ପୁଲୱାମା ଆକ୍ରମଣ ପରେ ପାକିସ୍ତାନକୁ କୃଷକଙ୍କ କଡ଼ା ଜବାବ ! ସଢ଼ି ଗଲେ ବି ଶତ୍ରୁ ଦେଶକୁ ଟମାଟୋ ବିକ୍ରି ନକରିବା ପାଇଁ ନିଷ୍ପତ୍ତି
କନକ ବ୍ୟୁରୋ : ଜମ୍ମୁ-କଶ୍ମୀର ପୁଲୱାମାରେ ହୋଇଥିବା ଆତଙ୍କବାଦୀ ଆକ୍ରମଣରେ ଦେଶ ୪୦ ବୀରପୁତ୍ରକୁ ହରାଇଛି । ସାରା ଦେଶର ଲୋକ କ୍ରୋଧରେ ଜର୍ଜରିତ ହୋଇଅଛନ୍ତି । ଚାରିଆଡ଼େ ପ୍ରତିଶୋଧର ନିଆଁ । ଦେଶରେ ପାକିସ୍ତାନ ବିରୋଧୀ ନାରା ଜୋର ଧରିଛି । ପାକିସ୍ତାନ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରମ୍ବାର କହୁଛନ୍ତି । ଯବାନଙ୍କ ବଳିଦାନ ବ୍ୟର୍ଥ ଯିବନି, ପାକିସ୍ତାନକୁ ଉଚିତ ଜବାବ ମିଳିବ ବୋଲି ମୋଦି କହୁଛନ୍ତି । ଦେଶର ବିକାଶଧାରା ବରଂ ପଛରେ ଥାଉ ଯବାନଙ୍କ ପ୍ରାଣବଳି ବ୍ୟର୍ଥ ନଯାଉ ବୋଲି ଦାବି କରୁଛନ୍ତି ଜନତା । ସରକାର ମଧ୍ୟ ଇଟାର ଜବାବ ପଥରରେ ଦେବାପାଇଁ ଲାଗି ପଡ଼ିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ସରକାର କେବେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ସେକଥା ସମୟ କହିବ, ଆମ ଦେଶର ମେରୁଦଣ୍ଡ କୁହାଯାଉଥିବା କୃଷକମାନେ କିନ୍ତୁ ପାକିସ୍ତାନକୁ ପାନେ ଚଖାଇବା ପାଇଁ ନିଷ୍ପତ୍ତି ନେଇସାରିଛନ୍ତି । ମଧ୍ୟପ୍ରଦେଶ ଝାବୁଆ ଜିଲ୍ଲାର କୃଷକମାନେ ଜୟ ଜବାନ ଜୟ କିଷାନ ନାରା ଦେଇ ପାକିସ୍ତାନକୁ କଡ଼ା ଯବାବ ଦେଇଛନ୍ତି । ଜିଲ୍ଲାର କୃଷକମାନେ ପାକିସ୍ତାନକୁ ଟମାଟୋ ପଠାଇବା ପାଇଁ ମନା କରିଦେଇଛନ୍ତି । ତେବେ ଏହି ନିଷ୍ପତ୍ତିି ପରେ କୃଷକମାନଙ୍କୁ ଅନେକ କ୍ଷତି ସହିବା ପାଇଁ ପଡ଼ିବ । ଏହାସତ୍ୱେ ଦେଶ ପାଇଁ କ୍ଷତି ସହିବା ପାଇଁ ପ୍ରସ୍ତୁତ କୃଷକ ।
ଝାବୁଆ ଜିଲ୍ଲାରେ ପେଟଲାବଦରେ ରପ୍ତାନୀ ହେଉଥିବା ଟମାଟୋ ଚାଷ କରାଯାଏ । ପାକିସ୍ତାନରେ ଝାବୁଆ ଜିଲ୍ଲା ଟମାଟୋର ଚାହିଦା ରହିଛି । ଆଉ ପେଟଲାବଦର କୃଷକମାନେ ଟମାଟୋ ଚାଷ ଉପରେ ପୁରାପୁରି ନିର୍ଭରଶୀଳ । ହେଲେ କୃଷକମାନେ ଏବେ ଲାଭ ନଦେଖି ପାକିସ୍ତାନକୁ ଟମାଟୋ ପଠାଇବା ପାଇଁ ମନାକରିଦେଇଛନ୍ତି । ଦେଶଭକ୍ତିକୁ ଅଧିକ ମହତ୍ୱ ଦେଇଛନ୍ତି ପେଟଲାବଦ କୃଷକ । ସ୍ଥାନୀୟ ବଜାରରେ ଟମାଟୋ ବିକ୍ରୀ କଲେ ସେମାନଙ୍କୁ ୧୦ଟଙ୍କା ମିଳେ କିନ୍ତୁ ପାକିସ୍ତାନକୁ ରପ୍ତାନୀ କରିବା ଦ୍ୱାରା ସେମାନଙ୍କୁ କିଲୋ ପ୍ରତି ୪୦ ଟଙ୍କା ମିଳେ । କୃଷକମାନେ କ୍ଷତି ସହିବାକୁ ପ୍ରସ୍ତୁତ ଅଛନ୍ତି କିନ୍ତୁ ପାକିସ୍ତାନକୁ ଟମାଟୋ ଦେବାକୁ ପ୍ରସ୍ତୁତ ନାହାଁନ୍ତି ।