ନୂଆପଡା : ମଣ୍ଡିରେ ଧାନ ବିକ୍ରି କରିବାରୁ ପରିବାର ଲୋକ ବାସନ୍ଦ
କନକ ବ୍ୟୁରୋ : ମଣ୍ଡିରେ ଧାନ ବିକ୍ରି କରିବାରୁ ପରିବାର ଲୋକ ବାସନ୍ଦ । ଏମିତି ଏକ ଅଭାବନୀୟ ଘଟଣା ଘଟିଛି ନୂଆପଡା ଜିଲ୍ଲା ସଦର ବ୍ଲକ ବେଲଟୁକୁରୀ ଥାନା ଅନ୍ତର୍ଗତ ଭାନପୁର ଗାଁରେ । ସୂଚନା ଅନୁସାରେ ବ୍ରିଜଲାଲ ରଣା ନାମକ ଜଣେ ଚାଷୀ ମଣ୍ଡିରେ ଦାନ ବିକ୍ରି କରିଥିଲେ । ଚଳିତ ବର୍ଷ ନିଜ ନାମରେ ଥିବା ୬ ଏକର ଜମି ସହ ପରିବାର ସଦସ୍ୟଙ୍କ ନାମରେ ଥିବା ପାଖାପାଖି ୧୦ ଏକର ଜମି ଓ ଭାଗ ଚାଷ ଭାବରେ ପାଖାପାଖି ୪ ଏକର , ଏମିତି ୨୦ ଏକରରୁ ଉଦ୍ଧ୍ୱର୍ ଜମି ଚଳିତ ବର୍ଷ ଚାଷ କରିଥିଲେ ବ୍ରିଜଲାଲ । ଚଳିତ ବର୍ଷ ସ୍ୱଳ୍ପ ବୃଷ୍ଟିପାତ ସାଂଗକୁ ରୋଗ ପୋକ ଦାଉ ସାଧିଥିଲା । ଏଥିଯୋଗୁଁ ଧାନ ଅମଳ କମିଯାଇଥିଲା । ୨୦ ଏକର ଜମିରେ ଚାଷ କରିବା ସତ୍ୱେ ମାତ୍ର ୧୫୦ ବସ୍ତା ଧାନ ପାଇଥିଲେ ବ୍ରିଜଲାଲ୍ ।
Kanak News is now on WhatsApp
Join and get latest news updates delivered to you via WhatsApp
ଶତ ପ୍ରତିଶତ ସବସିଡି ପାଇବା ଆଶାରେ ଭାନପୁର ଗାଁ ଲୋକେ ମଣ୍ଡିରେ ଧାନ ବିକିବା ସମସ୍ତଙ୍କୁ ତାଗିତ କରିଥିଲେ । ଉଚିତ ମୂଲ୍ୟ ପାଇବା ଆଶାରେ ସ୍ଥାନୀୟ କୁଲିଆବନ୍ଧା ମଣ୍ଡିରେ ବ୍ରିଜଲାଲ ଧାନ ବିକ୍ରି କରିଥିଲେ । ପାଖାପାଖି ୪୬.୨୦ କ୍ୱିଣ୍ଟାଲ ଧାନ ବିକ୍ରି କରିଛନ୍ତି ବ୍ରିଜଲାଲ । ତେବେ ଗାଁ ଲୋକେ ଏଥିରେ ଖପ୍ପା ହୋଇ ତାଙ୍କ ପରିବାରକୁ ଗାଁରୁ ବାସନ୍ଦ କରିଛନ୍ତି । ଗୁରୁବାର ରାତିରେ ଗାଁ ମୁଖିଆଙ୍କ ଦ୍ୱାରା ଗାଁରେ ଏକ ବୈଠକ ବସିଥିଲା । ଗାଁ ଲୋକଙ୍କ ବିରୋଧରେ ଯାଇ ବ୍ରିଜଲାଲ ଧାନ ବିକ୍ରି କରିଥିବାରୁ ଆର୍ଥିକ ଦଣ୍ଡ ସହ ସାମାଜିକ ବାସନ୍ଦ କରିବା ପାଇଁ ବୈଠକରେ ସ୍ଥିର ହୋଇଥିଲା । ଏହା ବ୍ୟତୀତ ଗାଁ ବୈଠକରେ ହୋଇଥିବା ନିଷ୍ପତ୍ତି ନମାନିଲେ ଓ ବ୍ରିଜଲାଲଙ୍କ ପରିବାର ସହ କେହି କଥାହେଲେ ୫୦୦୧ ଜୋରିମାନା ଦେବାକୁ ପଡ଼ିବ ବୋଲି ଚୌକିଦାର ଗାଁ ଦାଣ୍ଡରେ ବୁଲି ବୁଲି ଚେତାବନୀ ଦେଇଥିଲେ ।
ଏବେ ଗାଁରୁ ବାସନ୍ଦ ହୋଇଛନ୍ତି ବ୍ରିଜଲାଲଙ୍କ ପୁରା ପରିବାର । ନିଅାଁ ପାଣି ବନ୍ଦ ହେବା ସହ ତାଙ୍କ ପରବାର ସହ କେହି କଥା ମଧ୍ୟ ହେଉ ନାହାନ୍ତି । ଯାହା ଫଳରେ ବ୍ରିଜଲାଲଙ୍କ ପରିବାର ମାନସିକ ଚିନ୍ତାଭାର ସହି ନ ପାରି ଆଜି ଜିଲ୍ଲାପାଳ ଙ୍କୁ ଲିଖିତ ଅଭିଯୋଗ କରିଛନ୍ତି । ଏହାସହିତ ତହସିଲଦାର ଙ୍କୁ ଗୁହାରି କରିଥିଲେ । ସୁଚନା ଅନୁସାରେ ପୂର୍ବ ନିର୍ଦ୍ଧାରିତ ବୈଠକରେ ଅନୁପସ୍ଥିତି ଥିବା ଯୋଗୁଁ ବ୍ରିଜଲାଲ ଧାନ ବିକ୍ରି ନେଇ କିଛି ଜାଣି ନ ଥଲେ । ଏବଂ ଅମଳ ହେବା ପରେ କୁଲିଆବନ୍ଧା ମଣ୍ଡିରେ ବିକ୍ରି କରିଥିଲେ ଧାନ ।
ଏନେଇ ଗ୍ରାମବାସୀମାନେ ୭୫% ସବସିଡି ପାଇବାରୁ ବଂଚିତ ହେଉଥିବାରୁ ବ୍ରିଜଲାଲଙ୍କୁ ଉକ୍ତ ସବସିଡି ପ୍ରଦାନ କଲେ ଗ୍ରାମରେ ସାମିଲ କରିବୁ ବୋଲି ଧମକ ଦେଇଛନ୍ତି । ତେବେ ଏନେଇ ନୂଆପଡା ତହସିଲଦାର ଜୟଶ୍ରୀ ପାଢ଼ୀଙ୍କୁ ପଚାରିବାରୁ ସେ କହିଛନ୍ତି ସବସିଡି ସହିତ ଧାନବିକ୍ରିର କିଛି ସାମଞ୍ଜସ୍ୟ ନାହିଁ । ଯଦି ଧାନବିକ୍ରିକୁ ନେଇ କାହାକୁ ବାସନ୍ଦ କରାଯାଇଛି, ତେବେ ଆମ ପାଖକୁ ଅଭିଯୋଗ ଆସିଲେ ଏହା ତଦନ୍ତ କରାଯିବା ବୋଲି ସେ କହିଛନ୍ତି । ଏହା ବ୍ୟତୀତ ଏହି ସମସ୍ୟାର ସମାଧାନ ପାଇଁ ବ୍ୟବସ୍ଥା କରାଯିବ ବୋଲି ପ୍ରକାଶ କରିଛନ୍ତି ।