ରାଜ୍ୟ ରାଜନୀତିରେ ‘ସମଦୁରତ୍ୱ’ର ଫର୍ମୁଲାକୁ ଧରି ଆଗକୁ ବଢୁଥିବା ବିଜୁ ଜନତା ଦଳ ଜାତୀୟ ରାଜନୈତିକ ଦୃଶ୍ୟପଟ୍ଟରେ ଏକ ଶକ୍ତିଶାଳୀ ଭୂମିକାରେ ଅବତୀର୍ଣ୍ଣ ହେବାକୁ ଯାଉଛି । ବିଜେପି ଓ କଂଗ୍ରେସ ଠାରୁ ‘ସମଦୁରତ୍ୱ’ ରଖି ନବୀନ ପଟ୍ଟନାୟକ ଆଂଚଳିକ ସ୍ତରରେ ନିଜ ଦବଦବା ଜାହିର କରିବା ପରେ ଏବେ ଜାତୀୟ ରାଜନୀତିରେ ଗୋଟିଚାଳନା ଆରମ୍ଭ କରିଥିବା କୁହାଯାଉଛି । ଏଭଳି କିଛି ଖବର ଏବେ ଜାତୀୟ ଓ ଆଂଚଳିକ ଗଣମାଧ୍ୟମର ଚର୍ଚ୍ଚାର ବିଷୟ ପାଲଟିଛି । ଜାତୀୟ ଗଣମାଧ୍ୟମ ଏନଡିଟିଭିର ଏକ ରିପୋର୍ଟ ଅନୁସାରେ, ନବୀନ ନିବାସରେ ଏହାର ମୂଳଦୁଆ ପଡିଛି ।
Kanak News is now on WhatsApp
Join and get latest news updates delivered to you via WhatsApp
ଗତ ଜାନୁୟାରୀ ମାସରେ ବିଜୁ ପଟ୍ଟନାୟକଙ୍କ ଆତ୍ମଜୀବନି ଉପରେ ଆଧାରିତ ପୁସ୍ତକ ‘ଦି ଟଲ୍ ମ୍ୟାନ୍’ ଉନ୍ମୋଚନ ପାଇଁ ଭୁବନେଶ୍ୱରରେ ପହଂଚିଥିଲେ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ, ପୂର୍ବତନ ପ୍ରଧାନମନ୍ତ୍ରୀ ଏଚ. ଡି. ଦେବେଗୈାଡା, ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀ ଓ ସିପିଆଇ ନେତା ସୀତାରାମ ୟେଚୁରୀ । ନବୀନ ନିବାସରେ ଜାତୀୟ ରାଜନୀତିର ଏହି ଚର୍ଚ୍ଚିତ ଚେହେରାଙ୍କୁ ପଖାଳରେ ଆପ୍ୟାୟିତ କରିଥିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ପଖାଳରେ ଚର୍ଚ୍ଚା ସେହି ସମୟରେ ଯଦିଓ ବିଶେଷ ରାଜନୈତିକ ଝଡ ତିଆରି କରିନଥିଲା, କିନ୍ତୁ ନବୀନ ପଟ୍ଟନାୟକଙ୍କ ସେହି ଟ୍ୱିଟ୍ ବର୍ତ୍ତମାନ ସମୟରେ ଚର୍ଚ୍ଚାର ଖୋରାକ୍ ଯୋଗାଇଛି ।
ଏନଡିଟିଭିରେ ପ୍ରକାଶିତ ରିପୋର୍ଟରେ କୁହାଯାଇଛି, ଏକ ଶକ୍ତ ତୃତୀୟ ମେଂଟର ମୁଳଦୁଆ ଏହି ଆଲୋଚନା ମାଧ୍ୟମରେ ପଡିଥିଲା । ନିକଟରେ ସୋନିଆ ଗାନ୍ଧୀ, ବିଜେପି ବିରୋଧରେ ସମସ୍ତ ଶକ୍ତିକୁ ଏକତ୍ରିତ କରିବାକୁ ରାତ୍ରଭୋଜନ ଦେଇଥିଲେ । ଯେଉଁଥିରେ ବିଜେପି ତଥା ମୋଦି ବିରୋଧୀ ତମାମ ଶକ୍ତି ଏକାଠି ହୋଇଥିଲେ । ହେଲେ ନବୀନ ପଟ୍ଟନାୟକଙ୍କ ‘ପଖାଳ ପେ ଚର୍ଚ୍ଚା’ ବେଶ ଚର୍ଚ୍ଚିତ ହୋଇନଥିଲା । ସେହିଭଳି ପୂର୍ବରୁ ରାଷ୍ଟ୍ରପତି ଭବନରେ ପ୍ରଣବ ମୁଖାର୍ଜୀଙ୍କ ସହ ନବୀନ ପଟ୍ଟନାୟକଙ୍କ ମଧ୍ୟାହ୍ନ ଭୋଜନ ମଧ୍ୟ ତୃତୀୟ ମେଂଟ ଦିଗରେ ଅନ୍ୟ ଏକ ସୋପାନ ଥିଲା ବୋଲି କୁହାଯାଉଛି । ମୂଳଦୁଆ ନବୀନ ନିବାସରେ ପଡୁ ଅଥବା ରାଇସିନା ହିଲରେ, କିନ୍ତୁ ଏକଥା ସତ ଯେ ଜାତୀୟ ସ୍ତରରେ ନବୀନ ପଟ୍ଟନାୟକ ନିଜ ଛାପ ଛାଡିବାକୁ ଆରମ୍ଭ କରିଛନ୍ତି ଏକ ଜୋରଦାର ଉଦ୍ୟମ ।
It was great pleasure to have enlightened company of Shri @CitiznMukherjee, Shri HD Deve Gowda, Shri LK Advani & Shri @SitaramYechury at Naveen Niwas. Had wonderful interaction over our much loved #Pakhala & Odia delicacies #PiajaPeetha #SagaBadi #Drumstickfry & famed #Chhenapoda pic.twitter.com/GWcpVGwL9t
— Naveen Patnaik (@Naveen_Odisha) January 27, 2018
ଏନଡିଟିଭିର ରିପୋର୍ଟ ଅନୁସାରେ, ରାଷ୍ଟ୍ରପତି ଭବନରେ ପ୍ରଣବ ମୁଖାର୍ଜୀଙ୍କ ସହ ନବୀନ ପଟ୍ଟନାୟକ ମଧ୍ୟାହ୍ନ ଭୋଜନ କରିବା ପରେ ତୃତୀୟ ମେଂଟର ଆଉ ଏକ ପ୍ରମୁଖ ଅଂଶୀଦାର କୁହାଯାଉଥିବା ତୃଣମୁଳ କଂଗ୍ରେସ ନେତ୍ରୀ ମମତା ବାନାର୍ଜୀଙ୍କ ସହ ମଧ୍ୟ ଆଲୋଚନା ହୋଇଥିଲା । ବିଜେପି, ତୃଣମୁଳ କଂଗ୍ରେସ ଓ ବିଜେଡିର ବରିଷ୍ଠ ନେତାମାନେ ଏସଂପର୍କିତ ଆଲୋଚନା ହୋଇଥିବା ସ୍ୱୀକାର କରିଥିବା ନେଇ ରିପୋର୍ଟରେ ଉଲ୍ଲେଖ ରହିଛି । ଜଣେ ବିଜୁ ଜନତା ଦଳର ସାଂସଦଙ୍କ ପ୍ରତିକ୍ରିୟା ଉଲ୍ଲେଖ କରି ଏନଡିଟିଭି କହିଛି, ବର୍ତ୍ତମାନ ସମୟରେ ପ୍ରଣବ ମୁଖାର୍ଜୀ ହିଁ ବର୍ତ୍ତମାନ ସମୟରେ ଜଣେ ନେତା, ଯିଏ ନରେନ୍ଦ୍ର ମୋଦିଙ୍କ ଭାବମୁର୍ତ୍ତିକୁ ଟକ୍କର ଦେଇପାରିବେ । ଅଣ-ଏନଡିଏ ରାଜନୀତିରେ ସେ ପ୍ରମୁଖ ଭୂମିକା ନେବେ ବୋଲି ଜଣେ ବିଜେଡି ସାଂସଦ କହିଥିବା ରିପୋର୍ଟରେ ଉଲ୍ଲେଖ ରହିଛି ।
