ଦାମ ବିଷ୍ଣୁ ମିଶିଗଲେ ! ବଦଳିଲା ଜଗତସିଂପୁର ବିଜେଡିରେ ସମୀକରଣ
କନକ ବ୍ୟୁରୋ : ଜଗତସିଂହପୁର ରାଜନୀତିରେ ରୋଚକ ମୋଡ । ସବୁ ବିବାଦକୁ ଭୁଲି ଏକାଠି ହୋଇଛନ୍ତି ଜିଲ୍ଲାର ଦୁଇ ତୁଙ୍ଗ ନେତା, ଦାମ ରାଉତ ଏବଂ ବିଷ୍ଣୁ ଦାସ । କୁଜଙ୍ଗରେ ଅନୁଷ୍ଠିତ ହୋଇଥିବା ବିଜେଡିର ପରିବର୍ଦ୍ଧିତ କାର୍ଯ୍ୟକାରିଣୀରେ ଏକାଠି ହୋଇ ଦଳୀୟ ସଂଗଠନକୁ ଆହୁରି ମଜଭୁତ କରିବା ପାଇଁ ଅଂଟା ଭିଡିଛନ୍ତି । ଆଉ ଏହି ପୁରା କାର୍ଯ୍ୟକ୍ରମରେ ଗୁରୁତ୍ୱପୂର୍ଣ୍ଣ ଭୂମିକା ନେଇଛନ୍ତି ଡକ୍ଟର ଦାମ ରାଉତଙ୍କ ପୁଅ ସମ୍ବିତ ରାଉତ ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ମଂଚରେ ଜିଲ୍ଲାର ଦୁଇ ତୁଙ୍ଗ ନେତା, ବିଷ୍ଣୁ ଦାସ ଏବଂ ଡକ୍ଟର ଦାମୋଦର ରାଉତ ଏକାଠି ହୋଇ ଗୋଟିଏ ସ୍ୱରରେ ବିବାଦର କଥାକୁ ସଫାସଫା ମନା କରିଦେବା ସମସ୍ତଙ୍କୁ ଚକିତ କରିଛି । ଅନେକ ସମୟରେ ଏହି ଦୁଇ ନେତାଙ୍କ ମଧ୍ୟରେ ରାଜନୈତିକ ବିବାଦ ନେଇ ଚର୍ଚ୍ଚା ହୁଏ । ଏମିତିକି ଉଭୟେ ଉଭୟଙ୍କ ବିରୋଧରେ ଖୋଲାଖୋଲି ବୟାନବାଜୀ କରନ୍ତି । କିନ୍ତୁ ମନ୍ତ୍ରୀ ଦାମ ରାଉତଙ୍କ ପୁଅ ସମ୍ବିତ ରାଉତରାୟ ଅଂଟା ଭିଡିଛନ୍ତି-ଏହି ବିବାଦର ଅନ୍ତ ଘଟାଇ ବିଜେଡିକୁ ଜଗତସିଂହପୁରରେ ଆହୁରି ମଜବୁତ କରିବା ପାଇଁ ।
ମନାନ୍ତର ନୁହେଁ ମତାନ୍ତର ଥିବା କହୁଥିବା ମନ୍ତ୍ରୀ ଦାମ ରାଉତଙ୍କ ପୁଅ, ଏବେ ମୈଦାନକୁ ଓହ୍ଲାଇଛନ୍ତି । ବାପାଙ୍କ ଗଡ଼ରେ ରାଜନୈତିକ ଶତ୍ରୁ ଥିବା ବିଷ୍ଣୁ ଦାସଙ୍କ ସହ ଗୋଟିଏ ଗାଡ଼ିରେ ରାହାମାରୁ କୁଜଙ୍କ ପହଂଚିଥିଲେ ଏକ ବିଶାଳ ଶୋଭାଯାତ୍ରା ନେଇ । ଯାହା ସ୍ଥାନୀୟ ଲୋକଙ୍କୁ ବେଶ୍ ତାଜୁବ୍ କରିଥିଲା । ହେଲେ ସବୁ ବିବାଦ କେବଳ ମିଡ଼ିଆର ଟିଆରପି ପାଇଁ ବୋଲି କହିଛନ୍ତି ଦୁଇ ନେତା ।
ଅଚାନକ୍ ଏହି ଦୁଇ ହେଭିୱେଟ୍ ନେତାଙ୍କ ଏଭଳି ପରିବର୍ତନ ଅନେକ ପ୍ରଶ୍ନ ଛିଡ଼ା କରୁଛି
-ଆଇଓସିଏଲ୍ ପ୍ରତିଷ୍ଠା ପରେ ଜଗତସିଂହପୁରରେ ବିଜେପିର ପତିଆରା ବଢୁଛି କି ?
-ବିଜେପିକୁ କୌଣସି ସୁଯୋଗ ନଦେବା ପାଇଁ ଏହି ଦୁଇ ନେତାଙ୍କ ଏହି ପରିବର୍ତ୍ତନ କି ?
-ଦାମ ରାଉତ ନିଜ ପୁଅ ସମ୍ବିତ ରାଉତରାୟଙ୍କ ପାଇଁ ବାଟ ଖୋଲୁଛନ୍ତି କି ?