ଚର୍ଚ୍ଚାରେ ଦେବୀ ଦୁର୍ଗାଙ୍କ ୨୨ କିଲୋର ସୁନା ଶାଢୀ ! କୋଲକତା ଦୁର୍ଗା ପୂଜା ପେଣ୍ଡାଲରେ ଲଣ୍ଡନ ଥିମ୍
କନକ ବ୍ୟୁରୋ : ପ୍ରତିବର୍ଷ ଦୁର୍ଗାପୂଜାକୁ ନେଇ କୋଲକତାରେ ଏକ ସ୍ୱତନ୍ତ୍ର ବାତାବରଣ ଦେଖିବାକୁ ମିଳେ । ଆଉ ଏଠାରେ ବିଭିନ୍ନ ଅନୁଷ୍ଠାନ ତରଫରୁ ନିର୍ମିତ ପୂଜାମଣ୍ଡପ ଖୁବ୍ ଆକର୍ଷଣୀୟ ହୋଇଥାଏ । ଯାହା କି ପ୍ରସିଦ୍ଧି ଲାଭ କରେ । ଏହି ଅବସରରେ କୋଲକତାର ପୂଜାରେ ମା’ ଦୁର୍ଗାଙ୍କର ୨୨କିଲୋ ସୁନାର ଶାଢୀକୁ ନେଇ ମାହୋଲ ପୁରା ଚର୍ଚ୍ଚାରେ । କୋଲକତା ଦୁର୍ଗା ପୂଜା ପେଣ୍ଡାଲରେ ଲଣ୍ଡନ ଥିମ । ବକିଙ୍ଘମ ପ୍ୟାଲେସ, ବିଗ୍ ବେନ ଓ ଲଣ୍ଡନ ବ୍ରିଜର ପ୍ରତିକୃତି, କୋଲକତା ଦୁର୍ଗା ପୂଜାକୁ ବେଶ ଆକର୍ଷଣୀୟ କରିଛି । କୋଲକତାର ସନ୍ତୋଷ ମିତ୍ରା ସ୍କୋୟାରର ଏହି ପୂଜା ପଣ୍ଡାଲ ଦେଖିବାକୁ ମିଳିଛି । ଏହି ପଣ୍ଡାଲରେ ପୂଜା ପାଉଥିବା ମା’ ଦୁର୍ଗାଙ୍କୁ ୨୨କେଜି ଓଜନର ସୁନାରେ ନିର୍ମିତ ଶାଢୀ ପିନ୍ଧାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୁନା ଜରିରେ ଏମ୍ବ୍ରୋଏଡାରୀରେ ଏହି ସୁନ୍ଦର ଶାଢୀକୁ ଦୀର୍ଘ ୨ମାସ ଧରି ତିଆରି କରିଛନ୍ତି ଡିଜାଇନର ଅଗ୍ନିମିତ୍ର ପଲ ଓ ୫୦ଜଣ କାରିଗର । ୨୨କ୍ୟାରେଟ ସୁନାରେ ନିିର୍ମିତ ହୋଇଛି ଏହି ଶାଢୀ । ସନ୍ତୋଷ ମିତ୍ରା ସ୍କୋୟାର ପୂଜା ମଣ୍ଡପର ୮୨ତମ ବର୍ଷ ପୂର୍ତି ଅବସରରେ କିଛି ଭିନ୍ନ କରିବାକୁ ଯାଇ ସୁନାରେ ନିର୍ମିତ ଶାଢୀ ମା’ ଦୁର୍ଗାଙ୍କ ପାଇଁ ତିଆରି କରିବାକୁ ଯୋଜନା କରିଥିଲେ କମିଟି ସଦସ୍ୟ । ଏହି ଶାଢୀ ପାଇଁ ପ୍ରାୟ ୬କୋଟି ୫୦ଲକ୍ଷ ଟଙ୍କା ଖର୍ଚ୍ଚ କରାଯାଇଛି । ଏହି ପୂଜା ପେଣ୍ଡାଲ ଏବେ କୋଲକାତାବାସୀଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି ।
