କନକ ବ୍ୟୁରୋ : ନାହାନ୍ତି ଶିକ୍ଷକ, ପିଲାଙ୍କୁ ପାଠ ପଢାଉଛନ୍ତି ପୋଲିସ କର୍ମଚାରୀ । ସମ୍ବଲପୁର ଜିଲ୍ଲା ରିଜର୍ଭ ପୋଲିସ ଭିତରେ ଥିବା ପୋଲିସ ହାଇସ୍କୁଲରେ ୪ଜଣ ପୋଲିସ କର୍ମଚାରୀ ଶିକ୍ଷାଦାନ କରିବା ଘଟଣା ଚର୍ଚ୍ଚାର ବିଷୟ ପାଲଟିଛି । ଏହି ସ୍କୁଲରେ ଶିକ୍ଷକଙ୍କ ଅଭାବ ରହିଛି । ଯେଉଁଥିପାଇଁ ଏହି ୪ଜଣ ପୋଲିସ କର୍ମଚାରୀ ନିରଞ୍ଜନ ତ୍ରିପାଠୀ, ମଞ୍ଜୁଲତା ପଟ୍ଟନାୟକ, ପ୍ରକାଶ ପରିଡା, ବିଦ୍ୟାଧର ନାୟକ ଶିକ୍ଷକଙ୍କ ସ୍ଥାନରେ ପାଠ ପଢାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ୪ଜଣ ପୋଲିସ କର୍ମଚାରୀ ଦୀର୍ଘ ବର୍ଷ ହେଲା ନିରବଚ୍ଛିନ ଭାବେ ପାଠ ପଢାଇବା ସହ ନିଜେ ପ୍ରସ୍ତୁତ ହୋଇ ପ୍ରତ୍ୟେକ ଦିନ ସ୍କୁଲକୁ ଆସି ଛାତ୍ରଛାତ୍ରୀମାନଙ୍କୁ ପାଠ ପଢାଇଥାନ୍ତି । ଆଉ ସେମାନେ ଭଲ ପାଠ ମଧ୍ୟ ପଢାଉଥିବା କହିଛନ୍ତି ଛାତ୍ରଛାତ୍ରୀ । ୨୦୦୭ ମସିହାରେ ଏହି ସ୍କୁଲରେ ଶିକ୍ଷକ ଅଭାବ ହେବାରୁ, ତତ୍କାଳୀନ ଏସପି ଶିକ୍ଷା ବାଧାପ୍ରାପ୍ତ ନହେବା ପାଇଁ ଏହି ୪ ଜଣ ପୋଲିସ କର୍ମଚାରୀଙ୍କୁ ନିୟୋଜିତ କରିଥିଲେ ।
କିନ୍ତୁ ଶିକ୍ଷା ବିଭାଗ ଏଯାଏଁ ସ୍ଥାୟୀ ଶିକ୍ଷକ ନଦେବା ଶିକ୍ଷା ବିଭାଗ ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଏନେଇ ଜିଲ୍ଲା ଶିକ୍ଷା ଅଧିକାରୀଙ୍କ କହିବା କଥା ୨୦୦୦ ମସିହାଠାରୁ ଅନୁଦାନ ପ୍ରାପ୍ତ ସ୍କୁଲ ଗୁଡିକ ପାଇଁ ଶିକ୍ଷକ ନିଯୁକ୍ତି କରାଯାଉନଥିବାବେଳେ ଖୁବ ଶୀଘ୍ର ଏହା ଉପରେ ପଦକ୍ଷେପ ନିଆଯିବ । ତେବେ ପ୍ରଶ୍ନ ଉଠୁଛି ଦୀର୍ଘ ୨୦୦୭ ମସିହାରୁ କାହିଁକି ଶିକ୍ଷା ବିଭାଗ ଏଥି ପ୍ରତି ଧ୍ୟାନ ଦେଉନି । ଆଉ ଦେଖିବାକୁ ରହିଲା ଏହି ସ୍କୁଲରେ କେବେ ଶିକ୍ଷକ ନିଯୁକ୍ତ ହେଉଛନ୍ତି ।