କନକ ବ୍ୟୁରୋ : ଓଡିଆ ରୁଢି ‘ଗୃହଭେଦୀ ବିଭୀଷଣ’ ବିଷୟରେ ଅନେକ ଲୋକ ଜାଣିଥିବେ । ଆଉ ତାହାର ପ୍ରମାଣ ଏବେ ବିଜେଡି ଦଳରେ ଦେଖିବାକୁ ମିଳୁଛି । ଏବେ ରାଜ୍ୟ ରାଜନୀତିକୁ ଗରମ କରୁଛି ବିଜେପୁର ନିଆଁ । ପ୍ରତିଦିନ ବିଜେପୁର ରାଜନୀତି ମଇଦାନକୁ ଗୁଗୁଲି ଫିଙ୍ଗୁଛନ୍ତି ବରିଷ୍ଠ ନେତା । କିନ୍ତୁ ପୂର୍ବତନ ବିଜେଡି ବିଧାୟକ ଅଶୋକ ପ୍ରାଣିଗ୍ରାହୀଙ୍କ ବୟାନକୁ ନେଇ ବିଜେଡି ଭିତରେ ସୃଷ୍ଟି ହୋଇଛି କମ୍ପନ । କିପରି ନିଜର ଦଳ ଭିତରେ ଥିବା ନେତା ଗୃହଭେଦୀ ବିଭୀଷଣ ସାଜିପାରନ୍ତି ତାହାର ଉଦାହରଣ ଦେଇଛନ୍ତି ଅଶୋକ । ଅଶୋକଙ୍କ ଦେଇଥିବା ବୟାନକୁ ନେଇ ଏବେ ବିଜେଡି ଦଳରେ କେହି କାହାକୁ ବିଶ୍ୱାସକୁ ମଧ୍ୟ ନେଇ ପାରୁ ନାହାନ୍ତି । ଏଭଳି ଶଙ୍କା ଭିତରେ ଦଳ ବିଜେପୁରରେ ଫାଇଟ କରିବାକୁ ଚିନ୍ତା କରୁଛି । କନକ ନ୍ୟୁଜକୁ ପ୍ରତିକ୍ରିୟା ଦେଇ ଅଶୋକ କହିଛନ୍ତି, ବିଜେଡିରେ ସେ ପ୍ରତିଥର ଚକ୍ରାନ୍ତର ଶିକାର ହୋଇଛନ୍ତି । ଆଉ ଏହାର ଆରମ୍ଭ ହୋଇଥିଲା ୧୯୯୫ ମସିହାରୁ । ୧୯୯୫ ମସିହାରେ ତାଙ୍କ ଟିକଟ୍ କଟାଯାଇଥିଲା । କିନ୍ତୁ ସେତେବେଳେ ସେ ସ୍ୱାଧୀନ ଭାବେ ଲଢି ୩୨ ହଜାର ଭୋଟ ହାତେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ପରେ ୨୦୦୦ ମସିହାରେ ତାଙ୍କୁ ବିଜୁ ଜନତା ଦଳ ତରଫରୁ ପ୍ରାର୍ଥୀ କରାଯାଇଥିଲା ।ଏହି ନିର୍ବାଚନରେ ସେ ବିଜୟୀ ହୋଇ ପ୍ରଥମଥର ପାଇଁ ବିଧାୟକ ହୋଇଥିିଲେ । କିନ୍ତୁ ୨୦୦୪ରେ ସ୍ଥିତି ବଦଳି ଯାଇଥିଲା । ୨୦୦୪ରେ ପ୍ରସନ୍ନ ଆଚାର୍ଯ୍ୟ ମୋତେ ଚକ୍ରାନ୍ତ କରି ହରାଇଲେ । କାଳେ ନେତୃତ୍ୱରେ ବାଧା ସୃଷ୍ଟି ହେବ ତେଣୁ ମୋ ବିରୋଧରେ ଚକ୍ରାନ୍ତ କରିଥିଲେ ପ୍ରସନ୍ନ । ଏହାସହ କଂଗ୍ରେସ ପ୍ରାର୍ଥୀଙ୍କୁ ସାହାଯ୍ୟ କରି ବିଜେପୁରରେ ସୁବଳଙ୍କୁ ବିଜୟୀ କରିଥିଲେ । ଏହାପରେ ୨୦୦୯ ନିର୍ବାଚନରେ ତାଙ୍କ ଟିକଟ ପୁଣିଥରେ କାଟି ଦିଆ ଯାଇଥିଲା । ତାଙ୍କ ବଦଳରେ ଏକ ନୂଆ ଚେହେରାକୁ ନିବାର୍ଚନ ଋଣାଙ୍ଗନରେ ଓହ୍ଲାଇଥିଲା ଦଳ । କିନ୍ତୁ ସେହି ପ୍ରାର୍ଥୀ ମଧ୍ୟ ପୁଣିଥରେ ପ୍ରସନ୍ନଙ୍କ ଚକ୍ରାନ୍ତର ଶିକାର ହେଲେ । ଆଉ ବାଜି ମାରିନେଲା କଂଗ୍ରେସ ।
