ପରଲୋକରେ ଆମେରିକାର ପୂର୍ବତନ ରାଷ୍ଟ୍ରପତି ଜର୍ଜ ବୁଶ୍ ! ୯୪ ବର୍ଷରେ ପରଲୋକ ।
କନକ ବ୍ୟୁରୋ : ପରଲୋକରେ ଆମେରିକାର ପୂର୍ବତନ ରାଷ୍ଟ୍ରପତି ଜର୍ଜ ବୁଶ୍ । ମୃତ୍ୟୁ ବେଳକୁ ତାଙ୍କୁ ୯୪ ବର୍ଷ ବୟସ ହୋଇଥିଲା । ଆମେରିକା ସମୟ ରାତି ୧୦ଟା ୧୦ରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ସେ ଦୀର୍ଘ ଦିନ ହେବ ରକ୍ତ ସଂକ୍ରମଣ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ । ହୋଷ୍ଟନରେ ତାଙ୍କର ଦେହାନ୍ତ ହୋଇଯାଇଛି । ବୁଶଙ୍କ ପୁତ୍ର ତଥା ପୂର୍ବତନ ଆମେରିକୀୟ ରାଷ୍ଟ୍ରପତି ଜର୍ଜ ଡବ୍ଲୁ ବୁସ କହିଥିବା ବକ୍ତବ୍ୟକୁ ଟୁଇଟରରେ ପ୍ରକାଶ କରିଛନ୍ତି ବୁସ୍ ପରିବାରର ମୁଖପାତ୍ର ।
Kanak News is now on WhatsApp
Join and get latest news updates delivered to you via WhatsApp
ସେ ଲେଖିଛନ୍ତି ଜେବ୍, ନିଲ୍, ମାର୍ଭିନ ଡୋରୋ ଏବଂ ମୁଁ ଦୁଃଖର ସହ ଘୋଷଣା କରୁଛୁ ୯୪ଟି ଉଲ୍ଲେଖନୀୟ ବର୍ଷ ପରେ ଆମ ପ୍ରିୟ ବାପାଙ୍କର ଦେହାନ୍ତ ହୋଇଯାଇଛି । ବୁଶ୍ ୧୯୮୯ ଜାନୁୟାରୀ ୨୦ରୁ ୧୯୯୩ ଜାନୁୟାରୀ ୨୦ ପର୍ଯ୍ୟନ୍ତ ଆମେରିକାର ୪୧ତମ ରାଷ୍ଟ୍ରପତି ଥିଲେ । ତାଙ୍କ ପୁଅ ଜର୍ଜ ଡବ୍ଲୁ ବୁସ୍ ଆମେରିକାର ୪୩ତମ ରାଷ୍ଟ୍ରପତି ଥିଲେ । ସେ ରାଷ୍ଟ୍ରପତି ଥିବାବେଳେ ୧୯୯୧ରେ ଉପସାଗରୀୟ ଯୁଦ୍ଧରେ ସଫଳତା ପାଇଥିଲେ । ସେ ୧୯୯୧ରେ ଉପସାଗରୀୟ ଯୁଦ୍ଧରେ ବେଶ୍ ସଫଳତା ପାଇଥିଲେ । ଏଥିପାଇଁ ତାଙ୍କ ଲୋକପ୍ରିୟତା ଯଥେଷ୍ଟ ବୃଦ୍ଧି ପାଇଥିଲା ।
ହେଲେ ଦେଶରେ ନୂଆ ଟିକସ ବ୍ୟବସ୍ଥା ପ୍ରଣୟନ କରିବାରୁ ତାଙ୍କୁ ଜୋରଦାର ବିରୋଧ କରାଯାଇଥିଲା । ଏଥିପାଇଁ ସେ ଦ୍ୱିତୀୟ ଥର ଆମେରିକା ଶାସନ ଦଖଲ କରିପାରିନଥିଲେ । ୧୯୨୪ ମସିହ ଜୁନ୍ ୧୨ରେ ଜନ୍ମ ଗ୍ରହଣ କରିଥିବା ବୁଶ୍ ୧୯୬୪ରେ ରାଜନୀତିରେ ପ୍ରବେଶ କରିଥିଲେ । ସେ ୧୯୮୦ରେ ସେ ରାଷ୍ଟ୍ରପତି ନିର୍ବାଚନ ପାଇଁ ଲଢ଼େଇ କରିଥିଲେ ମଧ୍ୟ ପରାସ୍ତ ହୋଇଥିଲେ । ସେ ୧୯୮୧ରୁ ୧୯୮୯ ଯାଏ ଆମେରିକାର ଉପରାଷ୍ଟ୍ରପତି ଭାବେ କାର୍ଯ୍ୟ କରିଥିଲେ । ଗତ ଅପ୍ରେଲ ମାସରେ ତାଙ୍କ ପତ୍ନୀ ବାରବରା ବୁଶଙ୍କର ଦେହାନ୍ତ ହୋଇଥିଲା । ତାଙ୍କ ମୃତ୍ୟୁରେ ବହୁ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରିଛନ୍ତି ।