ପଡ଼ିଆରେ ନୁହେଁ ରାଜନୀତି ମୈଦାନରେ ହକି ପାଇଁ ଲଢ଼େଇ : ଜାତୀୟ ଖେଳର ମର୍ଯ୍ୟାଦା ଦେବା ପ୍ରସଙ୍ଗରେ କେନ୍ଦ୍ର କ୍ରୀଡ଼ାମନ୍ତ୍ରୀ,କହିଲେ ହକିକୁ ଭଲପାଇବା ପାଇଁ ଆବଶ୍ୟକ ନାହିଁ ମାନ୍ୟତା
କନକ ବ୍ୟୁରୋ : ହକିକୁ ଜାତୀୟ ଖେଳଭାବେ ଘୋଷଣା କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚିଠି ଲେଖିବା ପରେ ଆଜି କେନ୍ଦ୍ର କ୍ରୀଡାମନ୍ତ୍ରୀ ଜବାବ ରଖିଛନ୍ତି । ମନ୍ତ୍ରୀ ରାଜ୍ୟବର୍ଦ୍ଧନ ସିଂ ରାଠୋର କହିଛନ୍ତି, ହକିକୁ ଭଲପାଇବା ପାଇଁ ଏହାକୁ ସରକାରୀ ଭାବେ ଘୋଷଣା କରିବାର କୌଣସି ଆବଶ୍ୟକତା ନାହିଁ । କେନ୍ଦ୍ରମନ୍ତ୍ରୀଙ୍କ ଏହି ପ୍ରତିକ୍ରିୟା ପରେ ଏହି ପ୍ରସଙ୍ଗ ବିବାଦ ମୁହାଁ ହୋଇଛି । ସେପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ହକିକୁ ଜାତୀୟ ଖେଳ ଭାବେ ଘୋଷଣା କରିବା ପାଇଁ ପ୍ରଧାନମନ୍ତ୍ରୀଙ୍କ ସହ ଆଲୋଚନା କରିବେ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ହକିକୁ ଜାତୀୟ ଖେଳର ମାନ୍ୟତା ଦେବା ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚିଠି ଲେଖିବା ପରେ ଆଜି ଗଣମାଧ୍ୟମ ଆଗରେ ପ୍ରତିକ୍ରିୟା ରଖି କହିଛନ୍ତି ସେ ଏନେଇ ମୋଦିଙ୍କ ସହ ଆଲୋଚନା କରିବେ ।
ତେବେ ଓଡ଼ିଶା ମୁଖ୍ୟମନ୍ତ୍ରୀ ଏଭଳି ଦାବି ଉଠାଇବା ପରେ ପ୍ରତିକ୍ରିୟା ପ୍ରକାଶ ରଖିଛନ୍ତି କେନ୍ଦ୍ର କ୍ରୀଡ଼ାମନ୍ତ୍ରୀ ରାଜ୍ୟବର୍ଦ୍ଧନ ସିଂହ ରାଠୋର । ସେ କହିଛନ୍ତି କ୍ରୀଡ଼ାକୁ ଭଲପାଇବା ପାଇଁ ଆମେ ସରକାରୀ ଘୋଷଣାନାମା ଆବଶ୍ୟକ କରୁନାହିଁ । ଏହା ଏବେ ଆମର ଜାତୀୟ ଖେଳ । ତେଣୁ ଏହାକୁ ଭଲ ପାଇବା ଆରମ୍ଭ କରିବା ଦରକାର । ସୁବିଧା ସୁଯୋଗ ପାଉଥିବା କ୍ରୀଡ଼ା ମଧ୍ୟରେ ହକି ଅନ୍ୟତମ ରହିଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମୁଖ୍ୟମନ୍ତ୍ରୀ ଚିଠି ଲେଖିବା ପରେ କେନ୍ଦ୍ରକ୍ରୀଡ଼ା ମନ୍ତ୍ରୀଙ୍କ ପ୍ରତିକ୍ରିୟା ଘଟଣାକୁ ବିବାଦୀୟ କରିଦେଇଛି । ଗୋଟିଏ ପଟେ ନବୀନ କରୁଛନ୍ତି ଏହାକୁ ଜାତୀୟ ଖେଳ ରୂପେ ଘୋଷଣା କଲେ ଖେଳାଳିଙ୍କୁ ଉଚିତ ସମ୍ମାନ ମିିଳିବ ଏବଂ ଅନ୍ୟପଟେ କେନ୍ଦ୍ରମନ୍ତ୍ରୀ କହୁଛନ୍ତି ସେଭଳି ଘୋଷଣାନାମାରେ ଆବଶ୍ୟକତା ନାହିଁ ।
ଆସନ୍ତା ନଭେମ୍ବର ମାସରୁ ଭୁବନେଶ୍ୱରରେ ବିଶ୍ୱକପ୍ ହକି ପ୍ରତିଯୋଗିତା ଆରମ୍ଭ ହେବାକୁ ଯାଉଛି । ଏବଂ ଭାରତୀୟ ହକି ଦଳକୁ ପ୍ରଥମ ଥର ପାଇଁ ଏକ ରାଜ୍ୟ ସରକାର ୫ ବର୍ଷ ପାଇ ପ୍ରାୟୋଜିତ କରିଛନ୍ତି ।