ରାଜ୍ୟସଭା ମହାସମର ! ଚାଣକ୍ୟଙ୍କ ବିଜୟ ପାଇଁ ସୁପ୍ରିମୋଙ୍କ ଛାୟାଯୁଦ୍ଧ
କନକ ବ୍ୟୁରୋ : ଗୁଜରାଟରେ ରୋଚକ ହେଉଛି ରାଜ୍ୟସଭା ନିର୍ବାଚନ ଡ୍ରାମା । ୩ଟି ରାଜ୍ୟସଭା ଆସନ ପାଇଁ ଆଜି ମତଦାନ ହୋଇଥିବାବେଳେ ବିଳମ୍ବିତ ହୋଇଛି ମତ ଗଣନା । କାରଣ ଦୁଇଜଣ ବିଦ୍ରୋହୀ କଂଗ୍ରେସ ବିଧାୟକ ଭୋଟ ଦେବା ପରେ ସେମାନଙ୍କ ବାଲଟ ପେପର ବିଜେପି ପ୍ରାର୍ଥୀଙ୍କୁ ଦେଖାଇଥିବା ଅଭିଯୋଗରେ ନିର୍ବାଚନ କମିଶନଙ୍କୁ ଫେରାଦ ହୋଇଛି କଂଗ୍ରେସ । ଏପରିକି ସେମାନଙ୍କ ଭୋଟକୁ ଅବୈଧ ଘୋଷଣା କରିବା ପାଇଁ ତିନି ତିନିଥର ନିର୍ବାଚନ କମିଶନଙ୍କୁ ଭେଟି ଫେରାଦ ହୋଇଛି କଂଗ୍ରେସ । ବିଦ୍ରୋହୀ କଂଗ୍ରେସ ବିଧାୟକ ରାଘବଜୀ ପଟେଲ ଓ ଭୋଲା ଗୋହିଲଙ୍କ ଭୋଟକୁ ନାକଚ କରିବା ପାଇଁ ଦଳ ଦାବି କରିଛି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ଅଭିଯୋଗ ଅନୁସାରେ ଏହି ଦୁଇ ବିଧାୟକ କ୍ରସ ଭୋଟିଂ କରି ବିଜେପି ପ୍ରାର୍ଥୀଙ୍କୁ ଭୋଟ ଦେବା ପରେ ଅମିତ ଶାହା, ସ୍ମୃତି ଇରାନି ଓ ବଲୱନ୍ତ ସିଂ ରାଜପୁତଙ୍କୁ ସେମାନଙ୍କ ବାଲଟ ଦେଖାଇଥିଲେ । ଏହି ଭୋଟକୁ ନାକଚ କରିବା ପାଇଁ କଂଗ୍ରେସ୍ ତିନି ତିନି ଥର ନିର୍ବାଚନ କମିଶନଙ୍କୁ ଭେଟିଥିଲେ । କଂଗ୍ରେସର ଯୁକ୍ତି ହେଲା ୨୦୧୬ରେ ଯେଉଁଭଳି ହରିୟାଣାରେ ବାଲାଟ୍ ପେପରକୁ ରଦ୍ଦ କରାଯାଇଥିଲା ଠିକ୍ ସେହିଭଳି ଏହି ଭୋଟକୁ ମଧ୍ୟ ରଦ୍ଦ କରାଯାଉ । କିନ୍ତୁ ଏହାରି ଭିତରେ କଂଗ୍ରେସ୍ ପ୍ରାର୍ଥୀ ଅହମ୍ମଦ ପଟେଲ୍ କହିଛନ୍ତିି ମୁଁ ଜିତିବା ନେଇ ଦୃଢ ନିଶ୍ଚିତ ଅଛି । ଭୋଟ୍ ଦାନରେ ବ୍ୟତିକ୍ରମକୁ ନେଇ ରିଟର୍ଣ୍ଣିଂ ଅଫିସରଙ୍କୁ ଜଣା ଯାଇଥିଲେ ମଧ୍ୟ ସେ କିଛି କରିନଥିଲେ ।
