ଆରଟିଆଇ ଖୋଲିଲା ଗୁମର, ପଦାରେ ପଡିଲା ଶାସକ ଦଳର ମନ୍ତ୍ରୀ ପୁଅଙ୍କ ଅସଲ ଚେହେରା !
କନକ ବ୍ୟୁରୋ : ମନ୍ତ୍ରୀ ବଦ୍ରୀ ନାରାୟଣ ପାତ୍ରଙ୍କ ପୁଅ ଦେବାଶିଷ ପାତ୍ରଙ୍କ କଳା କାରନାମାର ଗୋଟିଏ ଗୋଟିଏ ଫର୍ଦ୍ଦ ସାମ୍ନାକୁ ଆସିବାରେ ଲାଗିଛି । ଖାଲି ଗୁଣ୍ଡା ଗର୍ଦ୍ଦି ନୁହେଁ ବରଂ ଅନେକ ଦୁର୍ନୀତି ଓ ଚଂଚକତାର ପୁରୋଧା ଥିଲେ ଦେବାଶିଷ । ଯାହା ଆରଟିଆଇ ତଥ୍ୟରୁ ସ୍ପଷ୍ଟ ହେଉଛି । ୨୦୧୨ରୁ ୨୦୧୭ ଯାଏଁ ଘସିପୁରା ବ୍ଲକ୍ ଅଧ୍ୟକ୍ଷ ଥିବା ଦେବାଶିଷ ପାତ୍ର, କିଭଳି ନିଜର କ୍ଷମତାର ଅପବ୍ୟହାର କରିବା ସହ ଆଇନ ଆଖିରେ ଧୁଳି ଦେଇ ଏକାଧିକ କାଜୁ ବାଡିକୁ ନିଜ ଅକ୍ତିଆରକୁ ନେଇଥିଲେ । ଯାହାର ପ୍ରମାଣ ଲାଗିଛି କନକ ନ୍ୟୁଜ୍ ହାତରେ ।
Kanak News is now on WhatsApp
Join and get latest news updates delivered to you via WhatsApp
ଜଣେ ନିର୍ବାଚିତ ଜନ ପ୍ରତିନିଧି କେମିତି ଆଇନର ଆଖିରେ ଧୂଳି ଦେଇ ଖୁଲମଖୁଲା ବେଆଇନ୍ କାର୍ଯ୍ୟରେ ଖୋଦ୍ ଲିପ୍ତ ଥିଲେ ଆରଟିଆଇ ତଥ୍ୟରୁ ତାହା ସ୍ପଷ୍ଟ ବାରି ହୋଇପଡୁଛି । ଆଉ ସେହିଭଳି ଜଣେ ଜନ ପ୍ରତିନିଧି ଜଣକ ହେଉଛନ୍ତି କେନ୍ଦୁଝର ଜିଲ୍ଲା ଘସିପୁରା ବ୍ଳକର ପୂର୍ବତନ ଅଧ୍ୟକ୍ଷ ତଥା ରାଜ୍ୟ ସରକାରଙ୍କ ବରିଷ୍ଠ ମନ୍ତ୍ରୀ ବଦ୍ରୀ ପାତ୍ରଙ୍କ ପୁଅ ଦେବାଶିଷ ପାତ୍ର । ଯିଏ ସେହି ସମୟରେ ବ୍ଲକ୍ ଅଧ୍ୟକ୍ଷ ପଦରେ ଥାଇ ସୁଦ୍ଧା ଏକାଧିକ କାଜୁ ବାଡ଼ିର ଟେଣ୍ଡର ନେଇଥିଲେ । ତାହା ପୁଣି ସିଙ୍ଗିଲ ଟେଣ୍ଡର ଜରିଆରେ ।
ପଂଚାୟତି ରାଜ୍ ଆଇନ୍ ତଥା ଅଫିସ ଅପ୍ ପ୍ରଫିଟ୍ ଆକ୍ଟର ଉଲଂଘନ କରି ଏକାଧିକ କାଜୁ ବାଡିର ଟେଣ୍ଡର ନେଇଥିଲେ ମନ୍ତ୍ରୀଙ୍କ ପୁଅ ଦେବାଶିଷ ପାତ୍ର । ଓଡ଼ିଶା ରାଜ୍ୟ କାଜୁ ଉନ୍ନୟନ ନିଗମରୁ ଆରଟିଆଇ ଜରିଆରେ ମିଳିଥିବା ତଥ୍ୟ ଏହା ସ୍ପଷ୍ଟ କରୁଛି । ଦେବାଶିଷ ପାତ୍ର ବ୍ଲକ୍ ଚେୟାରମ୍ୟାନ୍ ଥିବା ବେଳେ
-୨୦୧୪-୧୫ ଆର୍ଥିକ ବର୍ଷରେ ଗଡ଼ବାନ୍ଧବଗଡ଼, ମଦନପୁର କାଜୁ ବାଡ଼ିକୁ ୫ଲକ୍ଷ ୩୮ ହଜାର ୮ଶହ ଟଙ୍କାରେ ବର୍ଷିକିଆ ଠିକାରେ ନେଇଥିଲେ ।
