ଚାଷ ଜମି ଜାଳି ଦେଉଛନ୍ତି ଚାଷୀ ! କାହିଁକି ଉଜୁଡ଼ି ଯାଉଛି ଶହ ଶହ ଏକର ଜମି ?
ପୋକ ଲାଗି ଫସଲ ନଷ୍ଟ ହୋଇଯିବାରୁ ହତାଶ ହୋଇ ନିଜ ଜମିରେ ନିଆଁ ଲଗାଇ ଦେଇଛି ଚାଷୀ ।
କନକ ବ୍ୟୁରୋ: ରାଜ୍ୟରେ ଏବେ ଚାଷୀ କୂଳ ହତାଶ । ଜଳି ଯାଉଛି ଶହ ଶହ ଏକର ଜମି । କଳାହାଣ୍ଡି, ବରଗଡ଼, କୋରାପୁଟ, ସମ୍ବଲପୁର, ରାୟଗଡ଼ା ଭଳି ଅନେକ ଜିଲ୍ଲାରେ ଏବେ ଚାଷ ଜମିରେ ଲାଗୁଛି ନିଆଁ । ଆଉ ଚାଷ ଜମି ଜାଳିଦେଉଛନ୍ତି ଚାଷୀ । ପୋକ ଲାଗି ଫସଲ ନଷ୍ଟ ହୋଇଯିବାରୁ ହତାଶ ହୋଇ ନିଜ ଜମିରେ ନିଆଁ ଲଗାଇ ଦେଇଛି ଚାଷୀ । ଗତକାଲି କୋରାପୁଟ ଜିଲ୍ଲାରେ ପୁଣି ଚକଡ଼ା ଉଜାଡ଼ି ଦେଇଛି ଫସଲ। ଚାଷୀ ଏଭଳି କ୍ଷତିଗ୍ରସ୍ତ ହୋଇଛନ୍ତି ଯେ, ଅମଳ କରିବା ପରିବର୍ତେ ଫସଲରେ ନିଆଁ ଲଗାଇ ପାଉଁଶ କରି ଦେଇଛନ୍ତି। ବ୍ଲକର ଫୁଫୁଗାଁ, ଡଙ୍ଗରପାଉଁଶି, ଶୁଣ୍ଡିଗୁଡା ଓ ଯୁଡାପାତ୍ରପୁଟ ଗାଁର ପ୍ରାୟ ୧୫୦ ଏକର ଜମିରେ ଚାଷୀ ନିଆଁ ଲଗାଇ ପ୍ରତିବାଦ ଜଣାଇଛନ୍ତି।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଗତ କିଛିଦିନ ତଳେ ବରଗଡ କଳାପାଣି ପଂଚାୟତରେ ଏକର ଏକର ଜମିରେ ଚାଷୀ ନିଆଁ ଲଗାଇଦେଇଥିବା ଘଟଣା ସମ୍ନାକୁ ଆସିଥିଲା । ପୂର୍ବରୁ ଜମିରେ ଚକଡା ପୋକ ଲାଗି ଫସଲ ନଷ୍ଟ ହୋଇଯାଇଥିଲା। ଜୀବନ ଓ ଜୀବିକା ପାଇଁ ଦୁଇ ଦୁଇ ଥର ଆନ୍ଦୋଳନକୁ ଓହ୍ଲାଇଥିଲେ ଚାଷୀ ମାନେ । ଗତ ୪ତାରିଖରେ ଜିଲ୍ଲାପାଳଙ୍କ ଅଫିସ ଆଗରେ ଆନ୍ଦୋଳନ କରିଥିଲେ । ତେବେ କଳାପାଣି ଅଂଚଳର ଚାଷୀ ସାଂଘାତିକ ଅଭିଯୋଗ କରିଛନ୍ତି । ସରକାରଙ୍କ ଦ୍ୱାରା ବିକ୍ରି କରାଯାଉଥିବା ପୋକମରା ଔଷଧ ନିମ୍ନମାନର ବୋଲି ଚାଷୀ ମାନେ କହିଛନ୍ତି । ଏକର ଜମିରେ ଏକ ଲିଟର ଔଷଧ ପକା ଯାଇଥାଏ । କିନ୍ତୁ ସରକାର ଦେଉଥିବା ଔଷଧ ଏକ ଲିଟର ପକାଇଲେ ବି ଫସଲରେ ପୋକ ଲାଗୁଥିଲେ । ତେବେ ଚାଷୀଙ୍କ ଦାବି ପ୍ରତି କେହି କର୍ଣ୍ଣପାତ ନକରିବାରୁ ବାଧ୍ୟହୋଇ ଏପରି କଲେ ବୋଲି ଚାଷୀମାନେ ଅଭିଯୋଗ କରିଛନ୍ତି ।
ଚକଡ଼ା ପୋକ ଯୋଗୁଁ ରାଜ୍ୟରେ ଏବେ ଚାଷୀକୂଳ ହତାଶ । ସେପଟେ କୃଷି ବିଭାଗ ନକଲି କୀଟନାଶକ ବେପାରୀଙ୍କ ସହ ହାତ ମିଳାଇଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି । ଫସଲକୁ ଗୁଣ୍ଡିପୋକ ଓ ଚକଡ଼ା ଦାଉରୁ ସୁରକ୍ଷିତ ରଖିବା ପାଇଁ ରୋଗ ପ୍ରତିରୋଧ ଭେରାଇଟର କୀଟନାଶକ ଅଛି କିନ୍ତୁ ରାଜ୍ୟ ସରକାର ଚାଷୀଙ୍କୁ ଏହି କୀଟନାଶକ ଦେଉ ନାହାନ୍ତି ବୋଲି ଅଭିଯୋଗ ହୋଇଛି । ସେହିପରି କଂଗ୍ରେସର ଅଭିଯୋଗ, ୨୦୦୦ ମସିହାରୁ ଏଯାବତ୍ ଏସପିଟିଏଲ ପକ୍ଷରୁ ପରୀକ୍ଷାରେ ଧରାପଡ଼ିବା ପରେ କୃଷି ବିଭାଗ ପକ୍ଷରୁ ନକଲି କୀଟନାଶକ ବିକୁଥିବା କମ୍ପାନୀ ମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ । ଏହାସହ ତାମିଲନାଡୁରେ ଫସଲ ରୋଗ ଓ କୀଟନାଶକ ପରୀକ୍ଷା ପାଇଁ ୧୫ଟି ଓ ଆନ୍ଧ୍ରପ୍ରଦେଶରେ ୭ଟି ଏସପିଟିଏଲ ଥିବାବେଳେ ଓଡ଼ିଶାରେ ମାତ୍ର ଗୋଟିଏ କାହାଁକି ବୋଲି ପ୍ରଶ୍ନ କରିଛି କଂଗ୍ରେସ ।