ସାମ୍ନାକୁ ଆସିଲା ଭାଇରାଲ ଭିଡିଓର ସତ୍ୟତା ! ବଲିଉଡ଼ର ଜଣେ ଖ୍ୟାତନାମା ଗାୟକଙ୍କ ଭାଣୀଜି ହେଉଛନ୍ତି ଏହି ଶିଶୁ
କିଛିଦିନ ତଳେ ଆମେ ଆପଣଙ୍କୁ ସୋସିଆଲ ମିଡିଆରେ ଭାଇରାଲ ହୋଇଥିବା ଜଣେ ଛୋଟ କୁନି ଝିଅର ଭିଡିଓ ସଂପର୍କରେ ଜଣାଇଥିଲୁ । ଯେଉଁଥିରେ ଜଣେ ମହିଳା ଶିଶୁଟିକୁ ଅତି ଅମାନୁସିକ ଭାବେ ମାଡ଼ ମାରିବା ସହ ଗାଳିଗୁଲଜ କରି ପାଠ ପଢାଉଥିବାବେଳେ ଶିଶୁଟି ମହିଳା ଜଣଙ୍କୁ ଦଣ୍ଡ ନଦେଇ ଭଲରେ ପଢାଇବାକୁ ଆକୁଳ ନିବେଦନ କରୁଥିବାର ଦୃଶ୍ୟ ରହିଥିଲା । ସୋସିଆଲ ମିଡିଆରେ ଏହି ଭିଡିଓ ଭାଇରାଲ ହେବା ପରେ ଏହାକୁ ନେଇ ବିଭିନ୍ନ ମହଲରେ ଗଭୀର ଅସନ୍ତୋଷ ଦେଖାଦେଇଥିଲା । ଏପରିକି କ୍ରିକେଟର ବିରାଟ୍ କୋହଲି ଏବଂ ଶିଖର ଧୱନ ମଧ୍ୟ ଏହି ଭିଡିଓଟିକୁ ସେୟାର କରିବା ସହିତ ଗଭୀର ଦୁଃଖ ପ୍ରକାଶ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ତେବେ ଆପଣଙ୍କ ମନରେ ନିଶ୍ଚୟ ପ୍ରଶ୍ନ ଉଠିଥିବ କି, ଏହି ଭିଡିଓରେ କାନ୍ଦି କାନ୍ଦି ଆକୁଳ ନିବେଦନ କରୁଥିବା ଶିଶୁଟି ପ୍ରକୃତ କିଏ ? ବିଜନେସ ଅଫ୍ ସିନେମାରେ ପ୍ରକାଶିତ ଖବର ମୁତାବକ, ଏହି ଶିଶୁଟିର ନାଁ ହେଉଛି ‘ହୟା’ । ଏବଂ ‘ହୟା’ ହେଉଛନ୍ତି ବଲିଉଡ ଜଗତର ଖ୍ୟାତନାମା ଗାୟକ ତୋଶୀ ଏବଂ ଶାରିବ ସାବ୍ରିିଙ୍କ ଭାଣୀଜି । ଶାରିବ ସାବ୍ରିଙ୍କ ଇନଷ୍ଟାଗ୍ରାମ ପେଜରେ ଏହି ଶିଶୁଟିର ଅନେକ ଭିଡିଓ ଅପଲୋଡ ହୋଇଛି । ଏହି ଭିଡିଓରେ କେଉଁଠି ଶିଶୁଟି ନମାଜ ପଢୁଥାଏ ତ ପୁଣି କେଉଁଠି ମାଆଙ୍କ ସହିତ ମସ୍ତି କରୁଛି । ତେବେ ଏହି ଭିଡିଓ ଶାରିବ ୨୦୧୬ରେ ଅପଲୋଡ କରିଥିଲେ ।
ଏଠାରେ ଆମେ କହିରଖୁଛୁ କି, ନିକଟରେ ଭାରତୀୟ କ୍ରିକେଟର ଶିଖର ଧୱନ ଏବଂ ଅଧିନାୟକ ବିରାଟ୍ କୋହଲି ୱାନଡେ ସିରିଜ୍ ପୂର୍ବରୁ ଏକ ଭିଡିଓ ଦେଖି ଅତ୍ୟନ୍ତ ଭାବୁକ ହୋଇପଡିଥିଲେ । ଖାଲି ସେତିକି ନୁହେଁ ଉଭୟେ ନିଜ ନିଜର ଭାବନାକୁ ଇନଷ୍ଟାଗ୍ରାମରେ ସେୟାର ମଧ୍ୟ କରିଥିଲେ । ଶିଖର ଧୱନ ଶିଶୁଟିକୁ ପଢାଇବାର ଶୈଳୀ ଉପରେ ପ୍ରଶ୍ନ ଉଠାଇଥିଲେ । ସେ ଲେଖିଥିଲେ କି, ‘ମୁଁ ଯେତେ ସବୁ ଭିଡିଓ ଦେଖିଛି, ସେଥିମଧ୍ୟରୁ ଅଧିକ କଷ୍ଟଦାୟକ ହେଉଛି ଏହି ଭିଡିଓ । ବାପାମାଆ ହେବା ଦୃଷ୍ଟିରୁ ଆମର ମୁଖ୍ୟ କର୍ତ୍ତବ୍ୟ ହେଉଛି ନିଜ ପିଲାଙ୍କୁ ଆଗକୁ ବଢିବାକୁ ପ୍ରୋତ୍ସାହନ ହେବା ଓ ସେମାନଙ୍କୁ ବୁଝାଶୁଝା କରି ପାଠ ପଢାଇବା । ମୋତେ ବହୁତ କଷ୍ଟ ଲାଗିଲା କି ଉକ୍ତ ମହିଳା ଜଣକ ଭାବାତ୍ମକ, ମାନସିକ ଏବଂ ଶାରୀରିକ ଦୃଷ୍ଟି କୋଣରୁ ଶିଶୁଟିକୁ ପ୍ରତାଡିତ କରୁଛନ୍ତି । ଯାହାଦ୍ୱାରା କି ଶିଶୁଟି ଖୁବ୍ ଶୀଘ୍ର ୫ ଯାଏଁ ଗଣିବା ଶିଖିଯିବ’ ।
ଅନ୍ୟପଟେ, ବିରାଟ ମଧ୍ୟ ଭିଡିଓକୁ ନେଇ ଦୁଃଖ ପ୍ରକାଶ କରିଥିଲେ । ବିରାଟ ଲେଖିଥିଲେ, ‘ଶିଶୁଟିର କାନ୍ଦ ହୃଦୟକୁ କଷ୍ଟଦେବା ଭଳି ଅଟେ । ପିଲାଙ୍କୁ ଅତି କୋମଳତାର ସହ ପାଠ ପଢାଇବାକୁ ପଡିବ, ଡରାଇ ଧମକାଇ ନୁହେଁ । ତେବେ ଶିଶୁଟିକୁ ପଢାଇବାର ଶୈଳୀ ଏଭଳି ନିଷ୍ଠୁର ରହିଛି କି ଯିଏ ଦେଖିବ ସେ ନିଜ ଲୁହକୁ ଅଟକାଇ ପାରିବ ନାହିଁ । ଏହା ଅତ୍ୟନ୍ତ କଷ୍ଟଦେବା ଭଳି ଦୃଶ୍ୟ ଅଟେ’ ।
ସୌଜନ୍ୟ: ଆଜତକ୍