ପ୍ରଣବ ମୁଖାର୍ଜୀ, ପୂର୍ବତନ ରାଷ୍ଟ୍ରପତି, କଂଗ୍ରେସର ବରିଷ୍ଠ ନେତା । ମେଂଟ ରାଜନୀତିରେ ସହଯୋଗୀ ଦଳଙ୍କୁ ସାଥୀରେ ରଖିବାର କଳା ମାଲୁମ ଥିବା ଏହି ରାଜନେତାଙ୍କୁ ଟ୍ରବୁଲ ସୁଟର୍ ଭାବେ ଅଭିହିତ କରାଯାଏ । କୁହାଯାଉଛି, ୮୨ ବର୍ଷୀୟ ଏହି ରାଜନେତା ଅଣ କଂଗ୍ରେସ ଓ ଅଣ ବିଜେପି ରାଜନୈତିକ ଦଳଙ୍କୁ ଏକାଠି କରି ଏକ ଶକ୍ତିଶାଳୀ ବିକଳ୍ପ ତିଆରି କରିବାକୁ ଉଦ୍ୟମ କରୁଛନ୍ତି । ୨୦୧୯ ପାଇଁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ପ୍ରଣବ ମୁଖାର୍ଜୀଙ୍କ ନାଁ ସାମ୍ନାକୁ ଆସିଲେ କିଛି ଆଶ୍ଚର୍ଯ୍ୟ ହେବାର ନାହିଁ, କାରଣ ଏନେଇ ଏକ ସୁଚିନ୍ତିତ ଗୋଟିଚାଳନା ଚାଲିଛି । ନୂଆଦିଲ୍ଲୀ ସ୍ଥିତ ବାସଭବନରେ ଅନେକ ନେତା ପ୍ରଣବ ମୁଖାର୍ଜୀଙ୍କୁ ଭେଟି ଆଲୋଚନା କରିଥିବା ରିପୋର୍ଟ ପ୍ରକାଶ ପାଇଛି ।
୨୦୧୨ରେ ଯେତେବେଳେ ପ୍ରଣବ ମୁଖାର୍ଜୀଙ୍କ ନାଁ ରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରାଗଲା, ସେତେବେଳେ ମମତା ବାନାର୍ଜୀଙ୍କ ଟିଏମସି ଓ ଶିବସେନା ସମର୍ଥନ ଘୋଷଣା କରିଥିଲେ । ସେହିଭଳି ବିମୁଦ୍ରାୟନ ବିରୋଧରେ ରାଷ୍ଟ୍ରପତି ଭବନକୁ ଯାଇଥିବା ରାଲିରେ ମମତା ବାନାର୍ଜୀ ଓ ଶିବସେନା ନେତା ମଧ୍ୟ ସାମିଲ ହୋଇଥିଲେ । ଉଭୟ ମମତା ବାନାର୍ଜୀ ଓ ପ୍ରଣବ ମୁଖାର୍ଜୀଙ୍କ ମଧ୍ୟରେ ରହିଛି ଉତ୍ତମ ସଂପର୍କ । ଜଣେ ବିଜେପି ନେତାଙ୍କ ମତକୁ ଉଲ୍ଲେଖ କରି ଏନଡିଟିଭି କହିଛି, ସେମାନେ ଏକ ମେଂଟ ତିଆରି କରିବାକୁ ଚାହୁଁଛନ୍ତି ଯାହା ଆଗାମୀ ୫ ବର୍ଷ ଭିତରେ ଭାରତର ଭାଗ୍ୟ ନିର୍ଦ୍ଧାରଣ କରିବ । ସେମାନଙ୍କ ଭିତରୁ କେହି ଜଣେ ପ୍ରଧାନମନ୍ତ୍ରୀ ହେବେ ଏହି ଲକ୍ଷ୍ୟରେ ଗୋଟିଚାଳନା ହେଉଥିବା କୁହାଯାଉଛି ।
ରାଜନୈତିକ ସ୍ତରରେ ଏହି ଖବରକୁ ନେଇ ଯଥେଷ୍ଟ ଚର୍ଚ୍ଚା ଚାଲିଥିବା ବେଳେ ଏନେଇ ଆମେ ବିଜୁ ଜନତା ଦଳର ରାଜ୍ୟସଭା ସାଂସଦ ତଥା ମୁଖପାତ୍ର ପ୍ରତାପ କେଶରୀ ଦେବଙ୍କ ପ୍ରତିକ୍ରିୟା ନେଇଥିଲୁ । ତାଙ୍କ କହିବା ଅନୁସାରେ, ଜାତୀୟ ଗଣମାଧ୍ୟମ ଏନଡିଟିଭିର ୱେବସାଇଟରେ ପ୍ରକାଶିତ ହୋଇଥିବା ଖବର, କେବଳ ରାଜନୈତିକ କଳ୍ପନା ଜଳ୍ପନା ମାତ୍ର ।