-୨୦୧୫-୧୬ ଆର୍ଥିକ ବର୍ଷରେ ସେହି ମଦନପୁର କାଜୁ ବାଡ଼ିକୁ ୪ଲକ୍ଷ ୪୧ ହଜାର ଟଙ୍କାରେ ଠିକାରେ ନେଇଥିଲେ ।
ଏତିକିରେ କଥା ସରିନଥିଲା ବରଂ ସେହି ସମାନ ଢ଼ଙ୍ଗରେ ଏକାଧିକ କାଜୁ ବାଡିକୁ ନିଜ କବଜାକୁ ଆଣି ଥିଲେ ମନ୍ତ୍ରୀ ବଦ୍ରିପାତ୍ରଙ୍କ ପୁଅ ଦେବାଶିଷ ପାତ୍ର ।
-୨୦୧୪-୧୫ ଆର୍ଥିକ ବର୍ଷରେ ପୁରୁଣା ମେଘନାଦପୋଇ, କାଜୁ ବାଡ଼ିକୁ ୪ଲକ୍ଷ ୪୦ ହଜାର ୮ଶହ ଟଙ୍କାରେ ଟେଣ୍ଡରରେ ନେଇଥିଲେ
-୨୦୧୫-୧୬ ଆର୍ଥିକ ବର୍ଷରେ ସେଇ ପୁରୁଣା ମେଘନାଦପୋଇ, କାଜୁ ବାଡ଼ିକୁ ୩ଲକ୍ଷ ୩୦ ହଜାର ଟଙ୍କାରେ ଟେଣ୍ଡରରେ ନେଇଥିଲେ ।
ଆଇନର ଆଖିରେ ଆଙ୍ଗୁଠି ଗେଞ୍ଜି କେମିତି ବେଆଇନ କାର୍ଯ୍ୟକୁ ବେଶ ଚତୁରତା ଓ ଚଂଚକତାର ସହ ଚୁଡାନ୍ତ ରୂପ ଦେଉଥିଲେ ଦେବାଶିଷ ପାତ୍ର, ଆରଟିଆଇରୁ ମିଳିଥିବା ଏହି ତଥ୍ୟରୁ ସ୍ପଷ୍ଟ ବାରି ହେଉଛି । ନୂଆ ମେଘନାଦ ପୋଇ ପ୍ଲାଂଟଟେସନରେ ବି ନିଜର ଅଧିପତ୍ୟ ବିସ୍ତାର କରିଥିଲେ ଦେବାଶିଷ
-୨୦୧୪-୧୫ ଆର୍ଥିକ ବର୍ଷରେ ନୂଆ ମେଘନାଦପୋଇ କାଜୁ ବାଡ଼ିକୁ ୨ ଲକ୍ଷ ୮୦ ହଜାରେ ଟେଣ୍ଡରରେ ନେଇଥିଲେ ଗୋଟିଏ ବର୍ଷ ପାଇଁ ।
-୨୦୧୫-୧୬ ଆର୍ଥିକ ବର୍ଷରେ ନୂଆ ମେଘନାଦପୋଇ କାଜୁ ବାଡ଼ିକୁ ୨ ଲକ୍ଷ ୧୦ ହଜାର ଟଙ୍କାରେ ଟେଣ୍ଡର ଜରିଆରେ ହାତେଇଥିଲେ ଦେବାଶିଷ
ବଡ କଥା ହେଉଛି ଏହି ସବୁ ଟେଣ୍ଡର ମିଳିଥିଲା ସିଙ୍ଗଲ ଆପ୍ଲିକେସନ୍ ଜରିଆରେ । ଅର୍ଥାତ୍ ଏହି ସବୁ କାଜୁ ବାଡ଼ିକୁ ଟେଣ୍ଡରରେ ନେବା ପାଇଁ କେହି ଆବେଦନ କରିନଥିଲେ । କିନ୍ତ ଅଭିଯୋଗ ହେଉଛି, ଡରାଇ ଧମକାଇ ଅନ୍ୟ କାହାକୁ ଟେଣ୍ଡର ଆବେଦନ କରିବାକୁ ଦେଉନଥିଲେ ଦେବାଶିଷ । ଏହି ପୁରା ମାମଲା ଏବେ କେନ୍ଦୁଝର ଜିଲ୍ଲା କୋର୍ଟରେ ବିଚାରଧିନ ଅଛି । ଆଉ ଯାହାଙ୍କୁ ନେଇ ଏତେ ସବୁ ଘଟିଛି, ଅର୍ଥାତ୍ ଦେବାଶିଷ ପାତ୍ର, ସିଏ ଏବେ ଜେଲର ଚାରିକାନ୍ଧ ଭିତରେ କଏଦ ଅଛନ୍ତି । କାରଣ ବିଚ୍ ରାସ୍ତା ଉପରେ ଜଣଙ୍କୁ ଗୋଡ଼ାଇ ଗୋଡାଇ ହାଣିବା ଭଳି ସଂଗୀନ ଅଭିଯୋଗ ରହିଛି ଦେବାଶିଷ ପାତ୍ରଙ୍କ ନାଁରେ । ତେବେ ଏନେଇ ତାଙ୍କ ବାପା ତଥା ମନ୍ତ୍ରୀ ବଦ୍ରୀ ନାରାୟଣ ପାତ୍ରଙ୍କ ପ୍ରତିକ୍ରିୟା ମିଳିପାରିନାହିଁ ।