କନକ ବ୍ୟୁରୋ : ପାଣି କମିଛି, ହେଲେ ସମସ୍ୟା ବଢ଼ିଛି । ରାୟଗଡ଼ା ଏବଂ କଳାହାଣ୍ଡି ଜିଲ୍ଲାର ବନ୍ୟା ସ୍ଥିତିର ମୁକାବିଲା ପାଇଁ ଜୋରଦାର ପ୍ରୟାସ ଚାଲିଛି । ଆକାଶମାର୍ଗରୁ ଲୋକଙ୍କ ପାଖରେ ପହଂଚୁଛି ଖାଦ୍ୟ ପୁଡ଼ିଆ । ଉଦ୍ଧାର କାର୍ଯ୍ୟକୁ ଜୋରଦାର କରାଯାଇଛି । ପାଣି ଘେରରେ ଫଶି ରହିଥିବା ଲୋକଙ୍କୁ ଉଦ୍ଧାର କରିଛନ୍ତି ଏନଡିଆରଏଫ୍ ଏବଂ ଓଡ୍ରାଫ୍ ଟିମ୍ । ହେଲେ ପାଣି କମିବା ପରେ ବଢ଼ିଛି ଲୋକଙ୍କ ଦୁର୍ଦ୍ଦଶା ।
Kanak News is now on WhatsApp
Join and get latest news updates delivered to you via WhatsApp
ପାଣି କମୁଛି, ସମସ୍ୟା ବଢୁଛି, ଘର ସଜାଡୁଛି ବନ୍ୟା ପୀଡ଼ିତ
ନାଗାବଳୀ ଏବଂ କଲ୍ୟାଣୀ ନଦୀର ଜଳସ୍ରୋତ କମି କମି ଆସୁଛି, ଜନବସତି ଭିତରୁ ଅପସରି ଯାଇଛି ବନ୍ୟାଜଳ । ହେଲେ ବଢୁଛି ଲୋକଙ୍କ ସମସ୍ୟା । କାହିଁକି ନା ଧୋଇ ହୋଇଯାଇଛି ଘରର ଆସବାବପତ୍ର । ଆଉ, ବନ୍ୟା ବିଗାଡି ଦେଇଥିବା ଘରକୁ ସଜାଡିବାରେ ଲାଗିଛନ୍ତି କଲ୍ୟାଣସିଂହପୁରର ବନ୍ୟା ପ୍ରପୀଡ଼ିତ ।
ଉଦ୍ଧାର ଓ ରିଲିଫ୍ କାର୍ଯ୍ୟ ଜୋରଦାର , ନିୟନ୍ତ୍ରଣକୁ ଆସୁଛି ବନ୍ୟା ସ୍ଥିତି
ଆକାଶମାର୍ଗରୁ ଲୋକଙ୍କ ପାଖରେ ପହଂଚିଛି ରିଲିଫ୍ ସାମଗ୍ରୀ । ଅସ୍ଥାୟୀ ଅଶ୍ରୟସ୍ଥଳରେ ବନ୍ୟା ପୀଡ଼ିତଙ୍କୁ ଯୋଗାଇ ଦିଆଯାଉଛି ରନ୍ଧା ସାମଗ୍ରୀ । ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିଛନ୍ତି ଏନଡିଆରଏଫ୍ ଏବଂ ଡ୍ରାଫ୍ ଟିମ୍ । ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବନ୍ୟା ମୁକାବିଲା ପାଇଁ ଜୋର ଲଗାଇ ଦେଇଛି ପ୍ରଶାସନ । ତ୍ୱରିତ ବନ୍ୟା ସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ଅନବରତ ଜାରି ରହିଛି ପ୍ରୟାସ ।
ହାତୀ ନଦୀରେ କମୁଛି ଜଳସ୍ରୋତ, କଳହାଣ୍ଡିରେ ସୁଧୁରୁଛି ସ୍ଥିତି
