ଛତିଶଗଡର ମନମାନି ! ମହାନଦୀକୁ ନେଇ ଛତିଶଗଡକୁ ଟାର୍ଗେଟ କଲେ ଦିଲ୍ଲୀପ ରାୟ ।
ମହାନଦୀକୁ ନେଇ ରାଜ୍ୟ ରାଜନୀତିରେ ମାହୋଲ ଉଷ୍ମ ଥିବା ବେଳେ ବିଜେପି ବିଧାୟକ ଦିଲ୍ଲୀପ ରାୟଙ୍କ ଫେସବୁକ ପୋଷ୍ଟ ଆଉ ଟିକେ ରାଜନୀତିକୁ ଗରମ କରିଦେଇଛି । କାରଣ ଦିଲ୍ଲୀପଙ୍କ ଏହି ପୋଷ୍ଟରୁ ଜଣା ପଡୁଛି ଯେ ଉଭୟ ରାଜ୍ୟ ଓ କେନ୍ଦ୍ର ସରକାର କଳିକୁ ନାପସନ୍ଦ କରୁଛନ୍ତି ଦିଲ୍ଲୀପ । ଏବଂ ନିଜ ଅଫିସିଆଲ ଫେସବୁକ ପୋଷ୍ଟରେ ଛତିଶଗଡର ମନମାନିକୁ ପୁରା ବଖାଣିଛନ୍ତି ବିଧାୟକ ଦିଲ୍ଲୀପ ରାୟ । ଯାହାକୁ ନେଇ ଏବେ ରାଜ୍ୟ ରାଜନୀତିରେ ମାହୋଲ ସରଗରମ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବିଜେପି ବିଧାୟକ ଦିଲ୍ଲୀପ ରାୟ ଫେସବୁକ ପୋଷ୍ଟରେ ଉଲ୍ଲେଖ କରିଛନ୍ତି ଯେ, ଆମ ରାଜ୍ୟର ୬୦ ପ୍ରତିଶତରୁ ଅଧିକ ଲୋକ ମହାନଦୀ ଜଳ ଉପରେ ନିର୍ଭର କରୁଛନ୍ତି । ଏବଂ ନିଜର ଦୈନନ୍ଦିନ ଆବଶ୍ୟକକୁ ପୂରଣ କରିବା ଯଥା – ପାନୀୟ ଜଳ ଏବଂ କ୍ଷେତରେ ସିଚାଇ କ୍ଷେତ୍ରରେ ବ୍ୟବହୃତ ହେଉଥିବା ଯୋଗୁଁ ମହାନଦୀ ଓଡିଶା ପାଇଁ ଜୀବନ ରେଖା ପାଲଟିଛି କହିଲେ ଅତ୍ୟୁକ୍ତି ହେବ ନାହିଁ । ତେବେ ଦିଲ୍ଲୀପ କହିଛନ୍ତି ୨୦୧୮ ଏପ୍ରିଲ ୧୬ ତାରିଖ ଦିନ ବିଧାନସଭାରେ ଛତିଶଗଡ ମହାନଦୀ ଉପର ମୁଣ୍ଡରେ କରିଥିବା ପ୍ରକଳ୍ପର ହିସାବ ମାଗିବାରୁ ଓଡିଶାର ଜଳସମ୍ପଦ ମନ୍ତ୍ରୀ ନିରଞ୍ଜନ ପୂଜାରୀଙ୍କ ରିପୋର୍ଟ ଦେଇଥିଲେ । ଯାହାକି ଛତିଶଗଡ ୧ ହଜାରରୁ ଅଧିକ ଛୋଟବଡ ବ୍ୟାରେଜ, ୮ଟି ମେଗା ଜଳ ପ୍ରକଳ୍ପ, ୨୯ ଟି ମଧ୍ୟମ ଜଳ ପ୍ରକଳ୍ପ ସହିତ ୩୭୧ଟି ଆନିକଟ ନିର୍ମାଣ କରିଥିବା ରିପୋର୍ଟରୁ ଜଣାପଡିଛି ବୋଲି ଦିଲ୍ଲୀପ କହିଛନ୍ତି ।
ପଡୋଶୀ ରାଜ୍ୟ ଛତିଶଗଡ ମହାନଦୀ ଉପର ମୁଣ୍ଡରେ ବେଆଇନ ବ୍ୟାରେଜ ନିର୍ମାଣ କରି ମନମାନି କରୁଛି । ଯାହାଦ୍ୱାରା ଓଡିଶାର ଚାଷୀକୂଳ ପ୍ରଭାବିତ ହେବା ସହ ହୀରାକୁଦ ଜଳ ପ୍ରପାତ ମଧ୍ୟ ଅନେକ ମାତ୍ରାରେ ପ୍ରଭାବିତ ହେବ କାରଣ ହୀରାକୁଦ ମଧ୍ୟ ମହାନଦୀ ଜଳ ଉପରେ ନିର୍ଭରଶୀଳ । ମାନ୍ୟବର ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଟ୍ରିବ୍ୟୁନାଲ ଗଠନ ହୋଇଛି । କିନ୍ତୁ ଦୁଃର୍ଭାଗ୍ୟପୂର୍ଣ୍ଣ କଥା ହେଲା ଯେ, ଏହି ଜଳ ସଙ୍କଟ ବିବାଦକୁ ବର୍ତ୍ତମାନ ମୂଖ୍ୟ ରାଜନୀତି ପ୍ରସଙ୍ଗ କରିଦିଆଯାଇଛି । ରାଜ୍ୟର ଅଧିକାଂଶ ଲୋକମାନଙ୍କ ସ୍ୱାର୍ଥ ଦୃଷ୍ଟିରୁ ବିଭିନ୍ନ ରାଜନୈତିକ ଦଳ ଏହି ବିବାଦ ପ୍ରସଙ୍ଗରେ ନତମସ୍ତକ ହେବାସହ ଏକଜୁଟ ଭାବେ ସମସ୍ୟାର ସମାଧାନ କରିବା ଆବଶ୍ୟକ । ଯାହାଦ୍ୱାରା ମହାନଦୀ ଉପରେ ରାଜ୍ୟର ନିର୍ଭର କରୁଥିବା ଦୁୁଇ ତୃତୀୟାଂଶ ଲୋକଙ୍କ ପାଇଁ ସହାୟକ ହେବ ବୋଲି ନିଜ ଫେସବୁକ ପୋଷ୍ଟରେ ଉଲ୍ଲେଖ କରିଛନ୍ତି ଦିଲ୍ଲୀପ ।