କନକ ବ୍ୟୁରୋ : ସମ୍ବଲପୁର ମାଛରୁ ମିଳିଲା ବିଷ । ଆଜି ସମ୍ବଲପୁର ସହରରେ କରାଯାଉଥିବା ଯାଂଚ ସମୟରେ ଦୁଇଟି ଆନ୍ଧ୍ର ମାଛରେ ମିଳଛି ବିଷାକ୍ତ ଫର୍ମାଲିନ୍ । ମତ୍ସ୍ୟ ଓ ପଶୁସମ୍ପଦ ବିଶେଷଜ୍ଞ ଟିମ୍ ଯାଂଚ କରୁଥିବା ସମୟରେ ଏହା ଜଣାପଡିଛି । ତେବେ ଅଧିକ ତଥ୍ୟ ପାଇଁ ମାଛକୁ ଭୁବନେଶ୍ୱର ପରୀକ୍ଷାଗାରକୁ ପଠାଇ ଅଧିକ ଯାଂଚ କରାଯିବ ବୋଲି କହିଛନ୍ତି ତଦନ୍ତକାରୀ ଟିମ୍ । ସେପଟେ ବିଷାକ୍ତ ମାଛ ମିଳିବା ପରେ ସହରରେ ଯାଂଚ ପ୍ରକ୍ରିୟାକୁ ଜୋରଦାର କରିଛି ମହାନଗର ନିଗମ । ମାଛରେ ଫର୍ମାଲିନ ମିଶିଥିବା ନେଇ ଅଭିଯୋଗ ଆସିବା ପରେ ରାଜ୍ୟର ବିଭିନ୍ନ ସ୍ଥାନରେ ଚଢ଼ାଉ କରାଯାଇ ନମୁନା ସଂଗ୍ରହ କରାଯାଉଛି । ଆନ୍ଧ୍ର ମାଛରେ ଫର୍ମାଲିନ ମିଶିଥିବା ନେଇ ଅଭିଯୋଗ ଆସିବା ପରେ ରାଜ୍ୟ ସରକାର ସତର୍କତାମୂଳକ ପଦକ୍ଷେପ ସ୍ୱରୁପ ମାଛ ବ୍ୟବସାୟୀଙ୍କ ଉପରେ କଡା ନଜର ରଖିବା ପାଇଁ ନିର୍ଦ୍ଦେଶ ଦେଇଥିଲେ । ପ୍ରତି ଜିଲ୍ଲାରେ ଏକ ଟିମ୍ ଗଠନ କରି ଯାଂଚ କରିବାକୁ ନିର୍ଦ୍ଦେଶ ଦେଇଥିଲେ । ମିଳିଥିବା ସୂଚନା ଅନୁଯାୟୀ, ଆଜି ସକାଳେ ସମ୍ବଲପୁରର ବୁଢ଼ାରଜା, ଅଇଁଠାପାଲି, କୁଲୁଥକାନି ଆଦି ଅଞ୍ଚଳରୁ ମତ୍ସ୍ୟବିଭାଗ ପକ୍ଷରୁ ମାଛ ନମୂନା ସଂଗ୍ରହ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଆସାମ ସରକାର ମାଛରେ ଫର୍ମାଲିନ ପ୍ରୟୋଗ ହୋଇଥିବାରୁ ଆନ୍ଧ୍ରପ୍ରଦେଶରୁ ଯାଉଥିିବା ମାଛ ଉପରେ ବ୍ୟାନ ଲଗାଇ ଥିଲେ । ଏହି ଫର୍ମାଲିନ୍ ରାସାୟନିକଟି ଶବକୁ ସତେଜ ରଖିବା ପାଇଁ ପ୍ରୟୋଗ ହୋଇଥାଏ ଓ ଏହା କ୍ୟାନସର ରୋଗ ସୃଷ୍ଟି କରିଥାଏ ବୋଲି କୁହାଯାଏ । ତେବେ ଆସାମ ସରକାର ଆନ୍ଧ୍ରମାଛ ଉପରେ ରୋକ୍ ଲଗାଇବା ପରେ ଓଡ଼ିିଶା ସରକାର ମାଛର ନମୂନା ସଂଗ୍ରହ ପାଇଁ ନିଷ୍ପତ୍ତି ନେଇଥିଲେ । ଆଉ ଏଥିପାଇଁ ଗତ ୧୨ ତାରିଖ ଦିନ ପଦକ୍ଷେପ ନେବାକୁ ବିଭାଗୀୟ ସଚିବଙ୍କୁ ନିର୍ଦ୍ଦେଶ ଦେଇଥଲେ ମତ୍ସ୍ୟ ଓ ପଶୁସମ୍ପଦ ମନ୍ତ୍ରୀ ପ୍ରଦୀପ ମହାରଥୀ ।
ଏହି ନିର୍ଦ୍ଦେଶକ୍ରମେ ୧୩ ତାରିଖ ଦିନ ୪ ନମ୍ବର ମାଛ ହାଟରୁ ମାଛର ନମୂନା ସଂଗ୍ରହ କରାଯାଇ ପରୀକ୍ଷା କରାଯାଇଥିଲା । ରାସାୟନିକ ପରୀକ୍ଷାରୁ ସଂଗୃହିତ ମାଛ ମଧ୍ୟରୁ ପାମ୍ପଲେଟ୍ ମାଛରେ ଫର୍ମାଲିନ ପ୍ରଲେପ ଦିଆଯାଥିବା ସ୍ପଷ୍ଟ ହୋଇଥିଲା । ତା ପରେ ରାଜ୍ୟର ବିଭିନ୍ନ ସ୍ଥାନରେ ବିକ୍ରି ହେଉଥିବା ମାଛରେ ଫର୍ମାଲିନ ଦିଆଯାଉଛି କିମ୍ବା ନାହିଁ ତାହା ଜାଣିବା ପାଇଁ ମାଛ ନମୂନରା ସଂଗ୍ରହ କରାଯାଉଛି । ଗତକାଲି କଟକ, ବ୍ରହ୍ମପୁର ଓ ରାଉରକେଲାରେ ମାଛ ନମୂନା ସଂଗ୍ରହ ହୋଇଥିବା ବେଳେ ଆଜି ସମ୍ବଲପୁର ଓ ଖୋର୍ଦ୍ଧାର ବିଭିନ୍ନ ମାଛ ବଜାରରେ ଚଢ଼ାଉ କରାଯାଇ ମାଛରେ ଫର୍ମାଲିନ ଦିଆଯାଇଛି କିମ୍ବା ନାହିଁ ତାହା ଯାଞ୍ଚ କରାଯାଉଛି ।