ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ରାଜଧାନୀରେ ଆଉ ଏକ ରିଅଲ ଇଷ୍ଟେଟ୍ ମହାଦୁର୍ନୀତିର ପର୍ଦ୍ଦାଫାସ । ପୁଲିସ ଜାଲରେ ପୁଣି ଠକ ବିଲଡର୍ । ସ୍ପ୍ରିଂ ସିଟିର ମାଲିକ ସତ୍ୟବ୍ରତ ଧୀର୍ । ତ୍ରିଷ୍ନା ସ୍କାଏ କ୍ରାପର୍ସ ନାଁରେ ସେ କୋଟି କୋଟି ଟଙ୍କା ଲୁଟ କରିଥିବା ଅଭିଯୋଗ ରହିଛି । ଠକେଇର ଶିକାର ହୋଇଥିବା ଡାକ୍ତର ବିଶ୍ୱକେତନ ଦାଦବେବର୍ତାଙ୍କ ଅଭିଯୋଗକୁ ଭିତିକରି ପୁଲିସ ଗିରଫ କରିଛି ଏହି କୋଟିପତି ବିଲଡରଙ୍କୁ । ରାଜଧାନୀରେ ଘର ଖଣ୍ଡେ ପାଇବାକୁ ଜୀବନଯାକର ପୁଂଜି ଲଗାଇ ଦେଇଥିଲେ ବିଶ୍ୱକେତନ । ହେଲେ କାଗଜପତ୍ରରେ ରହିଯାଇଥିଲା ତାଙ୍କ ସ୍ୱପ୍ନ । ୮ ଲକ୍ଷ ଟଙ୍କା ଅଗ୍ରୀମ ଦେଇ ଫସିଯାଇଥିଲେ ସେ । ଶେଷରେ ନୟାପଲ୍ଲୀ ଥାନାର ଦ୍ୱାରସ୍ଥ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଏଟି ଚିଟଫଣ୍ଡ ମାମଲାରେ କମିଶନରେଟ ପୁଲିସ ଜେରା କରି ସାରିଛି ସ୍ପ୍ରିଂ ସିଟିର ମାଲିକ ସତ୍ୟବ୍ରତ ଧୀରଙ୍କୁ । ତେବେ ରିୟଲ ଇଷ୍ଟେଟର ଏହି ବେତାଜ୍ ବାଦସାହା ନାଁରେ ଗ୍ରାହକଙ୍କୁ ଠଳିବା ଓ ଚେକ୍ ବାଉନସ ମାମଲାରେ ଭୁବନେଶ୍ୱରରେ ୪ଟି ଓ ବାଲେଶ୍ୱରରେ ୪ ଟି ୱରେଂଟ ମଧ୍ୟ ଜାରି ହୋଇଥିଲା । ହେଲେ କୋଟି କୋଟି ଟଙ୍କା ଠକେଇର ଅଭିଯୋଗ ଆସିବା ପରେ ବି ସତ୍ୟବ୍ରତକୁ ହାତ ମାରି ପାରୁ ନଥିଲା ପୁଲିସ୍ ।
ଏବେ ପ୍ରଶ୍ନ ଉଠୁଛି, କମିଶନରେଟ ପୁଲିସ ଆରମ୍ଭ କରିବ କି ଅପରେସନ ସ୍ପ୍ରିଂ ସିଟି । କୁହାଯାଉଛି ଭୁବନେଶ୍ୱର ଉପକଣ୍ଠ କଂଟାପଡା ଠାରେ ପ୍ରାୟ ୩୨ ଏକର ଜାଗାରେ ଆରମ୍ଭ ହୋଇଥିଲା ଏହି ବିରାଟ ରିୟଲ ଇଷ୍ଟେଟ ପ୍ରୋଜେକ୍ଟ । ଆଉ ସତ୍ୟବ୍ରତର ଟାର୍ଗେଟରେ ଥିଲେ ମଧ୍ୟବିତ ଗ୍ରାହକ । ଦାମ ଏମିତି ରଖିଥିଲା ଯେ ମାତ୍ର ୬ ମାସ ଭିତରେ ବୁକ୍ ହୋଇଯାଇଥିଲା ୩ ହଜାର ୨ ଶହ ଫ୍ଲାଟ୍ । ଆଉ ଅଗ୍ରୀମ ଆକାରରେ ସତ୍ୟବ୍ରତ ଲୁଟ କରି ସାରିଥିଲା ୭୦ କୋଟିରୁ ଅଧିକ ଟଙ୍କା । ତାରିଖ ପରେ ତାରିଖ ଦେଇ ଚାଲିଲା, ହେଲେ ପ୍ରୋଜେକ୍ଟ ଶେଷ ହେଲା ନାହିଁ କି ଲୋକେ ଟଙ୍କା ଫେରି ପାଇଲେ ନାହିଁ । ହୁଏତ ସତ୍ୟବ୍ରତର ଗିରଫଦାରୀ ପରେ ଖୋଲିବ ରାଜଧାନୀରେ ରିୟଲ ଇଷ୍ଟେଟ୍ କେଳେଙ୍କାରୀ ଆଉ ଏକ ଅଧ୍ୟାୟ । ହେଲେ ଲକ୍ଷ ଲକ୍ଷ ଟଙ୍କା ଅଗ୍ରୀମ ଦେଇଥିବା ଗ୍ରାହକ ସେମାନଙ୍କ ଟଙ୍କା ଫେରି ପାଇବେ ତ ।