କନକ ବ୍ୟୁରୋ: ବାଲିପାଟଣା ଥାନା ନିକଟ ଦମକଳ କେନ୍ଦ୍ର ପାଖରେ ଥିବା ସାହୁ ସାହିରେ ଗ୍ୟାସ ଟାଙ୍କି ଫାଟି ସ୍ୱାମୀ ସ୍ତ୍ରୀ ଗୁରୁତର । ନିଆଁରେ ମହିଳାଙ୍କ ଶରୀର ପ୍ରାୟ ୭୦ଭାଗ ପୋଡ଼ିଯାଇଥିବା ବେଳେ ତାଙ୍କୁ ଉଦ୍ଧାର କରିବାକୁ ଯାଇ ତାଙ୍କ ସ୍ୱାମୀ ବି ପୋଡ଼ିହୋଇ ଗୁରୁତର ଆହତ ହୋଇଛନ୍ତି । ବାଲିପାଟଣା ଦମକଳ କେନ୍ଦ୍ରର କର୍ମଚାରୀମାନେ ଉଭୟଙ୍କୁ ଉଦ୍ଧାର କରି ପ୍ରଥମେ ବାଲିପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । କିନ୍ତୁ ସେମାନଙ୍କ ଅବସ୍ଥା ଗୁରୁତର ଥିବାରୁ ପରେ କ୍ୟାପିଟାଲ ହସପିଟାଲକୁ ସ୍ଥାନାନ୍ତରିତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଲକ୍ଷ୍ମୀଧରଙ୍କ ଭଉଣୀ ଝିଲିଲତା ସାହୁଙ୍କ କହିବା ମୁତାବକ ଦିନ ପ୍ରାୟ ୪ଟା ବେଳେ ଗ୍ୟାସ୍ ସିଲିଣ୍ଡରରୁ ଅଗ୍ନିକାଣ୍ଡ ଘଟି ଏଭଳି ଦୁର୍ଘଟଣା ଘଟିଛି । ସେତେବେଳେ ଘରେ ଅନ୍ୟ କେହି ସଦସ୍ୟ ନଥିଲେ । ଅଚାନକ ନିଆଁ ଲାଗି ଭାଇ ଭାଉଜ ଗୁରୁତର ଆହତ ହୋଇଥିଲେ । ଲକ୍ଷ୍ମୀଧର ଖାଉଥିବାବେଳେ ଗ୍ୟାସ୍ ସିଲିଣ୍ଡରରେ ନିଆଁ ଲାଗି ପତ୍ନୀ ବିଜୟିନୀଙ୍କ ଦେହରେ ଲାଗିଯାଇଥିଲା । ନିଆଁରେ ବିଜୟିନୀଙ୍କ ଶରୀର ହୁତୁହୁତୁ ହୋଇ ଜଳୁଥିବା ଦେଖି କିଛି ଉପାୟ ନପାଇ ଲକ୍ଷ୍ମୀଧର ବିଜୟିନୀଙ୍କୁ ଘର ଭିତରୁ ଦାଣ୍ଡକୁ ଭିଡ଼ି ଆଣିଥିଲେ । କିନ୍ତୁ ସେତବେଳକୁ ବିଜୟିନୀଙ୍କ ଦେହରେ ନିଆଁ ପ୍ରବଳ ମାତ୍ରାରେ ଲାଗିଯାଇଥିଲା ।
ଲକ୍ଷ୍ମୀଧର ଦାଣ୍ଡରେ ତାଙ୍କ ଦେହରୁ ନିଆଁକୁ ଲିଭାଇବାକୁ ବହୁ ଉଦ୍ୟମ କରିଥିଲେ । ଯାହାଫଳରେ ସେ ବି ନିଆଁରେ ପୋଡ଼ି ଯାଇଥିଲେ । ବିଜୟିନୀଙ୍କ ବେକ ତଳୁ ପେଟ ପର୍ଯ୍ୟନ୍ତ ଶରୀରର ପ୍ରାୟ ୭୦ଭାଗ ପୋଡ଼ିଯାଇଥିବା ବେଳେ ଲକ୍ଷ୍ମୀଧରଙ୍କ ହାତ ଓ ଦେହର ପ୍ରାୟ ୩୦ ପ୍ରତିଶତ ପୋଡ଼ିଯାଇଛି ।