ଅମୃତସର ରେଳ ଦୁର୍ଘଟଣାରେ ନୂଆ ମୋଡ ! ରେଲୱେ ଟ୍ରାକ୍ ନିକଟରେ ରାବଣ ପୋଡି ପାଇଁ ପୋଲିସ ଦେଇଥିଲା ଅନୁମତି ।
ପଞ୍ଜାବର ଅମୃତସର ଠାରେ ହୋଇଥିବା ହୃଦୟ ବିଦାରକ ରେଳ ଦୁର୍ଘଟଣାରେ ଆସିଛି ନୂଆ ମୋଡ । ଏହି ଘଟଣାରେ ରେଳ ବିଭାଗ ଏବଂ ସ୍ଥାନୀୟ ପ୍ରଶାସନ ନିଜକୁ ନିର୍ଦ୍ଦୋଶ ପ୍ରମାଣ କରିବାକୁ ଚେଷ୍ଟା କରୁଛନ୍ତି ସତ କିନ୍ତୁ ସତ୍ୟତା ହେଉଛି କି, ଦଶହରା କମିଟି ପୋଲିସ ପ୍ରଶାସନକୁ ସୁରକ୍ଷା ବ୍ୟବସ୍ଥା ପାଇଁ ଚିଠି ଲେଖିଥିଲା । ଆଉ ସବୁଠାରୁ ବଡ କଥା ହେଉଛି ପୋଲିସ ମଧ୍ୟ ଦଶହରା କାର୍ଯ୍ୟକ୍ରମ କରିବା ପାଇଁ କମିଟିକୁ ଅନୁମତି ଦେଇଥିଲା । ଆସିଷ୍ଟାଣ୍ଟ ସବ୍ ଇନ୍ସପେକ୍ଟର ଦଲଜୀତ ସିଂହ ଦଶହରା କମିଟିକୁ ଦେଇଥିବା ଜବାବରେ କହିଥିଲେ ଯେ, ଦଶହରା କାର୍ଯ୍ୟକ୍ରମ ଆୟୋଜନ କରିବାରେ ପୋଲିସର କୌଣସି ଆପତ୍ତି ନାହିଁ ।
Kanak News is now on WhatsApp
Join and get latest news updates delivered to you via WhatsApp
କମିଟି ପକ୍ଷରୁ ଦିଆଯାଇଥିବା ଚିଠି ସାମ୍ନାକୁ ଆସିବା ପରେ ଜଣାପଡିଛି ଯେ, ଦଶହରା କମିଟି ପକ୍ଷରୁ ସ୍ଥାନୀୟ ପ୍ରଶାସନକୁ ଉତ୍ସବର ଆୟୋଜନ ପାଇଁ ସୂଚନା ଦିଆଯାଇଥିଲା ଏବଂ ସୁରକ୍ଷା ବ୍ୟବସ୍ଥା ପାଇଁ ମଧ୍ୟ ଦାବି କରାଯାଇଥିଲା । କିନ୍ତୁ ଏନଓସି ଦେବା ପରେ ମଧ୍ୟ କାର୍ଯ୍ୟକ୍ରମ ସ୍ଥଳରେ ଶୁକ୍ରବାର ପୋଲିସ ଉପସ୍ଥିତି ନଜର ଆସିନଥିଲା । ଆଉ ଏହାରି ମଧ୍ୟରେ ଘଟିଯାଇଥିଲା ଏକ ଛାତି ଥରା ଦୁର୍ଘଟଣା ।
ତେବେ ଅମୃତସର ନଗର ନିଗମ ପକ୍ଷରୁ ସେଠାରେ ରାବଣ ପୋଡି ଉତ୍ସବ ଆୟୋଜନ ପାଇଁ ଅନୁମତି ଦିଆଯାଇନଥିବା ଜଣାପଡିଛି । ତେବେ ଗତ ବର୍ଷ ଅପେକ୍ଷା ଚଳିତବର୍ଷ ଅଧିକ ଧୁମଧାମରେ ସେଠାରେ ରାବଣ ପୋଡି ଉତ୍ସବର ଆୟୋଜନ କରାଯାଇଥିଲା । ଅମୃତସରର ଏହି ବଡ ଦୁର୍ଘଟଣାକୁ ନେଇ ଏପର୍ଯ୍ୟନ୍ତ ଏହି ସୂଚନା ସାମ୍ନାକୁ ଆସୁଥିଲା ଯେ, ପ୍ରଶାସନ ପକ୍ଷରୁ ସେଠାରେ ରାବଣ ପୋଡି ଉତ୍ସବ ଆୟୋଜନ ପାଇଁ ଅନୁମତି ଦିଆଯାଇନଥିଲା । ଏହା ପରେ ମଧ୍ୟ ରାବଣ ପୋଡି ଉତ୍ସବ ଆୟୋଜନ ହୋଇଥିଲା । କିନ୍ତୁ ଏହି ଖବର ଏବେ ମିଥ୍ୟା ବୋଲି ଜଣାପଡିଛି । ରାବଣ ପୋଡି ଉତ୍ସବ ଆୟୋଜନ ପାଇଁ ପ୍ରଶାସନ ପକ୍ଷରୁ ଅନୁମତି ଦିଆଯାଇଥିବା ଜଣାପଡିଛି ।