କନକ ବ୍ୟୁରୋ : ଭଦ୍ରକ ଜିଲ୍ଲାରେ ଅଭାବନୀୟ ଘଟଣା । ଗତ ରବିବାର ଦିନ ଭଦ୍ରକ ଜିଲ୍ଲା ଭଣ୍ଡାରିପୋଖରୀ ବ୍ଲକ ସରପଦା ଗାଁରେ ଥିବା ଜଗନ୍ନାଥ ମନ୍ଦିରରେ ନିଆଁ ଲାଗିଯାଇଥିଲା । ନିଆଁ ଲାଗିବା ଫଳରେ ମନ୍ଦିରରେ ପୂଜା ପାଉଥିବା ତିନି ବିଗ୍ରହ ଜଳିଯାଇଛନ୍ତି । ଚତୁର୍ଦ୍ଧାମୂର୍ତ୍ତିଙ୍କ ଦେହରେ ନିଆଁ ଲାଗିବା ଘଟଣା ସାରା ଓଡିଶାକୁ ଆଶ୍ଚର୍ଯ୍ୟ କରିଦେଇଛି । ମନ୍ଦିରକୁ ଏବେ ବନ୍ଦ ରଖାଯାଇଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ପ୍ରତିଦିନ ଭଳି ରବିବାର ଦିନ ମଧ୍ୟ ମହାପ୍ରଭୁଙ୍କର ନୀତି ନିୟମ ଅନୁଯାୟୀ ପୂଜାର୍ଚ୍ଚନା ଶେଷ ହେବା ପରେ ମନ୍ଦିର ପହଡ ପଡିଥିଲା । ପହଡ କାର୍ଯ୍ୟ ସରିବା ପରେ ପୂଜକ ମନ୍ଦିର ବନ୍ଦ କରି ବାହାରକୁ ଯାଇଥିଲେ । ତେବେ ଗ୍ରାମବାସୀଙ୍କ କହିବା ଅନୁଯାୟୀ, ମନ୍ଦିର ବନ୍ଦ ଥିବା ସମୟରେ ମନ୍ଦିର ଭିତରେ ମହାପ୍ରଭୁଙ୍କ ନିକଟରେ ଧୂପ ଏବଂ ଦୀପ ଲାଗିଥିଲା । ନିଆଁ ଲାଗିବାର କାରଣ ଅସ୍ପଷ୍ଟ ରହିଥିବା ବେଳେ ଧୂପ କିମ୍ବା ଦୀପରୁ ହିଁ ନିଆଁ ଲାଗିଥିବା ଗ୍ରାମବାସୀମାନେ ସନ୍ଦେହ କରୁଥିବା କହିଛନ୍ତି ।
ତେବେ ଅପରାହ୍ନରେ ପୂଜକ ଜଣଙ୍କ ମନ୍ଦିରକୁ ଫେରିବା ପରେ ମହାପ୍ରଭୁଙ୍କ ଦେହରେ ନିଆଁ ଲାଗିଯାଇଥିବା ଜାଣିବାକୁ ପାଇଥିଲେ । ଚତୁର୍ଦ୍ଧାମୂର୍ତ୍ତିଙ୍କ ଦେହରେ ନିଆଁ ଲାଗିବା ଘଟଣା ଜଣାପଡିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା । ଗ୍ରାମବାସୀମାନେ କାମ ଛାଡି ମନ୍ଦିର ନିକଟକୁ ଧାଇଁ ଆସିଥିଲେ । ଶହ ଶହ ଗ୍ରାମବାସୀ ମନ୍ଦିର ନିକଟରେ ଏକାଠି ହୋଇଥିଲେ । ତେବେ ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଛି । ମନ୍ଦିରକୁ ଏବେ ବନ୍ଦ ରଖାଯାଇଥିବା ବେଳେ ବଡ ଠାକୁରଙ୍କୁ ଢଙ୍କା ହୋଇ ରଖାଯାଇଛି । ମନ୍ଦିର ପୂଜକ ଆଜି ପୁରୀ ଶ୍ରୀମନ୍ଦିର ଯାଇଛନ୍ତି । ସେଠାରେ ଘଟଣା ସମ୍ପର୍କରେ ସବିଶେଷ ଆଲୋଚନା କରିବେ । କିଭଳି ପୁଣି ଚତୁର୍ଦ୍ଧାମୂର୍ତ୍ତିଙ୍କର ନୀତିନିୟମ ଅନୁଯାୟୀ ପୂଜାର୍ଚ୍ଚନା କରାଯିବ ସେନେଇ ନିଷ୍ପତ୍ତି ନିଆଯିବ ।