କଳ୍ପନା ଜଳ୍ପନାର ଅନ୍ତ : ବିଜେପିରେ ଯୋଗ ଦେଲେ ପୂର୍ବତନ ଆଇଏଏସ ଅଫିସର ଅପରାଜିତା ଷଡଙ୍ଗୀ
କନକ ବ୍ୟୁରୋ : ଅନେକ ଚର୍ଚ୍ଚା ଆଲୋଚନା ଭିତରେ ବିଜେପିରେ ମିଶିଛନ୍ତି ବ୍ୟୁରୋକ୍ରାସିର ବହୁ ଚର୍ଚ୍ଚିତ ଚେହେରା ଅପରାଜିତା ଷଡଙ୍ଗୀ । ଦିଲ୍ଲୀରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ବାସଭବନରେ ଅପରାଜିତା ବିଧିବଦ୍ଧ ଭାବେ ବିଜେପିରେ ଯୋଗ ଦେଇଛନ୍ତି । ମୋଦି ଓ ବିଜେପିର ଅଭିମୁଖ୍ୟରେ ଅନୁପ୍ରାଣିତ ହୋଇ ସେ ରାଜନୀତିକୁ ଆସିଥିବା କହିଥିବା ବେଳେ ପଲିଟିକ୍ସରେ ସଫଳ ଇନିଂସ ଖେଳିବାର ଦୃଢୋକ୍ତି କରିଛନ୍ତି । ଯାହକୁ ନେଇ ସରଗରମ ହୋଇଛି ରାଜନୀତି ।
Kanak News is now on WhatsApp
Join and get latest news updates delivered to you via WhatsApp
ବିଜେପିରେ ଯୋଗଦେବା ପାଇଁ ପାଇଁ ଦିଲ୍ଲୀ ଆକବର ରୋଡ ସ୍ଥିତ ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ବାସଭବନରେ ପହଁଚିଥିଲେ ଅପରାଜିତା ଷଡଙ୍ଗୀ । ପୂର୍ବରୁ ଶାହାଙ୍କ ବାସଭବନରେ ଉପସ୍ଥିତ ଥାଆନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ରାଜ୍ୟ ବିଜେପି ସଭାପତି ଓ କିଛି ତୁଙ୍ଗ ନେତା । ନିଜେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଅପରାଜିତାଙ୍କୁ ସ୍ୱାଗତ କରିଥିଲେ ।
ଏହାପରେ ସବୁ କଳ୍ପନା ଜଳ୍ପନାର ଅନ୍ତ ଘଟାଇ ଅପରାଜିତା ବିଧିବଦ୍ଧ ଭାବେ ବିଜେପିରେ ସାମିଲ ହେଲେ । ଆଉ ଏହି ପ୍ରକ୍ରିୟା ଶେଷ ହେବାପରେ ଗଣମାଧ୍ୟମ ଆଗରେ ପ୍ରତିକ୍ରିୟା ରଖିଥିଲେ ଅପରାଜିତା କହିଥିଲେ ଦିଲ୍ଲୀରେ କାମ କରିବା ସମୟରେ ସେ ଅତି ନିକଟରୁ ପ୍ରଧାନମନ୍ତ୍ରୀଙ୍କ କାର୍ଯ୍ୟଶୈଳି ଦେଖି ପ୍ରଭାବିତ ହୋଇଥିଲେ । ଦିଲ୍ଲୀରେ ଗୋଟିଏ ପଟେ ଅପରାଜିତା ବିଜେପିରେ ସାମିଲ ହେଉଥିବା ବେଳେ ତାଙ୍କୁ ନେଇ ଓଡିଶା ରାଜନୀତି ବି ସରଗରମ ହେଉଥିଲା । ସବୁଠାରୁ ବଡ ପ୍ରଶ୍ନ ଥିଲା କେଉଁ ଭୂମିକାରେ ଆସିବେ ଅପରାଜିତା । ଏବଂ ଓଡିଶା ରାଜନୀତି ଉପରେ ଏହାର କଣ ପ୍ରଭାବ ପଡିବ ?
୧୯୯୪ ବ୍ୟାଚର ଓଡିଶା କ୍ୟାଡରର ଏହି ଆଇଏଏସ ସଫଳତାର ସହ ରାଜ୍ୟରେ ଅନେକ ଗୁରୁତ୍ୱ ପୂର୍ଣ୍ଣ ଦାୟିତ୍ୱ ତୁଲାଇଛନ୍ତି । ଏମିତିକି ପ୍ରଶାସିକ ଭାବେ ନେତା,ମନ୍ତ୍ରୀଙ୍କ ଠାରୁ ଭିନ୍ନ ମତ ରଖି ରାଜ୍ୟ ରାଜନୀତିକୁ ହଲଚଲ କରିଛନ୍ତି । ଏଣୁ ରାଜନୀତିର ମୈଦାନରେ ବିଜେପି ତାଙ୍କୁ ଏକ ଗୁରୁ ଦାୟିତ୍ୱ ଦେବା ନେଇ ଚର୍ଚ୍ଚା ହେଉଛି । ଅପରାଜିତାଙ୍କୁ କେଉଁ ପଦ ମିଳିବ ବା କେଉଁଠୁ ଦଳ ତାଙ୍କ ପ୍ରାର୍ଥୀ କରିବ ସେନଇ ଉକ୍ରଣ୍ଠା ବଢିଚାଲିଥିବା ବେଳେ କେନ୍ଦ୍ରମନ୍ତ୍ରୀ ଜୁଏଲ ଓରାମ କହିଛନ୍ତି ଓଡିଶାରେ ଧର୍ମେନ୍ଦ୍ର ହିଁ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ । ଆସନ୍ତା କାଲି ଭୁବନେଶ୍ୱରରେ ପହଁଚିବେ ଅପରାଜିତା । ଏହାପରେ ତାଙ୍କୁ ରାଜ୍ୟ ବିଜେପି କାର୍ଯ୍ୟାଳୟରେ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦିଆଯିବାର କାର୍ଯ୍ୟକ୍ରମ ରହିଛି ।