ଧୀରେ ଧୀରେ ହାତୀ ନଦୀରେ କମୁଛି ବନ୍ୟା, ଆଉ ତାସହ ନିୟନ୍ତ୍ରଣକୁ ଆସୁଛି ବନ୍ୟାସ୍ଥିତି । ହେଲେ ଥୁଆମୁଳ ରାମପୁର ବ୍ଲକରେ ପ୍ରଶାସନ ପାଇଁ ସମସ୍ୟା ସୃଷ୍ଟି କରିଛି ରିଲିଫ୍ ଓ ଉଦ୍ଧାର କାର୍ଯ୍ୟ । ଯୋଗାଯୋଗ ବିଚ୍ଛନ୍ନ ହୋଇଥିବାରୁ ପ୍ରଶାସନ ଲୋକଙ୍କ ପାଖରେ ପହଂଚିବା ପାଇଁ ସଂଘର୍ଷ କରୁଛି । ଆଉ ଏହାରି ଭିତରେ ୧୫୦ ଜଣ ବୋଲବମ୍ ଭକ୍ତଙ୍କୁ ଉଦ୍ଧାର କରାଯାଇଛି । ଏପଟେ କଲମପୁର ଏବଂ ଜୁନାଗଡ଼ ବ୍ଲକରେ ସୃଷ୍ଟି ହୋଇଥିବା ବନ୍ୟା ସ୍ଥିତିରେ ସୁଧାର ଆସୁଛି ।
ଘନ ଘନ ବସୁଛି ବୈଠକ , ପ୍ରସ୍ତୁତ ରହିଛି ମୁକାବିଲାର ନକ୍ସା
ଉଭୟ ରାୟଗଡ଼ା ଏବଂ କଳାହାଣ୍ଡି ଜିଲ୍ଲାର ବନ୍ୟା ସ୍ଥିତି ଉପରେ ରହିଛି ସରକାରଙ୍କ ନଜର । ବନ୍ୟା ସ୍ଥିତିର ମୁକାବିଲା ପାଇଁ ରାୟଗଡ଼ା ଜିଲ୍ଲାର ୧୦ଟି ସ୍ଥାନରେ ହୋଇଛି ରନ୍ଧାଖାଦ୍ୟ ପାଇଁ ବ୍ୟବସ୍ଥା । ୧୦ ହଜାର ଲୋକଙ୍କୁ ଯୋଗାଇ ଦିଆଯାଉଛି ରନ୍ଧାଖାଦ୍ୟ । ଟ୍ୟାଙ୍କର ଜରିଆରେ ଲୋକଙ୍କ ପାଖକୁ ପଠାଯାଉଛି ପିଈବା ପାଣି । କଳହାଣ୍ଡି ଜିଲ୍ଲାର କଲମପୁର ବ୍ଲକରେ ବାଲିଛଡ଼ା, ବିରିପୁର ଏବଂ କର୍ମେଲି ଗାଁରେ ଏବେ ଆଶ୍ରୟସ୍ଥଳରେ ରହିଛି ବନ୍ୟା ପ୍ରପୀଡ଼ିତ । ଥୁଆମୁଳ ରାମପୁରକୁ ଯୋଗଯୋଗ ବିଚ୍ଛିନ୍ନ ରହିଥିବାରୁ ପ୍ରଭାବିତ ହୋଇଛି ଉଦ୍ଧାର ଓ ରିଲିଫ୍ କାର୍ଯ୍ୟ । ତେବେ ଜୁନାଗଡ଼ ବ୍ଲକରେ ସ୍ଥିତି ସଂପୂର୍ଣ୍ଣ ନିୟନ୍ତ୍ରଣକୁ ଆସିଛି ।
ଉଭୟ ରାୟଗଡ଼ା ଏବଂ କଳହାଣ୍ଡି ଜିଲ୍ଲାର ବନ୍ୟାସ୍ଥିତି ବାକୁ ଆସୁଥିବା ବେଳେ ପାଣିପାଗ ବିଭାଗର ପୂର୍ବାନୁମାନ ପ୍ରଶାସନ ପାଇଁ ଏକ ପ୍ରକାର ଚ୍ୟାଲେଂଜ ସୃଷ୍ଟି କରିଛି । ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ପୂର୍ବାନୁମାନ କରାଯାଇଥିବାରୁ ଉଦ୍ଧାର ଏବଂ ରିଲିଫ୍ କାର୍ଯ୍ୟରେ ପୁଣି ସମସ୍ୟା ସୃଷ୍ଟି ହେବାର ଆଶଙ୍କା କରାଯାଉଛି ।