ସ୍ତ୍ରୀହନ୍ତା କର୍ଣ୍ଣେଲକୁ ଆଜୀବନ ସଜ୍ଜା । ୨୦୧୩ରେ ପତ୍ନୀଙ୍କୁ ୩୦୦ ଖଣ୍ଡ କରି ପ୍ରମାଣ ନଷ୍ଟ କରିବାକୁ ଉଦ୍ୟମ କରିଥିଲେ ସୋମନାଥ । କୋର୍ଟ ରାୟ ଶୁଣାଇବା ପରେ କାନ୍ଦି କାନ୍ଦି କହିଲେ ମୁଁ ନିର୍ଦ୍ଦୋଶ
କନକ ବ୍ୟୁରୋ: ନିଜ ପତ୍ନୀଙ୍କୁ ୩୦୦ଖଣ୍ଡ କରି ହତ୍ୟା କରିଥିବା କର୍ଣ୍ଣେଲଙ୍କୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି କୋର୍ଟ । ସମସ୍ତ ତଥ୍ୟ ପ୍ରମାଣକୁ ଆଧାର କରି ଖୋର୍ଦ୍ଧା ଜିଲ୍ଲା ଦୌରାଜଜ କର୍ଣ୍ଣଲ ସୋମନାଥ ପରିଡାଙ୍କୁ ଆଜୀବନ କାରାଦଣ୍ଡ ଶୁଣାଇଛନ୍ତି । ଭାରତୀୟ ଦଣ୍ଡବିଧି ଆଇନ୍ର ଧାରା ୩୦୨ ଏବଂ ୨୦୧ରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିବା ସହ ଏହି ଦଣ୍ଡାଦେଶ ଶୁଣାଇଛନ୍ତି । କୋର୍ଟ ଯେତେବେଳେ ଏହି ରାୟ ଶୁଣାଇଥିଲେ, କୋର୍ଟରୁମରେ କାନ୍ଦି ପକାଇଥିଲେ କର୍ଣ୍ଣେଲ ଏବଂ କହିଥିଲେ ସେ ନିର୍ଦ୍ଦୋଷ ।
Kanak News is now on WhatsApp
Join and get latest news updates delivered to you via WhatsApp
୨୦୧୩ ମସିହାର ବହୁଚର୍ଚ୍ଚିତ ଉଷସୀ ପରିଡା ହତ୍ୟା ମାମଲାରେ ପତ୍ନୀହନ୍ତା କର୍ଣ୍ଣେଲ ସୋମନାଥ ପରିଡାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି ଖୋଦ୍ଧା ଜିଲ୍ଲା ଦୌରାଜଜ । ହତ୍ୟା ଅର୍ଥାତ ଧାରା ୩୦୨ ଅନୁସାରେ ଆଜୀବନ ସଜା ସହିତ ୫୦ହଜାର ଟଙ୍କାର ଜୋରିମାନା ହୋଇଛି । ଏହା ଅନାଦେୟ ରହିଲେ ଆଉ ୬ମାସ ଜେଲ ଭୋଗିବେ କର୍ଣ୍ଣେଲ । ପ୍ରମାଣ ନଷ୍ଟ କରିବା ଅର୍ଥାତ ଧାରା ୨୦୧ରେ ବର୍ଷେ ଜେଲ ଦଣ୍ଡ , ୧୦ହଜାର ଟଙ୍କା ଜୋରିମାନା ରହିଛି । ଏହା ଅନାଦେୟ ରହିଲେ ୨ ମାସ ଜେଲ ଦଣ୍ଡ ଭୋଗିବାକୁ ପଡିବ । ଜଜଙ୍କ ରାୟ ଶୁଣିବା ପରେ କୋର୍ଟରେ କାନ୍ଦି ପକାଇଥିଲେ ସୋମନାଥ ପରିଡା । ସେ ନିର୍ଦ୍ଦୋଷ, ତାଙ୍କୁ ଖଲାସ କରାଯାଉ ବୋଲି କହିଥିଲେ କର୍ଣ୍ଣଲ । ତେବେ ଏହି ଲୋମଟାଙ୍କୁରା ହତ୍ୟାକାଣ୍ଡ ଘଟିଥିଲା ୨୦୧୩ ମସିହା ଜୁନ ମାସରେ । ନୟାପଲ୍ଲୀର ଏନ ଥ୍ରୀ ୱାନ ଏ ବାଇ ଇଲେଭେନ କ୍ୱାର୍ଟରରେ ଘଟିଥିଲା ଏହି ହତ୍ୟାକାଣ୍ଡ । ପତ୍ନୀ ଉଷାସୀ ପରିଡାଙ୍କୁ ୩୦୦ଖଣ୍ଡ କରି ବିଭିନ୍ନ ଜାର ଓ ଟିଫିନରେ ରଖିଥିଲେ କର୍ଣ୍ଣେଲ ।