ସେପଟେ କଂଗ୍ରେସର ଅଭିଯୋଗ ବିରୋଧରେ ନିର୍ବାଚନ କମିଶନଙ୍କୁ ଭେଟିଛି ବିଜେପି । ଅର୍ଥମନ୍ତ୍ରୀ ଅରୁଣ ଜେଟଲୀଙ୍କ ନେତୃତ୍ୱରେ ବିଜେପି ପ୍ରତିନିଧି ଦଳ ନିର୍ବାଚନ କମିଶନଙ୍କୁ ସାକ୍ଷାତ କରି ତଦନ୍ତ ଆଳରେ ଫଳାଫଳ ଘୋଷଣାରେ ବିଳମ୍ବ ନକରିବାକୁ ଦାବି ଜଣାଇଛି । ଏପରିକି ହାରିବା ଭୟରେ କଂଗ୍ରେସ ଅଯଥା ଅଭିଯୋଗ ଆଣୁଥିବା ଦଳ କହିଛି । କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ କହିଛନ୍ତି କଂଗ୍ରେସ୍ ଅଯଥା ଅଭିଯୋଗ ଆଣୁଛି । ଏ ବାବଦରେ ସେମାନେ ସକାଳେ କାହିଁକି ଅଭିଯୋଗ କରିନଥିଲେଏ । ବର୍ତ୍ତମାନ ହାରିବା ଭୟରେ ଏଭଳି ପଦକ୍ଷେପ ନେଇଥିବା ସେ ଅଭିଯେଗ କରିଛନ୍ତି । କଂଗ୍ରେସର ଅଭିଯୋଗକୁ ରଦ୍ଦ କରିବାକୁ ନିର୍ବାଚନ କମିଶନଙ୍କୁ ବିଜେପି ଅନୁରୋଧ କରିଛି ।
ଗୁଜରାଟ ରାଜ୍ୟସଭାର ୩ଟି ଆସନ ପାଇଁ ମୈଦାନରେ ୪ଜଣ ପ୍ରାର୍ଥୀ ଅଛନ୍ତି । ବିଜେପିରୁ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଓ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ପ୍ରାର୍ଥୀ ହୋଇଛନ୍ତି । ସେହିଭଳି କଂଗ୍ରେସ ଛାଡି ବିଜେପିରେ ସାମିଲ୍ ହୋଇଥିବା ବଲବନ୍ତ ସିଂ ରାଜପୁତ ପ୍ରତିଦ୍ୱନ୍ଦ୍ୱିତା କରୁଥିବାବେଳେ କଂଗ୍ରେସରୁ ଲଢୁଛନ୍ତି ପାର୍ଟି ସୁପ୍ରିମୋ ସୋନିଆ ଗାନ୍ଧିଙ୍କ ରାଜନୈତିକ ସଚିବ ଅହମ୍ମଦ ପଟେଲ୍ । ତେବେ ସଂଖ୍ୟା ଦୃଷ୍ଟିରୁ ଅମିତ ଶାହା ଓ ସ୍ମୃତି ଇରାନୀଙ୍କ ବିଜୟ ସୁନିଶ୍ଚିତ ଥିବାବେଳେ ମୁକାବିଲା ହେଉଛି ବଲବନ୍ତ ଓ ଅହମ୍ମଦଙ୍କ ମଧ୍ୟରେ ।
