କନକ ବ୍ୟୁରୋ : ପୁରୀ ଜିଲ୍ଲାରେ ବ୍ୟାପକ ପିସି କାରବାର ନେଇ ବିଭିନ୍ନ ବ୍ଲକରେ ଚଢାଉ କରୁଛି ଭିଜିଲାନ୍ସ । ତେଣୁ ଗୋପ ବ୍ଲକରେ ହୋଇଥିବା ଦୁର୍ନୀତିକୁ ଚପେଇ ଦେବାକୁ ରାତି ଅଧିଆ ସଜବାଜ ଚାଲିଛି । ଗତକାଲି ବିଳମ୍ବିତ ରାତିରେ ଜେନେରେଟର ଲଗାଇ ବ୍ଲକର ଉଚ୍ଚ ଅଧିକାରୀ ଦୁର୍ନୀତିର ଚିଠା ଥିବା ଫାଇଲ ଗୁଡିକୁ ରାତି ତମାମ ସଜାଡିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୁରୁବାର ବିଳମ୍ବିତ ରାତିରେ ଗୋପ ବ୍ଲକ କାର୍ଯ୍ୟାଳୟରେ ବିଦ୍ୟୁତ ନଥିବା ସତ୍ୱେ ଏକ ଜେନେରେଟର ଲଗାଯାଇ ରାତିସାରା କବାଟ କିଳା କାମ ଚାଲିଥିଲା । ଖୋଦ୍ ବିଡିଓ ଶ୍ୟାମ ସୁନ୍ଦର ଟୁଡୁ, ପୁରୀ ଜିଲ୍ଲା ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ଶ୍ରୀକାନ୍ତ ତରାଇ, ସହକାରୀ ଯନ୍ତ୍ରୀ ପ୍ରଫୁଲ୍ଲ କୁମାର ଲେଙ୍କା, ମନରେଗାର ଏ.ପି.ଓ. ମୋନାଲିସା ଶତପଥୀ ସମେତ ବ୍ଲକର ବହୁ ଅଧିକାରୀ ଉପସ୍ଥିତ ରହି ଫାଇଲ ଚାଷ କରିଛନ୍ତି । ଏ ସଂପର୍କରେ ସହକାରୀ ଯନ୍ତ୍ରୀଙ୍କୁ ପଚରାଯିବାରୁ ରାତିରେ ରହିବାକୁ ସରକାରଙ୍କ ନିର୍ଦ୍ଦେଶ ଥିବା କହିଛନ୍ତି ।
ଯଦି ବ୍ଲକର କର୍ମଚାରୀମାନେ ଲୋକଙ୍କ ପାଇଁ କାମ କରୁଛନ୍ତି । ତେବେ ରାତି ଅଧିଆ କାମ କାହିଁକି, କାହା ଭୟରେ ଏ କର୍ମତତ୍ପରତା, ଲୋକଙ୍କ ପାଇଁ ନା ନିଜକୁ ସୁରକ୍ଷିତ ରଖିବା ପାଇଁ ଚାଲିଛି କାମ । ରାତି ଅଧିଆ ଫାଇଲ ଚାଷ ବାବଦରେ ଗୋପ ବିଡିଓଙ୍କୁ ପଚାରିବାରୁ କହିଥିଲେ ସରକାରୀ କାମ ଚାଲିଛି । ଅନ୍ୟପଟେ ଜିଲ୍ଲା ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ କହିଛନ୍ତି , ବକେୟା ପଡିଥିବା ପୁରୁଣା କାମକୁ ଶେଷ କରାଯାଉଛି । ଗୋପ ବ୍ଲକରେ ଇନ୍ଦିରା ଆବାସ ଠାରୁ ଆରମ୍ଭ କରି, ମୋ କୁଡିଆ, ମୋ ପୋଖରୀ ପର୍ଯ୍ୟନ୍ତ ସବୁ ଯୋଜନାରେ ଲୁଟ ହୋଇଥିବା ବହୁବାର ଅଭିଯୋଗ ହୋଇଛି । ତେଣୁ ଦୁର୍ନୀତି ଘୋଡାଇବାକୁ ଫାଇଲ ଟ୍ୟାମ୍ପରିଂ କରାଯାଇଥିବା ଚର୍ଚ୍ଚା ହେଉଛି ।