କନକ ବ୍ୟୁରୋ : ଅଣ୍ଡା ମାର, ବିଜେଡିରେ ଯୋଗ ଦିଅ । ଏପରି ଫଣ୍ଡାରେ ଆଜି ବିଜୁ ଜନତା ଦଳରେ ଯୋଗ ଦେଇଛନ୍ତି ଦେବଗଡର ପୂର୍ବତନ କଂଗ୍ରେସ କାଉଁସିଲର ଧର୍ମେନ୍ଦ୍ର ଦେବତା । ବର୍ଷକ ତଳେ ତତ୍କାଳୀନ ମନ୍ତ୍ରୀ ଅତନୁ ସବ୍ୟସାଚୀଙ୍କୁ ଅଣ୍ଡାମାଡ କରିଥିଲେ ଧର୍ମେନ୍ଦ୍ର । ହେଲେ ଆଜି ବିଜୁ ଆଦର୍ଶରେ ଅନୁପ୍ରାଣିତ ହୋଇ ବିଜେଡିରେ ଯୋଗ ଦେଇ ରାଜନୀତିରେ ଅଣ୍ଡା ମାଡର ସମୀକରଣ ବଦଳାଇ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜାନୁଆରୀ ୫, ୨୦୧୬ରେ ତତ୍କାଳୀନ ସ୍ୱାସ୍ଥ୍ର୍ୟ ମନ୍ତ୍ରୀ ଅତନୁ ସବ୍ୟସାଚୀଙ୍କ ଗାଡି ଉପରେ ଅଣ୍ଡାମାଡ କରିଥିଲେ ଦେବଗଡ କଂଗ୍ରେସ କର୍ମୀ । ଯାହାର ନେତୃତ୍ୱ ନେଇଥିଲେ ପୂର୍ବତନ କଂଗ୍ରେସ କାଉଁସିଲର ଧର୍ମେନ୍ଦ୍ର ଦେବତା । ଯେଉଁଥି ପାଇଁ ସେ ଜେଲ ବି ଯାଇଥିଲେ ।
ଠିକ୍ ବର୍ଷକ ପରେ ଜାନୁଆରୀ ୫ ୨୦୧୭ରେ ମନ୍ତ୍ରୀଙ୍କୁ ଅଣ୍ଡାମାଡ କରିଥିବା ଧର୍ମେନ୍ଦ୍ର ନବୀନ ନିବାସରେ ବିଧିବଦ୍ଧ ଭାବେ ବିଜେଡିରେ ଯୋଗ ଦେଇଛନ୍ତି । ଆଉ ତାଙ୍କ ସହ ଦେବଗଡ କଂଗ୍ରେସର ୬୬୫ ଜଣ କଂଗ୍ରେସ କର୍ମୀ ବି ଧରିଛନ୍ତି ନବୀନଙ୍କ ହାତ । ମନ୍ତ୍ରୀଙ୍କୁ ଅଣ୍ଡାମାଡ କରିଥିବା ଧର୍ମେନ୍ଦ୍ରଙ୍କ ପାଇଁ ଦେବଗଡରେ ବିଜେଡିର ଶକ୍ତି ବୃଦ୍ଧି ପାଇବ କହି ଦଳକୁ ପାଛୋଟି ନେଇଛନ୍ତି ନବୀନ ।
ବିଜେଡି ପାଇଁ ମୁଣ୍ଡବ୍ୟଥାର କାରଣ ପାଲଟୁଥିବା ବିରୋଧୀ ଦଳ ନେତାଙ୍କୁ ମର୍ଯ୍ୟଦାସଂପର୍ଣ୍ଣ ପଦ ଦେଇ ଦଳରେ ମିଶାଇବା ନବୀନଙ୍କ ପାଇଁ ନୂଆ ନୁହେଁ । ଏକ ଦଶନ୍ଦି ଧରି ବିଧାନସଭାରେ ନବୀନଙ୍କ ପାଇଁ ଅଡୁଆ ସାଜୁଥିବା ତତ୍କାଳୀନ ବିରୋଧୀ ଦଳ ନେତା ଭୂପିନ୍ଦର ସିଂ ଓ ଅନୁପ ସାଏ ଏହାର ଜ୍ୱଳନ୍ତ ଉଦାହରଣ । ଆଉ ଏବେ ବିଜେଡିର ଦୁର୍ବଳ ଦେବଗଡ ଜିଲ୍ଳାର ଦାୟିତ୍ୱ ଧର୍ମେନ୍ଦ୍ରଙ୍କୁ ମିଳିବା ନେଇ ଚର୍ଚ୍ଚା ହେଉଛି ।