ଦନ୍ତାର ଗୋଡରେ ଅଟୋ ଟାୟାର ! ଟ୍ରାଙ୍କୁଲାଇଜର କରି ଚିକିତ୍ସା କରିବ ବନ୍ୟପ୍ରାଣୀ ଟିମ୍
କନକ ବ୍ୟୁରୋ : ଏକ ଅଟୋ ଟାୟାର ଭିତରେ ପଶିଲା ଦନ୍ତାହାତୀର ଗୋଡ । ଟାୟାର ଭିତରୁ ଗୋଡ କାଢିବା ପାଇଁ ଯେତେ ଚେଷ୍ଟା କଲେ ମଧ୍ୟ ସଫଳ ହୋଇପାରୁନି ଦନ୍ତା । ୨୦ଦିନ ହେଲାଣି ଏପରି ରହିବା ଫଳରେ ହାତୀଟିର ଗୋଡରେ ଗଭୀର କ୍ଷତ ସୃଷ୍ଟି ହୋଇଛି । ହାତୀଟି ଭଲ ଭାବରେ ଚାଲିପାରୁନାହିଁ । ଅଧିକ କଷ୍ଟ ହେଲେ ହାତୀଟି ପାଣି ଭିତରେ ଗୋଡ ବୁଡାଇ ରଖୁଥିବା ଦେଖିବାକୁ ମିଳୁଛି । ଏଭଳି ଦୃଶ୍ୟ ଦେଖିବାକୁ ମିଳିଛି ଆଠଗଡର ମେଘା ଜଙ୍ଗଲରେ ।
Kanak News is now on WhatsApp
Join and get latest news updates delivered to you via WhatsApp
ବନବିଭାଗ ପାଖରେ ଏନେଇ ୨୦ଦିନ ହେଲା ଖବର ଥିଲେ ମଧ୍ୟ ହାତୀଟି ନିଜେ ଗୋଡରୁ ଟାୟାର କାଢିବ ଭାବି ବନବିଭାଗ କୌଶସି ପଦକ୍ଷେପ ନେଇନଥିଲା । ତେବେ ତାହା ହୋଇପାରିଲାନାହିଁ । ଗତ କିଛି ଦିନ ଧରି ହାତୀଟିକୁ ଏକ ନିର୍ଦ୍ଦିଷ୍ଟ ଜାଗାରେ ଦେଖାଯାଉଥିଲେ ମଧ୍ୟ ସୋମବାର ଦିନ ତାକୁ ପାଇନ’ଥିଲେ । ତେବେ ତାକୁ ଆଜି ଆଉଥରେ ଟ୍ରାକ କରାଯିବ । ଗଭୀର କ୍ଷତ ଯୋଗୁଁ ହାତୀଟି ଠିକ୍ ଭାବରେ ଚାଲିପାରୁନାହିଁ । ତେବେ ଶୀଘ୍ର ଚିକିତ୍ସା କରାନ’ଗଲେ ସଂକ୍ରମଣ ଯୋଗୁଁ ଗୋଡଟି ନଷ୍ଟ ହେବାର ଆଶଙ୍କା ରହିଛି ।