ପରୀକ୍ଷା କେନ୍ଦ୍ର ପାଇଁ ଫିକ୍ସିଂ ? ପ୍ଲସ ଟୁ ପରୀକ୍ଷା କେନ୍ଦ୍ର ପାଇଁ ଫିକ୍ସିଂ ନେଇ ସାଙ୍ଘାତିକ ଅଭିଯୋଗ ଆଣିଲେ ପରୀକ୍ଷା କମିଟି ସଭ୍ୟ । କହିଲେ, ଲାଞ୍ଚ ଦେଇ ସେଣ୍ଟର ବଦଳାଉଛନ୍ତି ସିଏଚଏସଇର ଅସାଧୁ କର୍ମଚାରୀ
କନକ ବ୍ୟୁରୋ: ଲାଂଚ ନେଇ ପ୍ଲସ ଟୁ ପରୀକ୍ଷା କେନ୍ଦ୍ର ବଦଳାଇଛନ୍ତି ଉଚ୍ଚ ମାଧ୍ୟମିକ ଶିକ୍ଷା ପରିଷଦର ଅଧିକାରୀ । ଏଭଳି ଗୁରୁତର ଅଭିଯୋଗ କରିଛନ୍ତି ଯୁକ୍ତ ଦୁଇ ପରୀକ୍ଷା କମିଟି ସଭ୍ୟ । ଅଭିଯୋଗ ହୋଇଛି, କିଛି ଅସାଧୁ କର୍ମଚାରୀ ଲାଂଚ ନେଇ ପରୀକ୍ଷା କେନ୍ଦ୍ର ବଦଳାଇ ଦେଇଛନ୍ତି । କମିଟି ପୂର୍ବରୁ ଦେଇଥିବା ପରୀକ୍ଷା କେନ୍ଦ୍ର ତାଲିକାକୁ ବେଖାତିର କରି ଆଉ ଏକ ତାଲିକା ପ୍ରକାଶ କରାଯାଇଛି । ବିଧାନସଭାରେ ଏହି ପ୍ରସଙ୍ଗ ଉଠାଇବେ ବୋଲି କହିଛନ୍ତି ବିଧାୟକ ତଥା କମିଟି ସଦସ୍ୟ ସନ୍ତୋଷ ସିଂ ସାଲୁକା ଓ କିଶୋର ମହାନ୍ତି । ଏଭଳି ଅଭିଯୋଗ ଆଣି କମିଟିର ଅନ୍ତରୀଣ ବୈଠକରୁ ଅଧାରୁ ବାହାରିଯାଇଛନ୍ତି କମିଟି ସଭ୍ୟ ।
Kanak News is now on WhatsApp
Join and get latest news updates delivered to you via WhatsApp
ଯେଉଁ କଲେଜରେ ପୂର୍ବ ବର୍ଷ କୌଣସି କପି ହୋଇନାହିଁ କି ପରୀକ୍ଷା କେନ୍ଦ୍ର ବାତିଲ ହୋଇନାହିଁ ସେଠାରେ ପରୀକ୍ଷା କେନ୍ଦ୍ର କରିବା ପାଇଁ କମିଟି ପ୍ରସ୍ତାବ ଦେଇଥିଲା । ତାହାକୁ ବଦଳା ଯାଇଥିବା ନେଇ ଅଭିଯୋଗ ହୋଇଥିବା ବେଳେ ଏହାକୁ ଖଣ୍ଡନ କରିଛନ୍ତି ଉପପରୀକ୍ଷା ନିୟନ୍ତ୍ରକ ।
ମାର୍ଚ୍ଚ ୩ରୁ ଆରମ୍ଭ ହେବ ପ୍ଲସ ଟୁ ପରୀକ୍ଷା । ୧୧୪୨ଟି ସେଂଟରରେ ୩ ଲକ୍ଷ ୪୯ ହଜାର ଛାତ୍ରଛାତ୍ରୀ ପରୀକ୍ଷା ଦେବେ । ତେବେ ପରୀକ୍ଷା କେନ୍ଦ୍ର ପାଇଁ ଫିକ୍ସିଂ ହୋଇଥିବା ଅଭିଯୋଗ, ପୂରା ପ୍ରକ୍ରିୟାକୁ ସଂଦେହ ଘେରକୁ ଟାଣିନେଇଛି ।