ଜିଏସଟି ଟିକସ ହାରରେ ସଂଶୋଧନ ! ଶିଳ୍ପୀକୂଳକୁ ସରକାର ଦେଲେ ଦଶହରା ଭେଟି, ପଥରମୂର୍ତ୍ତି ପାଇଁ ୧୨ ପ୍ରତିଶତ ଓ ମାଟିମୂର୍ତ୍ତି ପାଇଁ ଲାଗିବନି ଟିକସ
କନକ ବ୍ୟୁରୋ : ଓଡ଼ିଶା ସରକାରଙ୍କ ଦାବି ଅନୁଯାୟୀ ଜିଏସଟି କାଉନ୍ସିଲରେ ଶାଳ-ଖଲିପତ୍ର ଉପରେ ଜିଏସ୍ଟି ହାର ୧୮ ପ୍ରତିଶତରୁ ୫ ପ୍ରତିଶତକୁ ହ୍ରାସ ପାଇଛି । ଏହାଦ୍ୱାରା ମୟୂରଭଞ୍ଜ ଅଂଚଳରେ ଶାଳ-ଖଲିପତ୍ର ତିଆରିରେ ସଂପୃକ୍ତ ୩ ଲକ୍ଷ ଆଦିବାସୀ ପରିବାର ଲାଭ ପାଇବେ ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଅର୍ଥ ମନ୍ତ୍ରୀ ଶଶୀଭୂଷଣ ବେହେରା । ଏନେଇ ସେପ୍ଟେମ୍ବର ୯ ତାରିଖରେ ହାଇଦ୍ରାବାଦରେ ଅନୁଷ୍ଠିତ ୨୧ତମ ଜିଏସ୍ଟି ସମ୍ମିଳନୀରେ ଓଡ଼ିଶାର ଦାବି ଗୃହୀତ ହୋଇଛି । ଏଥିସହ ପଥର ଓ ମାଟି ଶିଳ୍ପରେ ମଧ୍ୟ ଟିକସ ହାର କମିଛି ।
Kanak News is now on WhatsApp
Join and get latest news updates delivered to you via WhatsApp
ମାଟି ଶିଳ୍ପ ବା ମାଟି ମୂର୍ତି ଉପରେ ପୂର୍ବରୁ ୨୮ ପ୍ରତିଶତ ଟିକସ ଥିବା ବେଳେ, ଏବେ ଏହାକୁ ଟିକସମୁକ୍ତ କରାଯାଇଛି । ସେହିଭଳି ପଥର ମୂର୍ତିରେ ଟିକସ ହାର ୧୮ରୁ ୧୨ ପ୍ରତିଶତକୁ ହ୍ରାସ ପାଇଛି । ଶିଳ୍ପୀକୂଳ ପ୍ରତି ଏହା ଏକ ଅନୁକୂଳ ବାତାବରଣ ସୃଷ୍ଟି କରିବ ବୋଲି ମନ୍ତ୍ରୀ ବେହେରା କହିଛନ୍ତି । ଏଥିସହ ଜିଏସ୍ଟି ଲାଗୁ ହେଲା ପରେ ଗତ ଜୁଲାଇ ଓ ଅଗଷ୍ଟ ଦୁଇ ମାସରେ ଓଡ଼ିଶା ଯାହା ଟିକସ ଆଶା କରୁଥିଲା ତାଠାରୁ ୫୨୫ କୋଟି ଟଙ୍କା କମ୍ ଟିକସ ପାଇଛି ବୋଲି କହିଛନ୍ତି ମନ୍ତ୍ରୀ । ଆଇନ ଅନୁଯାୟୀ ଏହାକୁ କେନ୍ଦ୍ର ସରକାର ଭରଣା କରିବେ ବୋଲି ମନ୍ତ୍ରୀ କହିଛନ୍ତି ।