ସେହିପରି କୋଲକତାର ଆଉ ଏକ ପୂଜା ପେଣ୍ଡାଲ ଏବେ ଚର୍ଚ୍ଚାରେ । କୋଲକତାରେ ଲେକ୍ ଟାଉନ ନିକଟରେ ଶ୍ରୀଭୂମି ସ୍ପୋଟିଂ କ୍ଲବ୍ ଏହି ଭବ୍ୟ ପେଣ୍ଡାଲକୁ ତିଆରି କରିଛନ୍ତି । କ୍ଲବ୍ ର ସଚିବ ଡିକେ ଗୋସ୍ୱାମୀ କହିଛନ୍ତି ବିଶ୍ୱ ସାରା ଫିଲ୍ମ ବାହୁବଳୀକୁ ମିଳିଥିବା ପବ୍ଲିସିଟିକୁ ଦେଖି ଆମେ ଏହି ଥିମ୍ କୁ ନେଇ ପେଣ୍ଡାଲ ତିଆରି କରିଥିଲୁ । ଏହି ପେଣ୍ଡାଲ ଶୁକ୍ରବାର ଠାରୁ ଭକ୍ତଙ୍କ ପାଇଁ ଖୋଲାଯିବ । ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହାକୁ ଦେଶର ସବୁଠୁ ମହଙ୍ଗା ପେଣ୍ଡାଲ୍ ହେବାର ଘୋଷଣା କରିଛନ୍ତି । ୧୫୦ ଜଣ କାରିଗର ୩ ମାସର ସମୟ ଅବଧିରେ ଏହି ମାହିଷ୍ମତି ପେଣ୍ଡାଲକୁ ତିଆରିକରିଛନ୍ତି ।
ସୁନାରେ ଚମକୁଥିବା ମାହିଷ୍ମତି ମହଲ ପେଣ୍ଡାଲରେ ମୁଖ୍ୟ ଦ୍ୱାରାରେ ଶୁଣ୍ଢ ଟେକିଥିବାର ଦୁଇଟି ହାତୀ ନିର୍ମିତ ହୋଇଛି । ପେଣ୍ଡାଲର କିଛି ଆଗରେ ୮ଟି କବାଟ ରହିଛି । ମହଲର ଭିତରେ ପ୍ରବେଶ କରିବା ପରେ ଏକ ବଡ ଝୁମର ଓ ମା’ଙ୍କର ସୁନା ଚାନ୍ଦି ଓ ହୀରାରେ ସଜ୍ଜିତ ମା’ ଦୁର୍ଗାଙ୍କ ପ୍ରତିମା ରହିଛି । ୧୧୦ ଫୁଟ ଉଚ୍ଚତାର ଏହି ମୂର୍ତ୍ତୀକୁ ୩୦୦ ଯବାନ ସୁରକ୍ଷା ଦେଉଛନ୍ତି ।
ଦୁର୍ଗାପୂଜାକୁ ନେଇ ସାରା ଦେଶରେ କୋଲକତା ନିଜର ଏକ ଭିନ୍ନ ପରିଚୟ ରଖିଥାଏ । ଯାହା ଏହାର ପୂଜା ପେଣ୍ଡାଲମାନଙ୍କରୁ ଜଣାପଡେ । ଆଉ ବର୍ଷକୁ ବର୍ଷ ପ୍ରତିଯୋଗୀତାର ସହ ଏହାକୁ ବିଭିନ୍ନ ପୂଜା କମିଟିମାନେ ପାଳନ କରୁଛନ୍ତି । ଏବେ ଏହାର ଏକ ନମୂନା ‘ମାହିଷ୍ମତି ମହଲ’ ପେଣ୍ଡାଲ । ବାହୁବଳୀ ଫିଲ୍ମର ଏହି ମହଲର ଝଲକକୁ ଭକ୍ତମାନେ ଏହିବର୍ଷ ପଶ୍ଚମବଙ୍ଗର ଏହି ପେଣ୍ଡାଲରେ ଦେଖିବାକୁ ପାଇବେ ।