ଆଗୁଆ ହେବ କି ନିର୍ବାଚନ ! ନିର୍ବାଚନ କମିଶନ କହିଲେ ଆମେ ପ୍ରସ୍ତୁତ, ଉଷୁମ ହେଲା ରାଜନୈତିକ ପାଣିପାଗ
କନକ ବ୍ୟୁରୋ : ସାରା ଦେଶରେ ଆଗୁଆ ନିର୍ବାଚନ ପାଇଁ ପ୍ରସ୍ତୁତ ନିର୍ବାଚନ କମିଶନ୍ । ୨୦୧୮ ସେପ୍ଟେମ୍ବର ସୁଦ୍ଧା ଉଭୟ ଲୋକସଭା ଓ ବିଧାନସଭା ନିର୍ବାଚନ ପାଇଁ ଭାରତୀୟ ନିର୍ବାଚନ କମିଶନ ପ୍ରସ୍ତୁତ ଥିବା କହିଛନ୍ତି । ଚର୍ଚ୍ଚା ହେଉଛି କେନ୍ଦ୍ରରୋ ବିଜେପି ନେତୃତ୍ୱାଧୀନ ଏନଡିଏ ସରକାର ଆଗୁଆ ନିର୍ବାଚନ କରିବାକୁ ଚାହୁଁଛନ୍ତି । ଏପରିକି ଲୋକସଭା ଓ ବିଧାନସଭା ନିର୍ବାଚନ ଅଲଗା ଅଲଗା କରିବା ପରିବର୍ତେ, ଏକାଠି ଗୋଟିଏ ସମୟରେ କରିବା ଉପରେ ଜୋର ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ପରିପ୍ରେକ୍ଷୀରେ ନିର୍ବାଚନ କମିଶନର ଓ.ପି. ରାୱତ ଗତକାଲି ଭୋପାଳରେ କହିଛନ୍ତି ଯେ, ଆସନ୍ତାବର୍ଷ ସେପ୍ଟେମ୍ବର ସୁଦ୍ଧା ଏକକାଳୀନ ନିର୍ବାଚନ ପାଇଁ କମିଶନ ପ୍ରସ୍ତୁତ ହୋଇଯିବେ । ଏଥିପାଇଁ ଆବଶ୍ୟକ ପଡୁଥିବା ଇଭିଏମ ମେସିନ୍ ଓ ଭିଭିପାଟ୍ ଅଧିଗ୍ରହଣ ପ୍ରକ୍ରିୟା ଆରମ୍ଭ ହୋଇସାରିଛି । ସରକାର ଚାହିଁଲେ ଏନେଇ ଆଇନଗତ ସଂଶୋଧନ କରି ଆଗୁଆ ଓ ଏକକାଳୀନ ନିର୍ବାଚନ କରାଇବାକୁ ନିର୍ଦ୍ଦେଶ ଦେଇପାରିବେ । ନିର୍ବାଚନ କମିଶନଙ୍କ ଏଭଳି ସୂଚନା ପରେ ଓଡିଶାରେ ଆଗୁଆ ନିର୍ବାଚନ ନେଇ ଚର୍ଚ୍ଚା ଜୋର ଧରିଛି । ରାଜ୍ୟରେ ପୂର୍ବରୁ ଲୋକସଭା ଓ ବିଧାନସଭା ନିର୍ବାଚନ ଏକାଠି ହୋଇଆସୁଛି । ତେବେ ଓଡିଶାରେ ୨୦୧୯ରେ ନିର୍ବାଚନ ହେବାକୁ ଥିବାବେଳେ, ଆଗୁଆ ନିର୍ବାଚନ ହେଲେ ପ୍ରସ୍ତୁର ଥିବା କହିଛନ୍ତି ତିନି ପ୍ରମୁଖ ରାଜନୈତିକ ଦଳ ବିଜେଡି, ବଜେପି ଓ କଂଗ୍ରେସ ।
ନିର୍ବାଚନ କମିଶନଙ୍କ ସୂଚନା ଅନୁଯାୟୀ ୨୦୧୮ରେ ୭ଟି ରାଜ୍ୟରେ ବିଧାନସଭା ନିର୍ବାଚନ ରହିଛି । ଗୁଜରାଟ ବିଧାନସଭାର କାର୍ଯ୍ୟକାଳ ୨୦୧୮ ଜାନୁଆରୀ ୨୨ରେ ଶେଷ ହେଉଛି । ହିମାଚଳ ପ୍ରଦେଶରେ ଜାନୁଆରୀ ୭, କର୍ଣ୍ଣଟକରେ ମେ ୨୮, ମେଘାଳୟରେ ମାର୍ଚ୍ଚ ୬, ମିଜୋରାମରେ ଡିସେମ୍ବର ୧୫, ନାଗାଲାଣ୍ଡରେ ମାର୍ଚ୍ଚ ୧୩ ଓ ତ୍ରିପୁରାରେ ମାର୍ଚ୍ଚ ୧୪ରେ ଶେଷ ହେବ ବିଧାନସଭା କାର୍ଯ୍ୟକାଳ । କେବଳ ମିଜୋରାମକୁ ଛାଡିଦେଲେ ଅନ୍ୟ ରାଜ୍ୟଗୁଡିକରେ ସେପ୍ଟେମ୍ବର ସୁଦ୍ଧା ନିର୍ବାଚନ ଶେଷ ହୋଇଯିବ । ତେଣୁ କେନ୍ଦ୍ର ସରକାର ନିଷ୍ପତି ନେଲେ ଏସବୁ ରାଜ୍ୟ ସହ ୨୦୧୯ରେ ନିର୍ବାଚନ ହେବାକୁ ଥିବା ରାଜ୍ୟରେ ମଧ୍ୟ ଆଗୁଆ ନିର୍ବାଚନ କରାଇ ପାରନ୍ତି । ଏପରିକି ଲୋକସଭା ଓ ବିଧାନସଭା ନିର୍ବାଚନ ଏକାଠି କରାଇ ନିର୍ବାଚନୀ ଖର୍ଚ୍ଚ କମ୍ କରିବାକୁ ମଧ୍ୟ ନିଷ୍ପତି ନେଇପାରନ୍ତି ।