ରାଜସ୍ଥାନରୁ ଉଦ୍ଧାର ସୁନ୍ଦରଗଡର ନାବାଳିକା: ବେପରୁଆ ଓଡ଼ିଶା ପୁଲିସକୁ ଦିଲ୍ଲୀ ମହିଳା କମିଶନରଙ୍କ ଭତ୍ସନା
ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ କମିଶନ ଅଧ୍ୟକ୍ଷା ସ୍ୱାତୀ ମାଲିୱାଲ
କନକ ବ୍ୟୁରୋ: ୨୦୧୭ରେ ରାଉରକେଲାରୁ ନିଖୋଜ ଜଣେ ନାବାଳିକାକୁ ଖୋଜି ଖୋଜି ଦିଲ୍ଲୀରେ ପହଂଚିଥିଲେ ତାର ବାପା । ଅଭିଯୋଗ ନାବାଳିକାଙ୍କୁ ଉଦ୍ଧାର ପାଇଁ କୌଣସି ପଦକ୍ଷେପ ନେଲେ ନାହିଁ ଓଡ଼ିଶା ପୁଲିସ, ରାଜ୍ୟ ସରକାର, ଜିଲ୍ଲା ପ୍ରଶାସନ କିମ୍ବା ଶିଶୁ ମଙ୍ଗଳ ବିଭାଗ । ଆଉ ନ୍ୟାୟ ଆଶାରେ ଦିଲ୍ଲୀ ମହିଳା କମିଶନଙ୍କ ନିକଟରେ ହାଜର ହୋଇଥିଲେ ନିଖୋଜଙ୍କ ବାପା ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ହେଲା, ବାପା କାମକୁ ଯାଇଥିବା ବେଳେ ନାବାଳିକାଙ୍କୁ ତାଙ୍କ ସମ୍ପର୍କୀୟମାନେ ରାଜସ୍ଥାନର କିଷନ ଅଗ୍ରୱାଲ ନାମକ ଜଣେ ବ୍ୟକ୍ତିଙ୍କୁ ୪ଲକ୍ଷ ଟଙ୍କାରେ ବିକ୍ରି କରିଦେଇଥିଲେ । ପରେ ଜଣେ ୪୦ବର୍ଷୀୟ ବ୍ୟକ୍ତିଙ୍କୁ ନାବାଳିକାଙ୍କ ବିବାହ କରିଦିଆଯାଇଥିବା ଅଭିଯୋଗ ହୋଇଥିଲା । ଅସହାୟ ବାପା ଲାଠିକଟା ପୁଲିସରେ ବାରମ୍ବାର ନେହୁରା ହୋଇ ଝିଅକୁ ଫେରାଇ ଆଣିବାକୁ ଗୁହାରୀ କରିଥିଲେ । ଦୁଇ ବର୍ଷ ବିତି ଯାଇଥିଲେ ବି ଝିଅ ଉଦ୍ଧାର ହେବା ସମ୍ଭାବନା ନପାଇ ଜଣେ ବ୍ୟକ୍ତିଙ୍କ ସହାୟତାରେ ଦିଲ୍ଲୀ ମହିଳା କମିଶନଙ୍କ ଦ୍ୱାରସ୍ଥ ହୋଇଥିଲେ ।
ମାମଲାଟି ଦିଲ୍ଲୀର ନହୋଇ ଥିଲେ ବି ମାନବିକତା ଦୃଷ୍ଟିରୁ ହସ୍ତକ୍ଷେପ କରିଥିଲେ ଅଧ୍ୟକ୍ଷା ସ୍ୱାତୀ ମାଲିୱାଲ । ନାବାଳିକାଙ୍କୁ ଉଦ୍ଧାର ପାଇଁ ଏକ ଟିମ ଗଠନ କରି ରାଜସ୍ଥାନ ଝୁନ ଝୁନ ଅଂଚଳରୁ ନାବାଳିକାଙ୍କୁ ଉଦ୍ଧାର କରିଛନ୍ତି । ଏହି ଘଟଣାରେ ଦିଲ୍ଲୀ ମହିଳା କମିଶନ ଅଧ୍ୟକ୍ଷା ସ୍ୱାତି ମାଲିୱାଲ ଓଡ଼ିଶା ପୁଲିସ ବେପରୁଆ ମନୋଭାବକୁ ଭତ୍ସ୍ନା କରିଥିବା ବେଳେ କାର୍ଯ୍ୟାନୁଷ୍ଠାନ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ଜଣାଇଛନ୍ତି । ତେବେ ଏହି ଘଟଣାରେ ଓଡ଼ିଶା ପୁଲିସର ପ୍ରତିକ୍ରୀୟା ହସ୍ତଗତ ହୋଇପାରିନାହିଁ ।