କନକ ବ୍ୟୁରୋ : ଓଡିଶାର ରାଜ୍ୟପାଳ ଗଣେଶୀ ଲାଲଙ୍କ ଜେଟ ଓ ହେଲିକପ୍ଟର ଭଡ଼ାକୁ ନେଇ ବିବାଦ ସୃଷ୍ଟି ହୋଇଛି । ତେବେ ସ୍ୱତନ୍ତ୍ର ଜେଟ ଯୋଗେ ଭୁବନେଶ୍ୱରରୁ ଦିଲ୍ଲୀ ଓ ପରେ ହେଲିକପ୍ଟର ଯୋଗେ ଦିଲ୍ଲୀରୁ ହରିୟାଣା ଶୀର୍ଷା ଗସ୍ତ କରିଥିଲେ । ଯାହାକୁ ନେଇ ରାଜଭବନରୁ ମୋଟା ଅଙ୍କର ବିଲ୍ ଆସିଥିବା ବେଳେ ସାଧାରଣ ପ୍ରଶାସନ ବିଭାଗ ତରଫରୁ ରିପୋର୍ଟ ତଲବ କରାଯାଇଛି । ଯାହାକୁ ନେଇ ଏବେ ରାଜ୍ୟରେ ଚର୍ଚ୍ଚା ଜୋର ଧରିଛି ।

ରାଜ୍ୟ ସରକାରଙ୍କ ସାଧାରଣ ପ୍ରଶାସନ ବିଭାଗ ତରଫରୁ ଜାରି ହୋଇଥିବା ଚିଠି ଅନୁଯାୟୀ ଗତ ଜୁନ ୧୦ ତାରିଖରୁ ୧୪ ତାରିଖ ମଧ୍ୟରେ ରାଜ୍ୟପାଳ ଜେଟ ଓ ହେଲିକପ୍ଟର ବ୍ୟବହାର କରିଥିଲେ । ଏକ ସ୍ୱତନ୍ତ୍ର ଯୋଗେ ଭୁବନେଶ୍ୱରରୁ ରାଜ୍ୟପାଳ ଦିଲ୍ଲୀ ଯାଇଥିଲେ । ଯେଉଁଥି ପାଇଁ ରାଜଭବନ ପକ୍ଷରୁ ୪୧ ଲକ୍ଷ ୧୮ ହଜାର ଟଙ୍କା ବିଲ୍ ଦିଆଯାଇଛି । କେବଳ ସେତିକି ନୁହେଁ ଦିଲ୍ଲୀରୁ ହେଲିକପ୍ଟର ଯୋଗେ ରାଜ୍ୟପାଳ ହରିୟାଣା ଶୀର୍ଷାକୁ ଯାଇଥିଲେ । ଏହା ବାବଦରେ ହେଲିକପ୍ଟର ଭଡା ବାବଦକୁ ୫ ଲକ୍ଷ ଟଙ୍କା ବିଲ ହୋଇଛି ବୋଳି ଚିଠିରେ ଊଲ୍ଲେଖ ରହିଛି । ଯହାକୁ ନେଇ ରାଜ୍ୟପାଳଙ୍କ ସଚିବଙ୍କୁ ସାଧାରଣ ପ୍ରଶାସନ ବିଭାଗ ତରଫରୁ ପରୋକ୍ଷରେ କୈଫିୟତ ତଲବ କରାଯାଇଛି ।

ତେବେ ରାଜ୍ୟପାଳ କେଉଁ ପରିସ୍ଥିତିରେ ଓ କେଉଁ ଉଦ୍ଦେଶ୍ୟରେ ଏହି ସ୍ଥାନକୁ ଗସ୍ତ କରିଥିଲେ ସେ ସମ୍ପର୍କରେ ସବିଶେଷ ତଥ୍ୟ ରିପୋର୍ଟ ଲୋଡିଛନ୍ତି ରାଜ୍ୟ ସରକାର । ଏନେଇ ୟୁଜର୍ସ ସାର୍ଟିଫିକେଟ ଦାଖଲ କରିବାକୁ ରାଜ୍ୟ ସାଧାରଣ ପ୍ରଶାସନ ବିଭାଗ ତରଫରୁ ରାଜ୍ୟପାଳଙ୍କ ସଚିବଙ୍କୁ କୁହାଯାଇଛି । ତେବେ ରାଜ୍ୟପାଳଙ୍କୁ ସରକାରଙ୍କ ତରଫରୁ ଏଭଳି କୈଫିୟତ ମାଗିବା ଏବଂ ରିପୋର୍ଟ ତଲବ କରିବାକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଛି ।