କନକ ବ୍ୟୁରୋ : ଧଳସାମନ୍ତ ବ୍ରଦର୍ସ ସହଯୋଗୀଙ୍କ ଘରେ ପ୍ରବର୍ତନ ନିର୍ଦ୍ଦେଶାଳୟର ଚଢାଉ । ସୁଶୀଲ ଧଳସାମନ୍ତ ଓ ସୁଶାନ୍ତ ଧଳସାମନ୍ତର ସହଯୋଗୀଙ୍କ ମହାନଦୀ ବିହାର, ଗଣ୍ଡରପୁର ଘରେ ଚଢାଉ କରିଛି ଇଡିର ଟିମ୍ । ଇଡିର ୩ ଜଣିଆ ସ୍ୱତନ୍ତ୍ର ଟିମ୍ ଆଜି ଅଚାନକ ଧଳସାମନ୍ତ ବ୍ରଦର୍ସଙ୍କ ଘରେ ଚଡାଉ କରିଛନ୍ତି । ଏହି ଚଢାଉ ସମୟରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି ଇଡି । ବେଆଇନ୍ ସମ୍ପତି ଠୁଳ ନେଇ ଇଡି ତନାଘନା କରୁଥିବା ଜଣାପଡିଛି । କୁନି ଦାସ, ଭରତ ସ୍ୱାଇଁ ଏବଂ ଶିବ ଗୋଚ୍ଛିଙ୍କ ଘରେ ତନାଘନା ଜାରି ରହିଛି । ଏମାନେ ଡି ବ୍ରଦର୍ସଙ୍କ ପ୍ରମୁଖ ସହଯୋଗୀ ବୋଲି ଜଣାପଡିଛି । ଧଳସାମନ୍ତ ବ୍ରଦର୍ସଙ୍କ ବିଭିନ୍ନ ବେଆଇନ କାରବାର ସହ ସଂପୃକ୍ତି ଅଭିଯୋଗରେ ଏହି ତିନି ସହଯୋଗୀଙ୍କୁ ପୂର୍ବରୁ କମିସନରେଟ ପୋଲିସ ଗିରଫ କରିଥିଲା । ଏପରିକି ବିଭିନ୍ନ ବେଆଇନ କାରବାର ଯେପରିକି ବାଲିଘାଟ ଓ ଟେଣ୍ଡର ଫିକ୍ସିଂରୁ ମିଳୁଥିବା ଟଙ୍କାର ସିଂହଭାଗ ଏହି ତିନି ସହଯୋଗୀଙ୍କ ଦ୍ୱାରା ଆଦାୟ କରୁଥିଲା ଧଳସାମନ୍ତ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଧଳସାମନ୍ତ ବ୍ରଦର୍ସଙ୍କୁ ଘରେ ଇଡି ଚଢାଉ କରି ବିଭିନ୍ନ ତଥ୍ୟ ହାସଲ କରିବା ସହ ବେଆଇନ ଅର୍ଥ ଜବତ କରିଥିଲା । ଏପରିକି ଜେଲରେ ଥିବା ସମୟରେ ଦୁଇ ଭାଇଙ୍କୁ ଜେରା କରିଥିଲା ଇଡି । ଧଳସମାନ୍ତଙ୍କ ପରେ ଏବେ ସହଯୋଗୀଙ୍କ ପାଳି ପଡିଛି । ଜଣକ ପରେ ଜଣେ ସହଯୋଗୀଙ୍କୁ ଡାକି ଜେରା କରିବା ପରେ ଏବେ ସହଯୋଗୀଙ୍କ ଘରେ ରେଡ ପକାଇଛି ଇଡି ।