ତୃତୀୟ ଆସନରେ ଅହମ୍ମଦ ପଟେଲଙ୍କ ବିଜୟ କଂଗ୍ରେସ୍ ପାଇଁ ସମ୍ମାନର ପ୍ରଶ୍ନ ହୋଇଛି । ତୃତୀୟ ଆସନ ପାଇଁ ବିଜେପି ପାଖରେ ୩୧ଟି ଭୋଟ୍ ଥିବାବେଳେ କଂଗ୍ରେସ୍ ପାଖରେ ଥିବା ୪୪ ବିଧାୟକଙ୍କ ମଧ୍ୟରୁ ଦୁଇଜଣ ବିଜେପି ପ୍ରାର୍ଥୀଙ୍କ ପାଇଁ କ୍ରସ ଭୋଟିଂ କରିଥିବା ଦାବି କରିଛି ବିଜେପି । ତେଣୁ ସମସ୍ତ ଆସନରେ ବିଜେପି କବଜା କରିବାକୁ ଆଶା ରଖିଛି । ଏହାରି ଭିତରେ ନଜର ନିର୍ବାଚନ କମିଶନ କଣ ପଦକ୍ଷେପ ନେଉଛନ୍ତି ।
ଗୁଜରାଟ ରାଜ୍ୟସଭା ନିର୍ବାଚନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କଂଗ୍ରେସ ସଭାପତି ସୋନିଆ ଗାନ୍ଧିଙ୍କ ପାଇଁ ସମ୍ମାନର ପ୍ରଶ୍ନ ହୋଇଛି । ତେଣୁ ଏହାକୁ କ୍ଷମତାର ଦୁଇ କେନ୍ଦ୍ରସ୍ଥଳଙ୍କ ଛାୟାଯୁଦ୍ଧ ବୋଲି କୁହାଯାଉଛି । ଅହମ୍ମଦ ପଟେଲ ହେଉଛନ୍ତି ଦେଶର ସବୁଠାରୁ ପୁରୁଣା ରାଜନୈତିକଦଳ କଂଗ୍ରେସର ବଡ ମ୍ୟାନେଜର । ଇନ୍ଦିରା ଗାନ୍ଧି ଓ ରାଜୀବ ଗାନ୍ଧିଙ୍କ ପ୍ରଧାନମନ୍ତ୍ରୀତ୍ୱ ସମୟରେ ମନ୍ତ୍ରୀପଦ ଅଫରକୁ ପ୍ରତ୍ୟାଖ୍ୟାନ କରିଥିଲେ ଅହମ୍ମଦ ପଟେଲ । ଅହମ୍ମଦ ପଟେଲଙ୍କୁ ସୋନିଆଙ୍କ ଆଖି ଓ କାନ ମଧ୍ୟ କୁହାଯାଏ । ଅହମ୍ମଦ ପଟେଲ ଏବେ ଚର୍ଚ୍ଚାରେ ଏଥିପାଇଁ ଯେ, ତାଙ୍କର ରାଜ୍ୟସଭା ଆସନ ବିପଦରେ ଅଛି । ରାଜ୍ୟର ୩ ରାଜ୍ୟସଭା ଆସନ ଲାଗି ନିର୍ବାଚନ ହେଉଛି । ମୈଦାନରେ ଅଛନ୍ତି ବିଜେପି ଜାତୀୟ ସଭାପତି ମିତ ଶାହ ।
ସେପଟେ କଂଗ୍ରେସ ସଭାପତି ସୋନିଆ ଗାନ୍ଧି ଚାହୁଁଛନ୍ତି ଅହମ୍ମଦ ପଟେଲ ପୁଣି ରାଜ୍ୟସଭାକୁ ଆସନ୍ତୁ । ହେଲେ ଗୁଜରାଟ କଂଗ୍ରେସରେ ଯେଉଁଭଳି ଡ୍ରାମା ଚାଲିଛି ତାହା ଅହମ୍ମଦଙ୍କ ଆସନକୁ ବିପଦକୁ ନେଇ ଆସିଛି । ରାଜ୍ୟସଭା ନିର୍ବାଚନ ପୂର୍ବରୁ ୬ଜଣ କଂଗ୍ରେସ ବିଧାୟକ ଦଳ ଛାଡିଛନ୍ତି । ଆଉକିଛି ବିଧାୟକ ମଧ୍ୟ ଦଳ ବିରୋଧୀ ଆଭିମୁଖ୍ୟ ଆପଣେଇଥିବା ସନ୍ଦେହ ହେଉଛି । ତେଣୁ ଏହି ଲଢେଇ ଉଭୟ ମୋଦି ଓ ସୋନିଆଙ୍କ ପାଇଁ ସମ୍ମାନର ପ୍ରଶ୍ନ ହୋଇଛି ।