ମଦ ନିଶାରେ ଥିବା ଯୁବକଙ୍କୁ କାମୁଡିଲା ସାପ ! ରାଗିଗଲେ ଯୁବକ, ଦାନ୍ତରେ କାମୁଡି ସାପକୁ କରିଦେଲେ ଚାରିଖଣ୍ଡ ।
କନକ ବ୍ୟୁରୋ : ସାଧାରଣତଃ ସାପକୁ ଦେଖିଲେ ଯେକେହି ବି ଡରି ଯାଇଥାନ୍ତି । ଅତି ନିକଟରେ ସାପକୁ ଦେଖିଦେଲେ ଛାତିରେ ଛନକା ପଶିଯାଏ । ପଶିବନି ବା କାହିଁକି, କାରଣ ସାପ କାମୁଡିଲେ, କ୍ଷଣିକ ସମୟ ମଧ୍ୟରେ ଜୀବନ ଚାଲିଯାଇପାରେ । ଅନେକ ସମୟରେ ଆପଣଙ୍କ ଟିଭିରେ ଦେଖିଥିବେ କିମ୍ବା ଖବରକାଗଜରେ ପଢିଥିବେ ଯେ, ସାପ କାମୁଡାରେ କାହାରି ମୃତ୍ୟୁ ହୋଇଥିବା ଖବର ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ଆଜି ଆମେ ଆପଣଙ୍କୁ ଏପରି ଏକ ଘଟଣା ବିଷୟରେ କହିବୁ, ଯାହା ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ସାଧାରଣତଃ ଆପଣ ଶୁଣିଥିବେ, ମଣିଷକୁ ସାପ କାମୁଡିଥାଏ । କିନ୍ତୁ ଏମିତି କେବେ ଶୁଣିଛନ୍ତି କି ସାପକୁ ମଣିଷ କାମୁଡିଛି । କିଛି ଏହିଭଳି ହିଁ ଘଟଣା ଘଟିଛି ଉତ୍ତରପ୍ରଦେଶ ଏଟା ଠାରେ । ରବିବାର ମଧ୍ୟରାତ୍ରିରେ ଘଟିଥିବା ଏହି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି । ଆସନ୍ତୁ ଜାଣିବା କ’ଣ ଥିଲା ପୁରା ଘଟଣା ।
ମଦ ନିଶାରେ ଥିବା ରାଜକୁମାର ନାମକ ଜଣେ ଯୁବକଙ୍କୁ ଏକ ସାପ କାମୁଡିଥିଲା । ଆଉ ରାଗରେ ସାପକୁ ନିଜ ଦାନ୍ତରେ କାମୁଡି ଖଣ୍ଡ ଖଣ୍ଡ କରିଦେଇଛି ସମ୍ପୃକ୍ତ ଯୁବକ । ସାପକୁ ଦାନ୍ତରେ କାମୁଡିବା ପରେ ସଙ୍ଗେ ସଙ୍ଗେ ବେହୋସ ହୋଇ ତଳେ ପଡିଯାଇଥିଲେ ଯୁବକ । ଏ ସମ୍ପର୍କରେ ପରିବାର ଲୋକ ଜାଣିବା ପରେ, ସଙ୍ଗେ ସଙ୍ଗେ ତାଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲକୁ ନେଇଯାଇଥିଲେ, ଯେଉଁଠାରେ ତାଙ୍କ ଅବସ୍ଥା ଗୁରୁତର ରହିଥିବା ଜଣାପଡିଛି ।
ଉତ୍ତରପ୍ରଦେଶ ଏଟାର ଅସରୋଲି ଗାଁରେ ରହୁଥିବା ରାଜକୁମାରଙ୍କ ଘରେ ରବିବାର ଏକ ଉତ୍ସବ ଥିଲା । ଆଉ ଯେଉଁଥିପାଇଁ ତାଙ୍କ ଘରକୁ ଅନେକ ଅତିଥି ମଧ୍ୟ ଆସିଥିଲେ । ଉତ୍ସବ ପାଇଁ ଅନେକ ଲୋକ ମଦ୍ୟପାନ ମଧ୍ୟ କରିଥିଲେ । ଆଉ କିଛି ସମୟ ପରେ ସେଠାରେ ଏକ ସାପ ଚାଲି ଆସିଥିଲା । ଯାହାକୁ ଦେଖି କିଛି ଲୋକ ଭୟରେ ଦୌଡିଥିଲେ ତ ଆଉ କିଛି ଲୋକ ସାପକୁ ମାରିବାକୁ ଆଗେଇ ଆସିଥିଲେ । ଆଉ ରାଜକୁମାର ମଧ୍ୟ ସାପକୁ ମାରିବାକୁ ଆସିଥିଲେ ।
ମଦ ନିଶାରେ ଥିବା ରାଜକୁମାର ସାପକୁ ମାରିବାକୁ ଆରମ୍ଭ କରିଥିଲେ । ଆଉ ଏହି ସମୟରେ ରାଜକୁମାରଙ୍କୁ କାମୁଡି ଦେଇଥିଲା ସାପ । ସାପ କାମୁଡିବା ପରେ ରାଗିଯାଇଥିଲେ ରାଜକୁମାର । ଏବଂ ସାପକୁ ହାତରେ ଉଠାଇ ଦାନ୍ତରେ କାମୁଡି ଚାରି ଖଣ୍ଡ କରିଦେଇଥିଲେ । ରାଜକୁମାରଙ୍କ ଏଭଳି କାଣ୍ଡ ଦେଖି ଉପସ୍ଥିତ ଥିବା ସମସ୍ତ ଲୋକ ଆଶ୍ଚର୍ଯ୍ୟ ହୋଇଯାଇଥିଲେ । କିଛି ସମୟ ମଧ୍ୟରେ ରାଜକୁମାର ବେହୋସ ହୋଇ ତଳେ ପଡିଯାଇଥିଲେ । ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯିବା ସହ ଏବେ ତାଙ୍କ ଚିକିତ୍ସା ଚାଲିଥିବା ଜଣାପଡିଛି ।