ବାଦ୍ ପଡିଲେ ବିଜେଡି ମନ୍ତ୍ରୀ ! ପ୍ରଧାନମନ୍ତ୍ରୀ ଉର୍ଜା ଗଙ୍ଗା ଯୋଜନାର ଉଦଘାଟନୀ କାର୍ଯ୍ୟକ୍ରମ ତାଲିକାରୁ କାଟି ଦିଆଗଲା ନାଁ
କନକ ବ୍ୟୁରୋ : କେନ୍ଦ୍ର ସରକାରଙ୍କ କାର୍ଯ୍ୟକ୍ରମରୁ ବାଦ ପଡିଲେ ଦୁଇ ବିଜେଡି ମନ୍ତ୍ରୀ । ‘ପ୍ରଧାନମନ୍ତ୍ରୀ ଉର୍ଜା ଗଙ୍ଗା’ ଯୋଜନାର ଉଦଘାଟନୀ କାର୍ଯ୍ୟକ୍ରମରେ ସାମିଲ ହେବାକୁ ଥିବା ନିମନ୍ତ୍ରଣ ପତ୍ରରେ ଥିଲା କଟକ, ଭୁବନେଶ୍ୱର ସାଂସଦ ଏବଂ ଓଡିଶା ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଅଶୋକ ପଣ୍ଡା ଓ ନଗର ଉନ୍ନୟନ ମନ୍ତ୍ରୀ ପୁଷ୍ପେନ୍ଦ୍ର ସିଂଦେଓ । କେନ୍ଦ୍ର ସରକାରଙ୍କ ପେଟ୍ରୋଲିୟମ ବିଭାଗ ପକ୍ଷରୁ କାର୍ଯ୍ୟକ୍ରମର ଆୟୋଜନ କରୁଥିବା ଗେଲ ମଧ୍ୟ ଏ ସଂକ୍ରାନ୍ତରେ ମନ୍ତ୍ରୀ ଅଶୋକ ପଣ୍ଡାଙ୍କୁ ଦେଇଥିଲା ଚିଠି ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ଆଜି ରାଜ୍ୟର ବିଭିନ୍ନ ପ୍ରମୁଖ ସମ୍ବାଦପତ୍ରରେ ପ୍ରକାଶ ପାଇଥିବା ବିଜ୍ଞାପନରେ ବିଭାଗୀୟ ମନ୍ତ୍ରୀଙ୍କ ସହ ରହିଛି ଓଡିଶାର କେବଳ ଦୁଇ ସାଂସଦଙ୍କ ନାଁ । ଯାହାକୁ ନେଇ ଆରମ୍ଭ ହୋଇଛି ରାଜନୀତି । କେଉଁ ପରିସ୍ଥିତିରେ ଓଡିଶା ସରକାରଙ୍କ ଦୁଇ ମନ୍ତ୍ରୀଙ୍କ ନାଁ ଅତିଥୀ ତାଲିକାରୁ କାଟି ଦିଆଗଲା ତାକୁ ନେଇ ପ୍ରଶ୍ନ ଉଠାଇଛି ବିଜେଡି ।
ତେବେ ଦ୍ୱୈତ ନଗରୀର ପ୍ରାୟ ୫ ଲକ୍ଷ ପରିବାରକୁ ଜୋଡୁଥିବା ଏହି ଯୋଜନାରୁ ଫାଇଦା ନେବାକୁ ଜୋର ଧରିଛି ରାଜନୀତି । ପାଇପ ଯୋଗେ ରନ୍ଧନ ଗ୍ୟାସ ଯୋଗାଇ ଓଡିଶାରେ ଭୋଟ ବ୍ୟାଙ୍କ ମଜଭୂତ କରିବାକୁ ଚାହୁଁଛି ବିଜେପି । ଆଉ ନିଜ ଭୋଟ ବ୍ୟାଙ୍କ ପ୍ରଭାବିତ ହେବା ଆଶଙ୍କା କରି ବିଜେଡି ବି ଆଣିଛି ଧର୍ମେନ୍ଦ୍ର ପ୍ରଧାନଙ୍କ ଅସହିଷ୍ଣୁତା ଅଭିଯୋଗ । ଅଶୋକ ପଣ୍ଡାଙ୍କ ଏଭଳି ଅଭିଯୋଗ ପରେ ବିବାଦୀୟ ହୋଇଛି ପରିସ୍ଥିତି ।
ନବୀନ ସରକାରଙ୍କ ବିରୋଧରେ ସବୁବେଳେ ବିରୋଧୀ ଅଭିଯୋଗ କରନ୍ତି ଯେ, କେନ୍ଦ୍ରର କାର୍ଯ୍ୟକ୍ରମଗୁଡିକୁ ଏହି ସରକାର ନିଜ ସପକ୍ଷରେ ଜନସାଧାରଣଙ୍କ ଆଗରେ ଉପସ୍ଥାପନ କରନ୍ତି । ଏବଂ ଲୋକେ ଭାବନ୍ତି ଯେ, ସବୁ ଯୋଜନା ନବୀନଙ୍କର । ସେଥିପାଇଁ ଲୋକେ ଭୋଟ ବି ଅଜାଡି ଦିଅନ୍ତି । ଅନୁମାନ କରାଯାଉଛି ଯେ, ଧର୍ମେନ୍ଦ୍ର ବୋଧହୁଏ ନବୀନଙ୍କ ଏହି ରଣନୀତିକୁ ଭଲଭାବେ ବୁଝିପାରିଛନ୍ତି ।
ପ୍ରଧାନମନ୍ତ୍ରୀ ଉର୍ଜା ଗଙ୍ଗା ଯୋଜନାରେ କଟକ-ଭୁବନେଶ୍ୱର ଦ୍ୱୈତ ନଗରୀରେ ୫ ଲକ୍ଷ ଘରକୁ ହେବ ପାଇପ ଯୋଗେ ରନ୍ଧନ ଗ୍ୟାସ ଯୋଗାଣ । ତେଣୁ ଏତେ ସଂଖ୍ୟକ ଲୋକଙ୍କୁ ସିଧାସଳଖ ଜୋଡି ପାରୁଥିବା ଏହି ଯୋଜନା ଉପରେ ସବୁ ରାଜନୈତିକ ଦଳଙ୍କ ଆଖି ।