କୋଣାର୍କ ଗଣଦୁଷ୍କର୍ମ ମାମଲାରେ ଲାଗିଲା ରାଜନୀତିର ରଙ୍ଗ ! ଉଠିଲା ପ୍ରଶ୍ନ, ଦେହ ବ୍ୟବସାୟ ସନ୍ଦେହରେ କୋହଳ ପଡୁଛି କି ପୁଲିସ ?
କନକ ବ୍ୟୁରୋ : କୋଣାର୍କରେ ଜଣେ ବଙ୍ଗୀୟ ଯୁବତୀଙ୍କୁ ଗଣଦୁଷ୍କର୍ମ ମାମଲାରେ ଅଭିଯୁକ୍ତଙ୍କୁ ଏପର୍ଯ୍ୟନ୍ତ ଗିରଫ କରିପାରିନାହିଁ ପୁଲିସ । ଯୁବତୀଙ୍କୁ ଗଣଦୁଷ୍କର୍ମ ହୋଇଛି କି ନାହିଁ, ସେନେଇ ମଧ୍ୟ ପୁଲିସର ସନ୍ଦେହ ରହିଛି । ପୀଡିତାଙ୍କ ଡାକ୍ତରୀମାଇନା ରିପୋର୍ଟ ଆସିବା ପରେ ସ୍ପଷ୍ଟ ହେବ ବୋଲି ପୋଲିସ କହିଛି । ସେପଟେ ଏହି ମାମଲାରେ ଲାଗିଛି ରାଜନୀତିର ରଙ୍ଗ । ରାଜ୍ୟ କଂଗ୍ରେସର ମହିଳା ମୋର୍ଚ୍ଚା ଏବଂ ବିଜେପି ମହିଳା ମୋର୍ଚ୍ଚା ପୀଡିତାଙ୍କୁ ଭେଟିବା ପରେ, ତୁରନ୍ତ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ଦାବି କରିଛନ୍ତି । ପୁଲିସ ଟାଳଟୁଳ ନୀତି ଆପଣାଉଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବଙ୍ଗୀୟ ଯୁବତୀଙ୍କୁ ଗଣଦୁଷ୍କର୍ମ ହୋଇଛି ନା’ ନାହିଁ? ଦେହଜୀବୀ ସନ୍ଦେହରେ କୋହଳ ପଡୁଛି କି ପୋଲିସ? ବୁଧବାର ଦିନ କୋଣାର୍କରେ ଗଣଦୁଷ୍କର୍ମ ହୋଇଥିବା ଖବର ସାମ୍ନାକୁ ଆସିବା ପରେ ସାରା ଅଂଚଳରେ ଚାଂଚଲ୍ୟ ଖେଳି ଯାଇଥିଲା । ଅଭିଯୋଗ ଏପରି ଥିଲା ତାହା ସମସ୍ତଙ୍କ ଛାତି ଥରାଇ ଦେଇଥିଲା । ହେଲେ ପୋଲିସ ଯେପରି ମାମଲାକୁ ଆଗକୁ ନେଉଛି ତାକୁ ନେଇ ଉଠୁଛି ପ୍ରଶ୍ନ । କାରଣ ପୀଡ଼ିତାଙ୍କ ସ୍ପଷ୍ଟ ବୟାନ ଓ ଘଟଣାସ୍ଥଳରୁ ୨ଟି ଆଧାରକାର୍ଡ ମିଳିଥିଲେ ବି ଅଭିଯୁକ୍ତମାନଙ୍କ ନିକଟରେ ପହଁଚି ପାରିନି ପୋଲିସ ।
ଏପଟେ ପୋଲିସ କହୁଛି, ଯୁବତୀଙ୍କ ସହ ଗଣଦୁଷ୍କର୍ମ ଅଭିଯୋଗର ସତ୍ୟତା ଯାଂଚ କରାଯାଉଛି । ଏକ ଯୁବତୀ ଚାଲାଣ ମାମଲା ରୁଜୁ କରି ତଦନ୍ତ ଚଳାଇଛି । ସମ୍ପୃକ୍ତ ଯୁବତୀଙ୍କ ଡାକ୍ତରୀ ମାଇନା ରିପୋର୍ଟ ଆସିବା ପରେ ଗଣବଳକ୍ରାର ହୋଇଛି କି ନାହିଁ ତାହା ସ୍ପଷ୍ଟ ହେବ ବୋଲି କହିଛନ୍ତି ଏସଡିପିଓ । ଚାପ ବଢିବା ପରେ ୪୮ ଘଂଟା ମଧ୍ୟରେ ମୁଖ୍ୟ ଅଭିଯୁକ୍ତ ଏବଂ ସହଯୋଗୀମାନଙ୍କୁ ଗିରଫ କରାଯିବ ବୋଲି କହିଛି ପୋଲିସ ।
ସେପଟେ ଏହି ଘଟଣା ନେଇ ଆରମ୍ଭ ହୋଇଛି ରାଜନୀତି । ପୀଡିତାଙ୍କୁ ଭେଟିଛନ୍ତି ରାଜ୍ୟ ବିଜେପି ମହିଳା ମୋର୍ଚ୍ଚା ଏବଂ ରାଜ୍ୟ କଂଗ୍ରେସ ମହିଳା ମୋର୍ଚ୍ଚା ପ୍ରତିନିଧି ମଣ୍ଡଳୀ । କଂଗ୍ରେସ ମହିଳା ମୋର୍ଚ୍ଚାର ୭ ଜଣିଆ ଦଳ ଏସଡିପିଓଙ୍କୁ ଭେଟିବା ପରେ ଅତିରିକ୍ତ ଏସପିଙ୍କୁ ଦାବିପତ୍ର ଦେଇଛନ୍ତି । ବିଜେପି ମହିଳା ମୋର୍ଚ୍ଚା ପ୍ରଭାତି ପରିଡାଙ୍କ ନେତୃତ୍ୱରେ ୫ଜଣିଆ ଟିମ୍ ଘଟଣାର ଅନୁଧ୍ୟାନ କରିଛନ୍ତି । ଅଭିଯୁକ୍ତମାନଙ୍କୁ ତୁରନ୍ତ ଗିରଫ ଦାବିରେ କୋଣାର୍କ ଥାନା ଘେରାଉ କରିଛି ବିଜେପି । ଗତକାଲି କୋଣାର୍କରେ କୋଲକାତାର ଏକ ଯୁବତୀଙ୍କୁ ବନ୍ଦ କୋଠରୀ ଭିତରୁ ଉଦ୍ଧାର କରାଯାଇଥିଲା । ପ୍ରାୟ ୧୦ଜଣ ଯୁବକ ୪ଦିନ ଧରି ଗଣଦୁଷ୍କର୍ମ କରିଥିବା ନିଜେ ପୀଡ଼ିତା କହିଥିଲେ । ଘର ମାଲିକ ଓ ଜଣେ ଦେହ ଦଲାଲକୁ ଅଟକ ରଖି ପଚରାଉଚରା କରୁଛି ପୋଲିସ ।