ଟଳିଗଲା ବଡ଼ ରେଳ ଦୁର୍ଘଟଣା : ନିଜ ଜୀବନ କଥା ଚିନ୍ତା ନକରି ନାଲି ଗାମୁଛା ଧରି ଟ୍ରେନ ଆଗକୁ ଦୌଡ଼ିଲେ ମାଛଧରାଳି
ଆଜିକାଲି କେତେ ଜଣ ଅନ୍ୟକଥା ଚିନ୍ତା କରୁଛନ୍ତି । ସମସ୍ତେ ନିଜକୁ ନେଇ ମସଗୁଲ । ତେବେ ଆଜିକା ଦୁନିଆରେ ବି ଏପରି ଲୋକ ଅଛନ୍ତି, ଯେଉଁମାନେ ନିଜ କଥା ଚିନ୍ତା ନକରି ପ୍ରଥମେ ଅନ୍ୟ କଥା ଚିନ୍ତା କରନ୍ତି । ମଙ୍ଗଳବାର ପଶ୍ଚମବଙ୍ଗର ଜଲପାଇଗୁଡ଼ିରେ ଥିବା ନନ୍ଦନପୁର କେରାରପୁରା ହଲଟ୍ ଷ୍ଟେସନରେ ଏକ ବଡ଼ ଧରଣର ଦୁର୍ଘଟଣାରୁ ବର୍ତ୍ତି ଯାଇଛି ହଲ୍ଦିବାରି-ଏନ୍ଜେପି ଯାତ୍ରୀବାହୀ ଟ୍ରେନ୍ । ସ୍ଥାନୀୟ ମାଛଧରାଳିଙ୍କ ସାହାସ ପାଇଁ ଏହା ସମ୍ଭବ ହୋଇ ପାରିଥିବା ଜଣାପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ,ନନ୍ଦନପୁର କେରାରପୁରାରେ ରହୁଥିବା ଅନୁପମ ବରୁଇ ନାମକ ଜଣେ ମାଛଧରାଳି ମଙ୍ଗଳବାର ସକାଳ ୭.୩୦ ସମୟରେ ମାଛ ଧରିବାକୁ ଯାଉଥିବା ବେଳେ ରେଳ ଧାରଣାରେ ପାନଡ଼୍ରୋଲ କ୍ଲିପ(ଧାରଣାକୁ ସଂଯୋଗ କରୁଥିବା କ୍ଲିପ୍) ନଥିବା ଦେଖିଥିଲେ । ଗୋଟେ କି ଦୁଇଟି ଦୁହେଁ ଏକା ସାଙ୍ଗରେ ୨୭ଟି ପାନଡ଼୍ରୋଲ କ୍ଲିପ୍ ନଥିବା ସେ ଦେଖିବାକୁ ପାଇଥିଲେ । କିଛି ସମୟ ମଧ୍ୟରେ ସେଇ ବାଟ ଦେଇ ହଲ୍ଦିବାରି-ଏନ୍ଜେପି ଯାତ୍ରୀବାହୀ ଟ୍ରେନ୍ ଯିବାକୁ ଥିବା ଜାଣି ସେ ସବୁ ଛାଡ଼ି ନିଜ ଘରକୁ ଧାଇଁ ଥିଲେ । ଘରୁ ଏକ ଲାଲ ରଙ୍ଗର କପଡ଼ା ଆଣି ସେ ରେଳ ଧାରଣାରେ ପହଞ୍ଚିବା ବେଳେକୁ ଦୂରରୁ ହଲ୍ଦିବାରି-ଏନ୍ଜେପି ଟ୍ରେନ୍ ଆସୁଥିବାର ଦେଖିଥିଲେ । ଏହା ଦେଖି ସେ ନିଜ ଜୀବନ କଥା ନ ଭାବି ଲାଲ କପଡ଼ା ଦେଖାଇ ଦ୍ରୁତଗାମୀ ଟ୍ରେନ୍ ଆଡ଼କୁ ଦୌଡ଼ିବାକୁ ଲାଗିଥିଲେ । ୨୦୦ମିଟର ଯିବା ପରେ ଟ୍ରେନ୍ ଚାଳକ ତାଙ୍କୁ ଦେଖିବା ସହ ତୁରନ୍ତ ଗାଡ଼ିକ ଅଟକାଇଥିଲେ ।