କନକ ବ୍ୟୁରୋ : ମେଡିକାଲ କଲେଜରେ ନାମ ଲେଖାଇବା ନାଁରେ ଠକେଇ କରି ଲକ୍ଷ ଲକ୍ଷ ଟଙ୍କା ଠକେଇ କରିଥିବା ଜଣେ ଶିକ୍ଷିତ ଠକକୁ ଗିରଫ କରିଛି ପୋଲିସ । କଟକର ଜଣେ ଡାକ୍ତରଙ୍କ ପୁଅକୁ ବାଙ୍ଗାଲୁରୁର ଏକ ବଡ ମେଡିକାଲ କଲେଜରେ ମ୍ୟାନେଜମେଂଟ କୋଟାରେ ନାଁ ଲେଖାଇ ଦେବ ବୋଲି କହି ଠକି ଚାଲିଥିଲା ପ୍ରଦୋଷ ଦାସ ନାମକ ବ୍ୟକ୍ତି । ବିଭିନ୍ନ ପର୍ଯ୍ୟାୟରେ ୨୭ ଲକ୍ଷ ଟଙ୍କା ନେଇଥିବା ବେଳେ ଅଭିଯୋଗ ପରେ ତା ହାତରେ ଲାଗିଛି ହାତକଡି ।
Kanak News is now on WhatsApp
Join and get latest news updates delivered to you via WhatsApp
କଟକ ମର୍କତ ନଗରରେ ରହୁଥିବା ଡାକ୍ତର ତ୍ରିଲୋଚନ ବାରିକଙ୍କ ପୁଅକୁ ମେଡିକାଲ କଲେଜରେ ଆଡମିସନ କରାଇ ଦେବ ବୋଲି ଟଙ୍କା ହଡପ କରୁଥିଲା ପ୍ରଦୋଷ ଦାସ । ଜଗତସିଂହପୁର ଅଂଚଳର ଏହି ଉଚ୍ଚ ଶିକ୍ଷତ ଯୁବକ ତ୍ରିଲୋଚନଙ୍କ ପାଖରୁ ୭ଟି କିସ୍ତିରେ ୨୭ ଲକ୍ଷ ଟଙ୍କା ନେଇଥିଲା । ସେଂଟ ଜୋନ୍ସ ନ୍ୟାସନାଲ ଆକାଡେମୀ ଅଫ୍ ହେଲ୍ଥ ସାଇନ୍ସରେ ପୁଅ ପାଠ ପଢିବ ବୋଲି ତ୍ରିଲୋଚନ ଭାବି ଥିଲେ । ଏହାର ସୁଯୋଗ ନେଇ ଠକେଇ ଆରମ୍ଭ କରିଥିଲା ପ୍ରଦୋଷ ।
ଅଭିଯୋଗ ପାଇବା ପରେ ଖୋର୍ଦ୍ଧା ପୋଲିସ ଆରମ୍ଭ କରିଥିଲା ତନାଘନା । ପ୍ରଦୋଷକୁ ଧରିବା ପାଇଁ ଜାଲ ବିଛାଇଥିଲା ପୋଲିସ । ଶେଷରେ ପ୍ରଦୋଷକୁ ଧରିବାକୁ ସକ୍ଷମ ହୋଇଥିଲା । ଗିରଫ ପ୍ରଦୋଷ ଦାସ ଏମବିଏ ପାଢ ପଢିଥିବା ବେଳେ ଇନଫୋସିସ୍, ଉଇପ୍ରୋ ପରି କମ୍ପାନୀରେ ଭଲ ଦରମାରେ ଚାକିରୀ କରୁଥିଲେ । କିନ୍ତୁ ସହଜରେ ଅଧିକ ଟଙ୍କା ରୋଜଗାର କରିବା ପାଇଁ ଠକେଇକୁ ନିଜ ଅସ୍ତ୍ର କରିଥିଲା ପ୍ରଦୋଷ ବୋଲି ପୋଲିସ କହିଛି । ସେ ଶିକ୍ଷିତ ବେକାର ଯୁବକ ମାନଙ୍କୁ ନାମୀଦାମୀ କଲେଜରେ ଆଡମିସନ୍ କରାଇଦେବା ଓ ବିଭିନ୍ନ କମ୍ପାନୀରେ ନିଯୁକ୍ତି କରାଇଦେବା କହି ଲକ୍ଷାଧିକ ଟଙ୍କା ଠକୁଥିଲା ।
ପୋଲିସ ପ୍ରଦୋଷ ନିକଟରୁ ଲକ୍ଷାଧିକ ଟଙ୍କାର ଜିନିଷ ପାଇଛି । ସେଥିରେ ରହିଛି ସ୍କୋଡା କାର, ସ୍କୁଟର, ଲାପଟପ, ପ୍ରିଂଟର, ସ୍ମାର୍ଟ ୱାଚ୍, ଟିଭି, ସ୍ମାର୍ଟକାର୍ଡ, ୯ଟି ସିମକାର୍ଡ, ବହୁ ଦାମୀ ମୋବାଇଲ । ଏପରିକି ତାଠୁ ବହୁ ମିଛ ଭିଜିଟିଂ କାର୍ଡ ମଧ୍ୟ ଜବତ କରିଛି ପୋଲିସ । ପ୍ରଦୋଷ ବିରୋଧରେ ଧିରେ ଧିରେ ଅଧିକ ଗୁମର ଫିଟୁଛି । ତାର ଗିରଫ ସହ ଖୋର୍ଦ୍ଧା ପୋଲିସକୁ ମିଳିଛି ଏକ ବଡ ଧରଣର ସଫଳତା ।