ଅତଡ଼ା ଖସି ଆଉ ପ୍ରାଣ ହରାଇବେନି ଶ୍ରମିକ : ଜିପିଏସ୍ ଜରିଆରେ ବିପଦର ଆଗୁଆ ଇସାରା ମିଳିବ, ସ୍ୱତନ୍ତ୍ର ଡ୍ରୋନ୍ ତିଆରି କଲେ ଜିଇସି ଛାତ୍ର କୁମାର ଗୌରବ
କନକ ବ୍ୟୁରୋ : ଖଣିରୁ ଅତଡ଼ା ଖସି ଆଉ ଶ୍ରମିକଙ୍କ ପ୍ରାଣ ଯିବନି । ଅତଡ଼ା ଖସିବା ସମ୍ପର୍କରେ ଆଗୁଆ ସୂଚନା ଦେବ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବ୍ୟବସ୍ଥା ଥିବା ଡ୍ରୋନ୍ । ଜିପିଏସ୍ ଜରିଆରେ ବିପଦର ଇସାରା ଦେବ । ଜୀବନକୁ ପାଣି ଛଡ଼ାଇ ପରିବାରର ପେଟ ପାଳିବାକୁ ଖଣିରେ କାମ କରୁଥିବା ଶ୍ରମିକଙ୍କ ଜୀବନ ବଞ୍ଚାଇବ ‘ଜିପିଏସ୍ ଡ୍ରୋନ୍’ । କିଛି ପ୍ଲାଷ୍ଟିକ୍ ଓ ଅତ୍ୟାଧୁନିକ ଯନ୍ତ୍ରାଂଶ ବ୍ୟବହାର କରି କେନ୍ଦୁଝର ସରକାରୀ ଯାନ୍ତ୍ରିକ ମହାବିଦ୍ୟାଳୟ (ଜିସିଇ)ର ଛାତ୍ର କୁମାର ଗୌରବ ତିଆରି କରିଛନ୍ତି ଏହି ସ୍ୱତନ୍ତ୍ର ଡ୍ରୋନ୍ ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ସହର ଫକୀରମୋହନ ନଗରର ବାସନ୍ଦା ତଥା ଡିଆରଡ଼ିଓ ବୈଜ୍ଞାନିକ ଗୟାଧର ସେଠୀଙ୍କ ପୁଅ କୁମାର ଗୌରବ ସେଠୀ । କେନ୍ଦୁଝର ସରକାରୀ ଯାନ୍ତ୍ରିକ ମହାବିଦ୍ୟାଳର ଇଲେକ୍ଟ୍ରିକାଲ୍ ବିଭାଗର ତୃତୀୟ ବର୍ଷର୍ର ଛାତ୍ର । ଖଣିର ସହର କେନ୍ଦୁଝରରେ ପାଠ ପଢ଼ୁଥିବା ବେଳେ ପ୍ରାୟ ସମୟରେ ଅତଡ଼ା ଖସି ଶ୍ରମିକଙ୍କ ମୃତ୍ୟୁ ହେବାର ଖବର ତାଙ୍କୁ ଆନ୍ଦୋଳିତ କରୁଥିଲା । ତେବେ ଶ୍ରମିକଙ୍କୁ ରକ୍ଷା କରିବା ପାଇଁ ସେ ତିଆରି କରିଛନ୍ତି ଜିପିଏସ୍ ଯୁକ୍ତ ଡ୍ରୋନ୍ । ଏଥିପାଇଁ ତାଙ୍କ ହଷ୍ଟେଲ ରୁମ୍ ପାଲଟିଥିଲା ସାଧନାସ୍ଥଳୀ । ପ୍ରାୟ ୧ ବର୍ଷ ୨ ମାସ ମଧ୍ୟରେ ଡ୍ରୋନ୍ ତିଆରି କରିବାରେ ସଫଳ ହୋଇଥିଲେ କୁମାର ଗୌରବ ।
ଡ୍ରୋନରେ ଲାଗିଛି ଘରୋଇ ପ୍ଲାଷ୍ଟିକ୍ ଫ୍ରେମ୍, ମୋଟର, ପ୍ରୋପେଲର୍, ଛୋଟ ଷ୍ଟାବିଲାଇଜର, ଜିପିଏସ୍, ମଦରବୋର୍ଡ଼ କଣ୍ଟ୍ରୋଲର । ଆଉ ଅନ୍ୟ କିଛି ଯନ୍ତ୍ରପାତି ଚୀନରୁ ମଗାଇ ବ୍ୟବହାର ଡ୍ରୋନ୍ ତିଆରି ହୋଇଛି । ଏହି ଡ୍ରୋନ୍ ମାଧ୍ୟମରେ ଖଣିର ଥ୍ରିଡ଼ି ଇମେଜ୍ ମଧ୍ୟ ସଂଗ୍ରହ କରା ଯାଇପାରିବ । ଆର୍ଟିଫିସିଆଲ୍ ଇଣ୍ଟେଲିଜେନ୍ସ ସିଷ୍ଟମ, ସ୍ୱତଃପ୍ରବୃତ୍ତ ଭାବେ ଅତଡ଼ା ଖସିବା ପୂର୍ବ ସୂଚନା ଦେବ ବୋଲି କହିଛନ୍ତି କୁମାର ଗୌରବ ।
ଡ୍ରୋନ୍ ଉଡ଼ାଇବାରେ ୨୦ ଥର ଅସଫଳ ହୋଇଥିଲେ ସୁଦ୍ଧା ହାର ମାନନଥିଲେ ଗୌରବ । ପଢ଼ିବା ପାଇଁ ମିଳୁଥିବା ହାତ ଖର୍ଚ୍ଚରୁ ସଞ୍ଚୟ କରି ଏହି ଡ୍ରୋନ୍ ତିଆରି କରିଛନ୍ତି । ଗୌରବଙ୍କ ସାଙ୍ଗ କୁହନ୍ତି, ତା’ର ଚିନ୍ତାଧାର ଖୁବ୍ ନିଆରା । ଅନେକ ଯୋଜନା ଓ କଠିନ ପରିଶ୍ରମ ପରେ ତାଙ୍କୁ ସଫଳତା ମିଳିଛି । ଗୌରବଙ୍କ ଏହି ପ୍ରୟାସ ପାଇଁ ଚାରିଆଡ଼ୁ ପ୍ରଶଂସାର ସୁଅ ଛୁଟୁଛି । ଗୌରବଙ୍କ ଏଭଳି ଉଦ୍ଭାବନ ଅନ୍ୟ ଛାତ୍ରଛାତ୍ରୀଙ୍କୁ ପ୍ରେରଣା ଯୋଗାଇବ ବୋଲି ଆଶା କରାଯାଉଛି ।