୩୦ ବର୍ଷରୁ ବିନା ଦରମାରେ କରୁଛନ୍ତି ଟ୍ରାଫିକ୍ ନିୟନ୍ତ୍ରଣ : ପୁଅର ମୃତ୍ୟୁ ବଦଳାଇଦେଲା ଗଙ୍ଗାରାମଙ୍କ ଜୀବନ
୭୪ ବର୍ଷୀୟ ଗଙ୍ଗାରାମଙ୍କ ଜୀବନ ଅନ୍ୟମାନଙ୍କ ଜୀବନ ପାଇଁ ସମର୍ପିତ । ଗତ ୩୦ ବର୍ଷ ହେବ ଦିଲ୍ଲୀ ସଲିମପୁରର ବ୍ୟସ୍ତବହୁଳ ଛକରେ ଢ଼ିଲା ପୋଷାକ ପିନ୍ଧି ହାତରେ ବାଡି ଧରି ପୁରା ଅନୁଶାସନରେ ଟ୍ରାଫିକ ନିୟନ୍ତ୍ରଣ କରୁ୍ଥିବା ନଜର ଆସନ୍ତି । ପ୍ରତିଦିନ ସକାଳ ୮ଟାରୁ ରାତି ୧୦ଟା ପର୍ଯ୍ୟନ୍ତ ଟ୍ରାଫିକ ପୁଲିସ ପୋଷାକ ପିନ୍ଧି ପ୍ରସ୍ତୁତ ଥାଆନ୍ତି । ବୟସ ସହିତ ତାଙ୍କର ଅବସର ହେବା କଥା, ହେଲେ ସେ କେବେ ଅବସର ନେଉ ନାହାଁନ୍ତି । କାହିଁକିନା ଅସଲରେ ସେ ପୁଲିସ୍ ନୁହଁନ୍ତି । ଏଥିପାଇଁ ନା ତାଙ୍କୁ ଅବସର ମିଳିବ ନା ଦରମା । ଆପଣଙ୍କ ମନରେ ପ୍ରଶ୍ନ ଉଙ୍କି ମାରୁଥିବ ଯେ, ବୃଦ୍ଧକାଳରେ ବିନା ଦରମାରେ କାହିଁକି ଚାକିରୀ କରୁଛନ୍ତି । ଏହା ପଛରେ ଏକ ମର୍ମସ୍ପର୍ଶୀ କାହାଣୀ ଅଛି, ଯାହା ପାଇଁ ସେ ଏମିତି କାମ କରନ୍ତି ।
Kanak News is now on WhatsApp
Join and get latest news updates delivered to you via WhatsApp
୩୦ ବର୍ଷ ପୂର୍ବେ ତାଙ୍କର ଏକ ଟିଭି ମରାମତି ଦୋକାନ ଥିଲା, ଯେଉଁଠି ତାଙ୍କ ପୁଅ ବି କାମ କରୁଥିଲେ । ତା’ପରେ ସେ ଟ୍ରାଫିକ୍ ୱାର୍ଡେନ ବନିଗଲେ ଓ ସକାଳେ ଏବଂ ସନ୍ଧ୍ୟାରେ ସେହି ଛକରେ ଟ୍ରାଫିକ୍ ସେବା କରୁଥିଲେ । ପୁଣି ୧୦ଟାରେ ଦୋକାନ ଖୋଲୁଥିଲେ । ୮ ବର୍ଷ ପୂର୍ବେ ତାଙ୍କ ଜୀବନର ସବୁଠାରୁ ବଡ଼ ଝଟକା ଲାଗିଲା । ତାଙ୍କ ପୁଅ ଟ୍ରକ୍ ତଳେ ଚାପି ହୋଇଗଲେ । ଗଙ୍ଗାରାମ ୬ ମାସ ପର୍ଯ୍ୟନ୍ତ ହସପିଟାଲର ଚକ୍କର କାଟିବା ପରେ ମଧ୍ୟ ପୁଅ ବଂଚିପାରିନଥିଲା । ପୁଅର ମୃତ୍ୟୁରେ ମର୍ମାହତ ହୋଇ ତାଙ୍କ ସ୍ତ୍ରୀଙ୍କ ଜୀବନ ବି ଚାଲିଗଲା । ପୁରା ପରିବାରରେ ସେ ଏକୁଟିଆ ହୋଇଗଲେ । ପରିବାରରେ କେବଳ ବୋହୁ, ଗୋଟିଏ ନାତି ଓ ଗୋଟିଏ ନାତୁଣୀ ଅଛନ୍ତି । ବୋହୁ ନର୍ସ କାମ କରି ପରିବାର ଖର୍ଚ୍ଚ ବହନ କରନ୍ତି । ହେଲେ ଗଙ୍ଗାରାମଙ୍କ ଜୀବନ କେବଳ ଏହି ପୋଷାକ । ନିଜେ ଧୁଅନ୍ତି, ପ୍ରେସ କରନ୍ତି ଓ କାମ କରିଚାଲନ୍ତି ।