ଶେଷ ଲଢେଇ ପୂର୍ବରୁ ରୋଚକ ହେଲା ପଶ୍ଚିମବଙ୍ଗ ରାଜନୀତି । ମୁଖ୍ୟ ଶାସନ ସଚିବଙ୍କ ସମେତ ଗୃହ ସଚିବଙ୍କୁ ଛୁଟିରେ ପଠାଇଲେ ନିର୍ବାଚନ କମିଶନ, ଦିନକ ଆଗରୁ ପ୍ରଚାରରେ ଲାଗିଲା ରୋକ୍ ।
କନକ ବ୍ୟୁରୋ : ୧୯ ଯୁଦ୍ଧର ଶେଷ ପର୍ଯ୍ୟାୟ ଲଢେଇ ବାକି ରହିଥିବା ବେଳେ ନୂଆମୋଡ ନେଇଛି ପଶ୍ଚିମବଙ୍ଗ ରାଜନୀତି । ଗତକାଲି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ରୋଡ୍ ସୋ’ ବେଳେ ଯେଉଁ ରାଜନୈତିକ ହିଂସା ଦେଖିବାକୁ ମିଳିଥିଲା, ତାକୁ ନେଇ କଡା ଆଭିମୁଖ୍ୟ ଗ୍ରହଣ କରିଛନ୍ତି ନିର୍ବାଚନ କମିଶନ । ଶେଷ ପର୍ଯ୍ୟାୟ ନିର୍ବାଚନକୁ ଅବାଧ ଓ ହିଂସାମୁକ୍ତ କରିବା ପାଇଁ କଡା ପଦକ୍ଷେପ ଗ୍ରହଣ କରିଛନ୍ତି ନିର୍ବାଚନ କମିଶନ । ଦିନକ ପୂର୍ବରୁ ପ୍ରଚାର ଉପରେ ଲାଗିଛି ରୋକ୍ ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ କମିଶନଙ୍କ ନିର୍ଦ୍ଦେଶ ଅନୁସାରେ, ଆସନ୍ତାକାଲି ଅର୍ଥାତ ଗୁରୁବାର ରାତି ୧୦ଟା ପରଠାରୁ କୌଣସି ରାଜନୈତିକ ପ୍ରଚାର ହୋଇପାରିବ ନାହିଁ । ନିର୍ବାଚନ ନିୟମ ଅନୁଯାୟୀ, ୧୭ ତାରିଖ ପ୍ରଚାରର ଶେଷ ଦିନ ଥିବା ବେଳେ, ଏହାର ଠିକ୍ ଗୋଟିଏ ଦିନ ପୂର୍ବରୁ ପ୍ରଚାର ଉପରେ ଲାଗିଛି କଟକଣା । ଆଉ ସବୁଠାରୁ ବଡ କଥା ହେଉଛି, ପଶ୍ଚିମବଙ୍ଗ ମୁଖ୍ୟ ଶାସନ ସଚିବଙ୍କ ସମେତ ଗୃହ ସଚିବଙ୍କୁ ଛୁଟିରେ ପଠାଇଛନ୍ତି ନିର୍ବାଚନ କମିଶନ ।
ନିର୍ବାଚନୀ ପ୍ରଚାର ସମେତ, ସୋସିଆଲ ମିଡିଆ ପ୍ରଚାର ଉପରେ ମଧ୍ୟ ରୋକ୍ ଲଗାଇଛନ୍ତି ନିର୍ବାଚନ କମିଶନ । ଅନ୍ୟପଟେ ଇଶ୍ୱରଚନ୍ଦ୍ର ବିଦ୍ୟାସାଗରଙ୍କ ମୂର୍ତ୍ତି ଭାଙ୍ଗିବା ନେଇ ତୀବ୍ର ସମାଲୋଚନା କରିଛନ୍ତି ନିର୍ବାଚନ କମିସନ୍ । ଆଉ ଥରେ ଏପରି ପ୍ରକାର ହିଂସାକାଣ୍ଡ ଘଟିଲେ ଶକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି । ସୂଚନାଯୋଗ୍ୟ ଅନ୍ତିମ ପର୍ଯ୍ୟାୟରେ ପଶ୍ଚିମବଙ୍ଗରେ ୯ଟି ଆସନ ପାଇଁ ମତଦାନ ଅନୁଷ୍ଠିତ ହେବ । ରାଜ୍ୟରେ ୯ଟି ଆସନ ପାଇଁ ପାଇଁ ଶୁକ୍ରବାର ସନ୍ଧ୍ୟା ୫ଟା ପର୍ଯ୍ୟନ୍ତ ପ୍ରଚାର ଅବଧି ଥିଲା । କିନ୍ତୁ ହିଂସାକାଣ୍ଡ ଯୋଗୁଁ ପ୍ରଚାର ଅବଧିକୁ ଏକ ଦିନ ପୂର୍ବରୁ ଶେଷ କରିବା ପାଇଁ ନିଷ୍ପତ୍ତି ନେଇଛନ୍ତି ନିର୍ବାଚନ କମିଶନ ।