ଓଡିଶା ବଜାରରେ ଘୁରିବୁଲୁଛି ଜାଲ ନୋଟ ! ବାରିପଦାରେ ୯୨ ଖଣ୍ଡ ୨ ହଜାର ଟଙ୍କିଆ ନକଲି ନୋଟ ଜବତ କଲା ପୁଲିସ
କନକ ବ୍ୟୁରୋ : ଓଡିଶା ବଜାରରେ ଘୁରି ବୁଲୁଛି ଜାଲ ନୋଟ । ଜାଲ ନୋଟ କାରବାରର ଚେର ପଶ୍ଚିଂମବଙ୍ଗରୁ ଓଡିଶାକୁ ଲମ୍ବିଛି । ବାରିପଦାରୁ ୯୨ ଖଣ୍ଡ ୨ ହଜାର ଟଙ୍କିଆ ନକଲି ନୋଟ ଜବତ କରିବା ସହ ଜଣେ ଅନ୍ତଃରାଜ୍ୟ ଠକକୁ ବାନ୍ଧିଛି ପୁଲିସ । ଜାଲ ନୋଟ କାରବାରର ମାଷ୍ଟର ମାଇଣ୍ଡ କୁହାଯାଉଥିବା ଅଭିଯୁକ୍ତ ଏସ୍.କେ. କାଲିମୁଦିନକୁ ଗିରଫ କରିଛି ମୟୂରଭଂଜ ପୁଲିସ । କାଲିମୁଦିନ୍ ଠାରୁ ଜବତ ହୋଇଥିବା ନୋଟ୍ ଗୁଡିକ ଅବିକଳ ନକଲ ହୋଇଥିବା ବେଳେ ସେଗୁଡିକର ନମ୍ବର ସମାନ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନ ତଳେ ମୟୂରଭଞ୍ଜ ମାଣିଦା ଗାଁରେ ୨ଜଣ ଯୁବକ ଜାଲ୍ ନୋଟ୍ ଦେଇ ତେଜରାତି ଦୋକାନରୁ ସାମଗ୍ରୀ କିଣୁଥିବା ବେଳେ ଧରାପଡିଥିିଲେ । ସେମାନଙ୍କୁ ଜେରା ବେଳେ ଏହି କାରବାରର କିଙ୍ଗପିନ୍ କାଲିମୁଦିନର ନାଁ ସାମ୍ନାକୁ ଆସିଥିଲା । ଆଜି ଠକ ଗ୍ୟାଙ୍ଗର ମାଷ୍ଟର ମାଇଣ୍ଡକୁ ଗିରଫ କରିବା ସହ ଜାଲ ନୋଟ କାରବାରର ଚେର ବାବଦରେ ଜାଣିବାକୁ ପାଇଛି ପୁଲିସ । ଜେରା ସମୟରେ ଏସ୍.କେ. କାଲିମୁଦିନ୍ କହିଛି, ନୋଟ୍ ଗୁଡିକୁ ସେ ପଶ୍ଚିମବଙ୍ଗ ମାଲଦା ଅଂଚଳର ଇସାବ ଅଲ୍ଲୀଙ୍କ ଠାରୁ ୧୦ହଜାର ଟଙ୍କା ଦେଇ ଆଣିଥିଲା । ଏସ୍.କେ. କାଲିମୁଦିମକୁ କୋର୍ଟ ଚାଲାଣ କରିଛି ପୋଲିସ । ଜାଲ ନୋଟ କାରବାରର ଚେରରେ ପହଂଚିବା ପାଇଁ ମୟୂରଭଂଜ ପୁଲିସର ଏକ ସ୍ୱତନ୍ତ୍ର ଟିମ୍ ପଶ୍ଚିମବଙ୍ଗ ମାଲଦା ଅଂଚଳରେ ଚଢାଉ କରିବ ବୋଲି ସୂଚନା ମିଳିଛି ।