ବିଜେଡି ବିଜେପିର କୁନ୍ଦୁଲି କଳି! ଧର୍ମେନ୍ଦ୍ର କହିଲେ, ନ୍ୟାୟିକ ତଦନ୍ତ ଗପକାହାଣୀ । ବିଜେଡି କହିଲା, କେନ୍ଦ୍ର ଗୃହ ବିଭାଗକୁ ନେଇ କରାନ୍ତୁ ତଦନ୍ତ
କନକ ବ୍ୟୁରୋ : କୁନ୍ଦୁଲି ପୀଡିତାଙ୍କ ଗଣଦୁଷ୍କର୍ମ ଓ ଆତ୍ମହତ୍ୟା ଘଟଣାରେ ବିଚାରବିଭାଗୀୟ ତଦନ୍ତ ଚାଲିଥିବା ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ବିଚାର ବିଭାଗୀୟ ତଦନ୍ତ ଏକ ଗପ କାହାଣୀ । ଏଥିରୁ କିଛି ମିଳିବନାହିଁ । ପୀଡିତାଙ୍କ ଗଣମାଧ୍ୟମରେ ବୟାନ ସବୁଠାରୁ ବଡ ପ୍ରମାଣ ବୋଲି ଧର୍ମେନ୍ଦ୍ର ଆଜି ଏକ ସାମ୍ବାଦିକ ସମ୍ମିଳନୀରେ କହି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ୍ କରିଛନ୍ତି । ସେପଟେ ବିଜେଡି ଧର୍ମେନ୍ଦ୍ରଙ୍କ ଅଭିଯୋଗର ଜବାବ ରଖିଛି ।
Kanak News is now on WhatsApp
Join and get latest news updates delivered to you via WhatsApp
ଧର୍ମେନ୍ଦ୍ର ରାଜ୍ୟ ସରକାରଙ୍କୁ ଟାର୍ଗେଟ କରିବା ସହ କୁନ୍ଦୁଲି ଘଟଣାରେ କଣ ପାଇଁ ଚୁପ ବସିଛନ୍ତି ବୋଲି ପ୍ରଶ୍ନ କରିଛି । ଏହାଛଡା ରାଜ୍ୟ ସରକାର ଯେଉଁ ସବୁ ଘଟଣାରେ ବିଚାର ବିଭାଗୀୟ ତଦନ୍ତ କରିଛନ୍ତି ତାହାର ରିପୋର୍ଟ କୁଆଡେ ଗଲା ବୋଲି ପ୍ରଶ୍ନ କରିଛନ୍ତି ଧର୍ମେନ୍ଦ୍ର । ଏହାର ଜବାବରେ ବିଜେଡି କହିଛି ଲୋକଙ୍କୁ ବିଭ୍ରାନ୍ତ କରିବା ପାଇଁ ବିଜେପି ବାରମ୍ବାର ଏଭଳି ସାମ୍ବାଦିକ ସମ୍ବଳନୀ କରୁଛି । ଏହାଛଡା କୁନ୍ଦୁଲି ମାମଲାରେ ଯଦି ବିଜେପି ପାଖରେ କୌଣସି ପ୍ରମାଣ ଅଛି ତେବେ କୋର୍ଟ ନିକଟରେ ତାକୁ ଉପସ୍ଥାପନ ବିଜେପି କରୁ ବୋଲି ବିଜେଡି କହିଛି ।
କୁନ୍ଦୁଲି ଘଟଣାକୁ ନେଇ ରାଜନୀତି ବଢୁଥିବା ବେଳେ ଆଜି କୁନ୍ଦୁଲି ପୀଡିତାଙ୍କ ପରିବାରକୁ ଭେଟିଛନ୍ତି ବିଜେପି କେନ୍ଦ୍ରୀୟ ଟିମ୍ । କେନ୍ଦ୍ର ବିଜେପି ପଠାଇଥିବା ୩ ଜଣିଆ ପ୍ରତିନିଧି ଦଳ ଆଜି କୁନ୍ଦୁଲି ଗସ୍ତ କରି ପୀଡିତାଙ୍କ ପରିବାର ସହ ଘଟଣା ସଂପର୍କରେ ଆଲୋଚନା କରିଛନ୍ତି । ଏହା ସହ କୁନ୍ଦୁଲି ଘଟଣାସ୍ଥଳରେ ସରଜମିନ ତଦନ୍ତ କରିଛନ୍ତି କେନ୍ଦ୍ର ପଠାଇଥିବା ଏହି ପ୍ରତିନିଧି ଦଳ । ଏହି ଟିମ୍ରେ ଅଛନ୍ତି କେନ୍ଦ୍ରୀୟ ନେତ୍ରୀ ସରୋଜ ପାଣ୍ଡେ, ଜ୍ୟୋତି ଧ୍ରୁବେ ଓ ଅଂଜୁ ବାଲା । କେନ୍ଦ୍ରୀୟ ଟିମ୍ ସହ ଓଡିଶା ବିଜେପିର ଏକ ପ୍ରତିନିଧି ଦଳ ମଧ୍ୟ କୁନ୍ଦୁଲିରେ ଅଛନ୍ତି ।