ତେବେ ବିଜେପୁରରେ ସମସ୍ତଙ୍କ ବିରୋଧରେ ଚକ୍ରାନ୍ତ କରୁଥିବା ପ୍ରସନ୍ନ ନିଜେ ୨୦୧୪ରେ ଦଳୀୟ ନେତୃବୃନ୍ଦଙ୍କ ଚକ୍ରାନ୍ତର ଶିକାର ହେଲେ । ଅଶୋକ କହିଛନ୍ତି ହେଭିୱେଟ ପ୍ରସନ୍ନଙ୍କ ବିରୋଧରେ ଅନ୍ୟ କେହି ନୁହେଁ ବରଂ ଦଳୀୟ ନେତା କଳ୍ପତରୁ ରଚିଥିଲେ ଚକ୍ରବ୍ୟୁହ । ପ୍ରସନ୍ନଙ୍କୁ ହରାଇବା ପାଇଁ ତାଙ୍କୁ ସ୍ୱାଧୀନ ପ୍ରାର୍ଥୀ ଭାବେ ଲଢିବାକୁ କହିଥିଲେ କଳ୍ପତରୁ । ଏହା ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଏବଂ ସେ ସ୍ୱାଧୀନ ପ୍ରାର୍ଥୀ ହୋଇ ବିଜେପୁରରେ ଲଢନ୍ତୁ ବୋଲି ମୁଖ୍ୟମନ୍ତ୍ରୀ ଚାହୁଁଛନ୍ତି ବୋଲି ତାଙ୍କୁ କଳ୍ପତରୁ ଫୋନ କରି କହିଥିଲେ । କିନ୍ତୁ ସ୍ୱାଧୀନ ପ୍ରାର୍ଥୀ ହେବା ପରେ ତାଙ୍କୁ ଦଳରୁ ବହିଷ୍କାର କରାଗଲା । ଏହା ମଧ୍ୟ ଚକ୍ରାନ୍ତ ଥିଲା ବୋଲି ସେ କହଛନ୍ତି । ଦଳରୁ ବହିଷ୍କାର ହେବା ପରେ ମଧ୍ୟ ସେ ଦଳ ପ୍ରତି ଆନୁଗତ୍ୟ ରଖିଥିଲେ । କିନ୍ତୁ ରୀତା ସାହୁଙ୍କୁ ପ୍ରାର୍ଥୀ କରାଯିବା ପରେ ବିଜେଡି ବିରୋଧରେ ମୋର୍ଚ୍ଚା ଖୋଲିଛନ୍ତି ଅଶୋକ ।
ସର୍ବଦା ବୟାନବାଜିରୁ ଦୂରେଇ ରହୁଥିବା ଓ ଗଣମାଧ୍ୟମ ଆଗରେ କମ ମତ ରଖୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏହି ବୟାନବାଜି ଲଢେଇରେ ଲମ୍ପ ଦେଇଛନ୍ତି । ମୁଖ୍ୟମନ୍ତ୍ରୀ ୬ ଦିନିଆ ଦିଲ୍ଲୀ ଗସ୍ତ ଯିବା ପୂର୍ବରୁ ବିଜେପୁରକୁ ନେଇ ସ୍ୱଷ୍ଟ ମତ ରଖିଛନ୍ତି । ବିଜେପୁରକୁ ନେଇ ବିଜେଡି ମଧ୍ୟରେ କୌଣସି ଦ୍ୱନ୍ଦ ନାହିଁ ଏବଂ ସବୁ ସମସ୍ୟାର ସମାଧାନ ହୋଇଛି ବୋଲି ଦୃଢ ସହକାରେ କହିଛନ୍ତି ନବୀନ । ତା ଛଡା ଅଶୋକ ଆଣିଥିବା ଅଭିଯୋଗରେ କୌଣସି ସତ୍ୟତା ନଥିବା