ରାଜମହଲ ଛକରେ ପୋଲିସ ଛାଉଣୀ : ଚେକିଂ ସମୟରେ ଉତ୍ତେଜନା, ମୃଦୁ ଲାଠିଚାଳନା କଲା ପୋଲିସ୍
କନକ ବ୍ୟୁରୋ : ରାଜମହଲ ଛକରେ ପୋଲିସ ଛାଉଣୀ । ରାଜଧାନୀ ଭୁବନେଶ୍ୱର ରାଜମହଲ ଛକରେ ଚେକିଂ ସମୟରେ ଉତ୍ତେଜନା ବଳବତ୍ତର ରହିଛି । ପୋଲିସ ଓ ଜନତା ମୁହାଁମୁହିଁ ହୋଇଛନ୍ତି । ଅଢ଼େଇ ଘଂଟା ବିତିଥିବା ବେଳେ ଏବେ ବି ସ୍ଥିତି ନିୟନ୍ତ୍ରଣାଧୀନ ହୋଇନି । ରାଜମହଲ ଛକରେ ଗମନାଗମନ ଠପ୍ ହୋଇଛି । ପୋଲିସ ଜୋରିମାନା ଆଦାୟ କରୁଛନ୍ତି, ହେଲେ ତାଙ୍କ ପାଖରେ କାଗଜପତ୍ର ନାହିଁ କହି ତାତିଛନ୍ତି ଲୋକେ । ପୋଲିସ ବିରୋଧରେ ଲୋକେ ନାରାବାଜି ଆରମ୍ଭ କରିଦେଇଛନ୍ତି । ପୋଲିସ ଉପରେ ଟେକାମାଡ଼ ଆରମ୍ଭ କରିଦେଇଛନ୍ତି । ଟେକାମାଡ଼ରେ ଜଣେ ପୋଲିସ କର୍ମଚାରୀ ଆହତ ହୋଇଛନ୍ତି । ପୋଲିସ କର୍ମଚାରୀଙ୍କ କାନରୁ ରକ୍ତ ବୋହୁଥିବାର ଦୃଶ୍ୟ ଭିଡ଼ିଓରେ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଲୋକଙ୍କ କହିବା କଥା ହେଲା ପୋଲିସ ଗାଡ଼ିର ଚେକିଂ ହେଉ । ପୋଲିସ କର୍ମଚାରୀମାନେ ମଦ୍ୟପାନ କରି ଗାଡ଼ି ଚଳାଉଛନ୍ତି । ସରକାରୀ ଓ ବେସରକାରୀ ଗାଡି ମଧ୍ୟରେ ପାତର ଅନ୍ତର କରାଯାଉଥିବା ଅଭିଯୋଗ କରିଛନ୍ତି । ଫାଇନ ଆଦାୟ କରାଯାଉ କିନ୍ତୁ ଲୋକଙ୍କୁ ହଇରାଣ କରାନଯାଉ । ଅତ୍ୟଧିକ ଫାଇନ୍ ଆଦାୟକୁ ନେଇ ଲୋକଙ୍କ ମନରେ କୁହୁଳୁଥିବା ରାଗ ଆଜି ଦେଖାଯାଇଛି । ଗାଡ଼ିମୋଟର ଚଳାଚଳ ବ୍ୟାହତ ହୋଇଛନ୍ତି । ପୋଲିସ ଆକ୍ରୋଶମୂଳକ ଭାବେ ଜୁଲମ କରୁଛି କହି ଅଭିଯୋଗ ହେଉଛି । ଅନ୍ୟପଟେ ଘଟଣାସ୍ଥଳରେ ପୋଲିସ କମିସନର ପହଞ୍ଚିଛନ୍ତି । ଆଇନକୁ ହାତମୁଠାକୁ ନନେବାକୁ ଅନୁରୋଧ କରିଛନ୍ତି । ନୂଆ ଆଇନ ଆଳରେ ବିପୁଳ ପରିମାଣର ଫାଇନ୍ ଆଦାୟ କରାଯାଉଥିବା ବେଳେ ଏପରି ପରିସ୍ଥିତି ସୃଷ୍ଟି ହୋଇଛି।