ଚାଷୀଙ୍କ ପାଇଁ ନବୀନଙ୍କ ପ୍ରତିଶୃତି । ସରକାରକୁ ଆସିଲେ ପ୍ରଥମ ଦିନରେ ହିଁ ମିଳିବ କାଳିଆ ଟଙ୍କା,କେହି ଜଣେ ବି ଚାଷୀ ପଡିବେନି ବାଦ୍ ।
କନକ ବ୍ୟୁରୋ : ଜୟପୁର ନିର୍ବାଚନୀ ସଭାରେ ବିରୋଧୀଙ୍କୁ ପୁଣିଥରେ ଟାର୍ଗେଟ କରିଛନ୍ତି ବିଜେଡି ସୁପ୍ରିମୋ । ଏହାସହ ବିଜେଡି ଇସ୍ତାହାର ପତ୍ରର ପ୍ରଥମ କାର୍ଡ ଖୋଲିଛନ୍ତି ନବୀନ । ବିଜେଡି ନିଜ ଇସ୍ତାହାର ପତ୍ରରେ ଚାଷୀ କଲ୍ୟାଣକୁ ଏକ ନମ୍ବରରେ ରଖିଥିବା କହିଛନ୍ତି ଦଳପତି । କାଳିଆ ଯୋଜନାରେ ଏପର୍ଯ୍ୟନ୍ତ ୪୦ ଲକ୍ଷ ଚାଷୀ ଫାଇଦା ପାଇଥିବା ବେଳେ ଆହୁରି ୨୫ ଲକ୍ଷ ଚାଷୀଙ୍କ ତାଲିକା ପ୍ରସ୍ତୁତ ହୋଇଛି । ସବୁ ଚାଷୀ କାଳିଆ ଯୋଜନାର ଫାଇଦା ପାଇବେ । ଗୋଟିଏ ବି ଚାଷୀ ଏହି ଯୋଜନାରୁ ବାଦ ପଡିବେ ନାହିଁ ବୋଲି କହିଛନ୍ତି ନବୀନ ।
Kanak News is now on WhatsApp
Join and get latest news updates delivered to you via WhatsApp
ଏହାଛଡା ସରକାରକୁ ଆସିବାର ପ୍ରଥମ ଦିନରେ ହିଁ ବାକି ଥିବା ୨୫ ଲକ୍ଷ ଚାଷୀ କାଳିଆ ଯୋଜନାର ୨ଟି କିସ୍ତିର ୧୦ ହଜାର ଟଙ୍କା ଏକାଥରକେ ପାଇବେ । ଏଭଳି କହି କୃଷକଙ୍କ ମନ ଜିଣିବା ପାଇଁ ପ୍ରୟାସ କରିଛନ୍ତି ନବୀନ । ଏହାଛଡା ବିରୋଧୀଙ୍କୁ ଟାର୍ଗେଟ କରିବାକୁ ଯାଇ ନବୀନ କହିଛନ୍ତି, ଫାଇଲିନ, ହୁଡହୁଡ, ତିତିଲି ବେଳେ ଆସିଲେ ନାହିଁ କିନ୍ତୁ ଭୋଟବେଳକୁ ଚାଲି ଆସିଲେ । ବିଜେପିର ନେତା ମାନେ କୁମ୍ଭୀର କାନ୍ଦଣା କାନ୍ଦୁଛନ୍ତି । ଏପରିକି ପ୍ରାକୃତିକ ବିପର୍ଯ୍ୟୟ ବେଳେ କାହିଁକି ସାହାଯ୍ୟ କରିବା ପରିବର୍ତ୍ତେ ରାଜ୍ୟକୁ ଅଣଦେଖା କରାଯାଉଛି । କାହିଁକି ପ୍ରାକୃତିକ ବିପର୍ଯ୍ୟୟ ବେଳେ ଓଡିଶାକୁ ସାହାଯ୍ୟ ମିଳୁନାହିଁ ତାହାକୁ ନେଇ କେନ୍ଦ୍ର ସରକାରଙ୍କୁ ତେରଛା ବାଣ ମାରିଛନ୍ତି ନବୀନ ।
ନିର୍ବାଚନ ବେଳେ ସମସ୍ତେ ବଡ ବଡ କଥା କହିବେ କିନ୍ତୁ ନିର୍ବାଚନ ସରିବା ପରେ କାହାର ଦେଖା ମିଳିବ ନାହଁଁ କହିବା ସହ ଉଭୟ କଂଗ୍ରେସ ଓ ବିଜେପିକୁ ଟାର୍ଗେଟ କରିଛନ୍ତି ନବୀନ । କିନ୍ତୁ ବିଜେଡି ସରକାର ଜନ୍ମରୁ ମୃତ୍ୟୁ ପର୍ଯ୍ୟନ୍ତ ଲୋକଙ୍କ ସହ ରହିଛି । ଏହାସହ ତାଙ୍କୁ ପୁଣିଥରେ ଆର୍ଶୀବାଦ କରିବା ସହ ଶଙ୍ଖ ଚିହ୍ନରେ ଭୋଟ ଦେବାକୁ ଭୋଟରକୁ ନିବେଦନ କରିଛନ୍ତି ।
ଗୋଟିଏ ପଟେ ସରକାରକୁ ଆସିଲେ ପ୍ରଥମ ଦିନରେ କାଳିଆ ଯୋଜନାର ୨ଟି କିସ୍ତି ଟଙ୍କା ଚାଷୀଙ୍କୁ ମିଳିବ ବୋଲି ନବୀନ ଘୋଷଣା କରିଥିବା ବେଳେ ଅନ୍ୟପଟେ ବିଜେଡିର ଏକ ଟିମ୍ କାଳିଆ ଟଙ୍କା ବନ୍ଦ ନ କରିବାକୁ ନିର୍ବାଚନ କମିଶନଙ୍କୁ ଭେଟିଛନ୍ତି ।