୨୦୧୩ ମସିହା ଜୁନ ୨୨ ତାରିଖ । ହତ୍ୟାକାଣ୍ଡରୁ ପରଦା ହଟିଲା । ନୟାପଲ୍ଲୀର ଏହି ଘରେ ନିଜ ପତ୍ନୀଙ୍କୁ ଖଣ୍ଡ ଖଣ୍ଡ କରି କାଟିଥିଲେ କର୍ଣ୍ଣେଲ । ପ୍ରାୟ ୨୦ ଦିନ ଧରି ସ୍ତ୍ରୀଙ୍କ ମୃତଦେହର ଖଣ୍ଡ ସହିତ ରହିଥିଲେ । ଘଟଣା ସାମନାକୁ ସେତେବେଳେ ଆସିଥିଲା ଯେତେବେଳେ ସାଉଦୀ ଆରବରେ ରହୁଥିବା ଉଷସୀଙ୍କ ଝିଅ ଲେଖା ପରିଡା ମାଙ୍କୁ ଫୋନ କରିଥିଲେ । ହେଲେ ମା ଫୋନ ଉଠାଉନଥିଲେ । ବାରମ୍ବାର ବାପା ଉଠାଉଥିଲେ ଫୋନ । ମାଙ୍କ ବିଷୟରେ ପଚାରିଲେ କହୁଥିଲେ ଯାଇଛନ୍ତି ସମ୍ପର୍କୀୟଙ୍କ ଘରକୁ । ମା ଫୋନ ନଉଠାଇବାରୁ ଝିଅ ମନରେ ସନ୍ଦେହ ସୃଷ୍ଟି ହୋଇଥିଲା । ଏହି କଥା ଲେଖା ତାଙ୍କ ମାମୁଙ୍କୁ ଜଣାଇଥିଲେ । ମାମୁ ରଂଜନ ସୋମନାଥଙ୍କ ଘରେ ପହଂଚି ନିଜ ଭଉଣୀ ବିଷୟରେ ପଚାରିଥିଲେ । ହେଲେ ସମାନ କଥା ଦୋହରାଇଥିଲେ କର୍ଣ୍ଣେଲ । ତେବେ କଥାରେ ତାଳମେଳ ନରହିବା କାରଣରୁ ପୋଲିସର ସହାୟତା ନେଇଥିଲେ ଲେଖାଙ୍କ ମାମୁ ।
ପୋଲିସ ଯେତେବେଳେ ଏହି ଘରେ ପହଂଚିଥିଲା, ଦୁର୍ଗନ୍ଧରେ ଫାଟି ପଡୁଥିଲା ଘର ଭିତର । ବନ୍ଦ କୋଠରୀ ଭିତରୁ ୨୨ଟି ଷ୍ଟିଲ ଟିଫିନରୁ ମିଳିଥିଲା ଖଣ୍ଡ ଖଣ୍ଡ ମୃତ ଶରୀର । ଗୋଟିଏ ଗୋଡ ଏବଂ ହାଡ ଖଣ୍ଡ ମଧ୍ୟ ଠାବ ହୋଇଥିଲା । ଘଟଣା ସ୍ଥଳରୁ ମିଳିଥିଲା ଛୁରୀ, ଚାପଡ, କରତ, ଗ୍ଲୋବସ, ଗଡ କନା ଏବଂ ରକ୍ତଭିଜା ଟର୍ଚ୍ଚ ଲାଇଟ । ପୋଷ୍ଟମର୍ଟମ ରିପୋର୍ଟ ଏବଂ ଭିସେରା ରିପୋର୍ଟରୁ ସ୍ପଷ୍ଟ ହୋଇଥିଲା, ୨୦ ଦିନ ଆଗରୁ ଉଷସୀଙ୍କୁ ହତ୍ୟା କରାଯାଇଛି । ଏହି ଘଟଣା ସେତେବେଳେ ସାରା ରାଜ୍ୟରେ ହଇଚଇ ସୃଷ୍ଟି କରିଥିଲା । ସମସ୍ତ ତଥ୍ୟ ପ୍ରମାଣକୁ ଆଧାର କରି ଖୋଦ୍ଧା ଜିଲ୍ଲା ଦୌରା ଜଜ ଭାରତୀୟ ଦଣ୍ଡବିଧି ଧାରା ୩୦୨ ଓ ୨୦୧ରେ ତାଙ୍କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡ ଶୁଣାଇଛନ୍ତି ।