ବାଲାଟ ପୂର୍ବରୁ ଚାଲିଲା ବୁଲେଟ ! ବିଜେପୁର ଗୁଳିକାଣ୍ଡ ନେଇ ବିଜେଡି-ବିଜେପି ମୁହାଁମୁହିଁ, ଭୟରେ ଗାଁ ଛାଡିବାକୁ କହିଲେ ମନୋରଂଜନ ପରିବାର
କନକ ବ୍ୟୁରୋ : ଉପ-ନିର୍ବାଚନ ତାରିଖ ଘୋଷଣା ହେବା ପୂର୍ବରୁ ବିଜେପୁର ଗୁଳିକାଣ୍ଡ ଘଟଣା ଓଡ଼ିଶା ରାଜନୀତିକୁ ସରଗରମ କରିଦେଇଛି । ମୁହାଁମୁହିଁ ସ୍ଥିତିକୁ ଚାଲିଆସିଛନ୍ତି ବିଜେଡି ଓ ବିଜେପି । ଯୁବ ବିଜେପି ନେତାଙ୍କ ଘର ଉପରେ ଆକ୍ରମଣ ପ୍ରତିବାଦରେ ବିଜେପି ସତ୍ୟାଗ୍ରହ କରିଥିବା ବେଳେ ଗୃହ ସଚିବଙ୍କୁ କାର୍ଯ୍ୟାନୁଷ୍ଠାନ ପାଇଁ ଦାବି କରିଛିି । ଆଉ ଏହି ପୁରା ଘଟଣାରେ ସିଧାସଳଖ ବିଜେଡି ନେତା ତଥା ଶ୍ରମମନ୍ତ୍ରୀ ସୁଶାନ୍ତ ସିଂଙ୍କୁ ଦାୟୀ କରିଛି ବିଜେପି । ଜବାବରେ ବିଜେଡି କହିଛି, ମିଛ ଲୋକପ୍ରିୟତା ପାଇଁ ଚେଷ୍ଟା କରୁଛି ଭାରତୀୟ ଜନତା ପାର୍ଟି ।
ଉପ-ନିର୍ବାଚନର ତାରିଖ ଘୋଷଣା ହେବା ପୂର୍ବରୁ ବିଜେପୁରରେ ଗୁଳିକାଣ୍ଡ ଘଟଣା, ବିଜେଡି-ବିଜେପି ମଧ୍ୟରେ ବଢୁଥିବା ତିକ୍ତତାକୁ ଦ୍ୱିଗୁଣିତ କରିଦେଇଛି । ଯୁବ ବିଜେପି ନେତା ମନୋରଂଜନ ମେହେରଙ୍କ ଘର ଉପରେ ହୋଇଥିବା ଗୁଳିକାଣ୍ଡର ପ୍ରତିବାଦରେ ସତ୍ୟାଗ୍ରହକୁ ଓହ୍ଲାଇଛି ବିଜେପି । ଗୁଳିକାଣ୍ଡ ପାଇଁ ସିଧାସଳଖ, ଶ୍ରମ ମନ୍ତ୍ରୀ ସୁଶାନ୍ତଙ୍କୁ ଦାୟୀ କରିବା ସହ ବିଜେଡି ବିରୋଧରେ କରାଯାଇଛି ନାରାବାଜି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଗୁଳିକାଣ୍ଡ ପରେ ବିଜେପି ଯୁବ ମୋର୍ଚ୍ଚାର ମଣ୍ଡଳ ସଭାପତି ଥିବା ମନୋରଂଜନ ମେହେରଙ୍କ ପରିବାର ଲୋକ ଆତଙ୍କିତ ହୋଇଯାଇଛନ୍ତି । ଘଟଣା ପାଇଁ ଭଟଲି ବିଧାୟକ ସୁଶାନ୍ତଙ୍କ ହାତ ଥିବା ଖୋଲାଖୋଲି ଅଭିଯୋଗ କରିଥିବା ବେଳେ ସୁରକ୍ଷା ନମିଳିଲେ ଗାଁ ଛାଡ଼ିବାକୁ ବାଧ୍ୟ ହେବେ ବୋଲି କହିଛନ୍ତି ମନୋରଂଜନ ମେହେରଙ୍କ ବାପା ।
ଆଉ ଏହି ଗୁଳିକାଣ୍ଡ ରାଜନୀତିର ମାହୋଲକୁ ଆହୁରି ସରଗରମ୍ କରିଛି । ରାଜ୍ୟ ବିଜେପି ସଭାପତି ବସନ୍ତପଣ୍ଡାଙ୍କ ନେତୃତ୍ୱରେ ବିଜେପି ପ୍ରତିନିଧି ଦଳ ଗୃହ ସଚିବଙ୍କୁ ସାକ୍ଷାତ କରିବା ସହ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ସୁଶାନ୍ତ ସିଂଙ୍କ ସପକ୍ଷରେ ବିଜେଡି ବାହାରି ଆସିଥିବା ବେଳେ ମିଛ ଲୋକପ୍ରିୟତା ପାଇଁ ବିଜେପି ଚେଷ୍ଟା କରୁଥିବା ବିଜେଡି କହିଛି । କିନ୍ତୁ ବିଜେପି କହୁଛି- ଲୋକପ୍ରିୟତା ଦେଖି ବିଜେଡି ଭୟବୀତ ।
ଆଉ ଏସବୁ ଭିତରେ ଭାରତୀୟ ଜନତା ପାର୍ଟି ୨୦୧୯ ନିର୍ବାଚନ ଏବଂ ବିଜେପୁର ଉପ-ନିର୍ବାଚନ ପାଇଁ ପ୍ରସ୍ତୁତିକୁ ଜୋରଦାର କରଛି । ନୂଆ ଭୋଟରଙ୍କୁ ଟାର୍ଗେଟ୍ କରି ଆରମ୍ଭ କରିବାକୁ ଯାଉଛି କ୍ୟାମ୍ପେନ୍ । ବିଜେଡି-ବିଜେପିର ଏହି ଛକାପଞ୍ଝା ଭିତରେ ଉପ-ନିର୍ବାଚନର ତାରିଖ ଉପରେ ସମସ୍ତଙ୍କ ଉପରେ ନଜର । ଆଉ ନିର୍ବାଚନ ପରେ ହିଁ ଜଣାପଡ଼ିବ-ବିଜେପୁରରେ କାହାର ଅଛି କାହାର ଲୋକପ୍ରିୟତା ?