କହିଛନ୍ତି ନବୀନ । ଏହାସହ ବିଜେପୁର ପୂର୍ବତନ ବିଧାୟକ ଅଶୋକ ପାଣିଗ୍ରାହୀ ଆଣିଥିବା ଆକ୍ଷେପ ଆଦୌ ଠିକ୍ ନୁହେଁ ବୋଲି ସେ କହିଛନ୍ତି । ତେବେ ନବୀନଙ୍କ କଥାରେ ସତ୍ୟତା ଅଛି କି ନାହିଁ ତାହା କଳ୍ପତରୁ ବଞ୍ଚିଥିଲେ ଜଣା ପଡି ଯାଇଥାନ୍ତା ବୋଲି କହିଛନ୍ତି ଅଶୋକ ।
ଗତକାଲି ନବୀନ ରୀତାଙ୍କୁ ବିଜେପୁରରୁ ପ୍ରାର୍ଥୀ ଘୋଷଣା କରିବା ପରେ ୨୦୧୪ରେ ବିଜେଡିର ବିଦ୍ରୋହୀ ପ୍ରାର୍ଥୀ ଥିବା ଅଶୋକ ପାଣିଗ୍ରାହୀ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଲେଖିଥିଲେ ଖୋଲା ଚିଠି । ଯେଉଁଥିରେ ସେ ବିଜୁ ପରିବାର ସହିତ ଭାବାତ୍ମକ ସଂପର୍କ ଛିନ୍ନ କରୁଥିବା ଉଲ୍ଲେଖ କରିଛନ୍ତି । ସେପଟେ ରୀତା ସାହୁଙ୍କୁ ବିଜେଡି ପ୍ରାର୍ଥୀ ଘୋଷଣା କରିବାକୁ ନେଇ ନବୀନଙ୍କୁ ସମାଲୋଚନା କରିଛନ୍ତି ଅଶୋକ । କହିଛନ୍ତି, ଦୀର୍ଘ ୧୩ ବର୍ଷ ଧରି ଯେଉଁ ପରିବାର ବିଜେଡିର ନୀତି ଆଦର୍ଶ ବିରୋଧରେ କାମ କରୁଥିଲା ସେହି ପରିବାରକୁ ଉପ ନିର୍ବାଚନରେ ପ୍ରାର୍ଥୀ କରାଇ ଦଳ ବିଜୁ ପ୍ରେମୀଙ୍କ ମନରେ କଷ୍ଟ ଦେଇଛି ।
ଅଶୋକ ଏବେ ବିଜେପି ମୁହାଁ ହୋଇଥିବା ଏକରକମ ସ୍ୱଷ୍ଟ ହୋଇଯାଇଛି । ସେ କହିଛନ୍ତି, ଏବେ ସେ ଆଉ ବିଜେଡି ସହ ନାହାନ୍ତି ହେଲେ କଂଗ୍ରେସ ହାତ କେବେ ଧରିବେ ନାହିଁ ବୋଲି ରୋକଠୋକ କହିଛନ୍ତି । ଏବେ ବିଜେପି ପ୍ରତି ଲୋକଙ୍କ ସମର୍ଥନ ବଢିଛି, ତାଙ୍କ ସମର୍ଥକ ଚାହିଁଲେ ସେ ବିଜେପି ଦଳରୁ ମଧ୍ୟ ନିର୍ବାଚନ ଲଢିବେ ବୋଲି ଇଙ୍ଗିତ କରିଛନ୍ତି । ବିଜେପୁର ଫେରିଲା ପରେ ଅଂଚଳ ବାସୀଙ୍କ ସହ ଆଲୋଚନା କରି କେଉଁ ଦଳକୁ ଯିବି ନିଷ୍ପତି ନେବି ବୋଲି ଅଶୋକ ପାଣିଗ୍ରାହୀ କହିଛନ୍ତି । ଅଶୋକ ପାଣିଗ୍ରାହୀ ଯଦିଓ ବିଜେଡିର ରାଜନୈତିକ ଦୃଶ୍ୟପଟରେ ଅଲୋଡା ହୋଇଯାଇଥିଲେ, ତଥାପି ତାଙ୍କ ପାଖରେ ଥିବା ପକେଟ ଭୋଟ ଆଗାମୀ ଦିନରେ ବିଜେଡିକୁ ଅଡୁଆରେ ପକାଇପାରେ ବୋଲି ଅନୁମାନ କରାଯାଉଛି ।