ୟ ବ୍ୟାଙ୍କ ଓ ଗୋଟିଏ କୋପରେଟିଭ୍ ବ୍ୟାଙ୍କକୁ ସରକାର ଆର୍ଥକି କାରବାର ପାଇଁ ତାଲିକା ଭୁକ୍ତ କରିଛନ୍ତି ।