ଦିଗବିଜୟଙ୍କ ଠାରୁ ଘର ଛଡାଇ ନେଇଥିଲା ବିଜେପି ! କ୍ଷମତାକୁ ଆସିଲା କଂଗ୍ରେସ, ଫେରିପାଇଲେ ବାସଭବନ ।
ମଧ୍ୟପ୍ରଦେଶରେ କଂଗ୍ରେସ ସରକାର ଗଢିବା ପରେ ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂହଙ୍କୁ ପୁଣି ସରକାରୀ ବଙ୍ଗଳା ପ୍ରଦାନ କରାଯାଇଛି । ଶ୍ୟାମଲ ହିଲ୍ସ ସ୍ଥିତ ବଙ୍ଗଳାକୁ କୋର୍ଟଙ୍କ ନିର୍ଦ୍ଦେଶ ପରେ ଖାଲି କରିଦେଇଥିଲେ ଦିଗବିଜୟ । ରାଜ୍ୟସଭା ସାଂସଦ ଭାବେ ତାଙ୍କୁ ପୁଣି ଥରେ ଏହି ସରକାରୀ ବଙ୍ଗଳା ହସ୍ତାନ୍ତର କରାଯାଇଛି । ସୂଚନା ଅନୁଯାୟୀ, ପୂର୍ବରୁ ହାଇକୋର୍ଟ, ସମସ୍ତ ପୂର୍ବତନ ମୁଖ୍ୟମନ୍ତ୍ରୀ ମାନଙ୍କୁ ସରକାରୀ ବଙ୍ଗଳା ଖାଲି କରିବା ପାଇଁ ନିର୍ଦ୍ଦେଶ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ହାଇକୋର୍ଟଙ୍କ ଏହି ନିଷ୍ପତ୍ତି ଉପରେ ସରକାର ତୁରନ୍ତ ନିର୍ଦ୍ଦେଶ ଜାରି କରିଥିଲେ ଏବଂ ପୂର୍ବତନ ମୁଖ୍ୟମନ୍ତ୍ରୀ ମାନଙ୍କୁ ସରକାରୀ ବଙ୍ଗଳା ଆବଣ୍ଟନ ଉପରେ ରୋକ ଲଗାଇଥିଲେ । ଏହାର କିଛି ଦିନ ପରେ ପୁଣି ଥରେ ଏକ ନୂଆ ନିୟମ ଜାରି କରାଯାଇଥିଲା । ଏହି ନିୟମ ଅନୁଯାୟୀ, ପୂର୍ବତନ ମୁଖ୍ୟମନ୍ତ୍ରୀମାନଙ୍କୁ ସେମାନଙ୍କର ବଙ୍ଗଳା ପୁଣି ଥରେ ଫେରାଇ ଦିଆଯାଇଥିଲା ।
କିନ୍ତୁ ଯେତେବେଳେ କଂଗ୍ରେସର ପୂର୍ବତନ ମୁଖ୍ୟମନ୍ତ୍ରୀମାନଙ୍କୁ ବଙ୍ଗଳା ଦେବାର ସମୟ ଆସିଲା, ସେତେବେଳେ ନିୟମ କାନୁନକୁ ଫୁ କରିଦେଲେ ସରକାର । ବଙ୍ଗଳା ଫେରାଇବା ସମୟରେ ମଧ୍ୟପ୍ରଦେଶରେ ଶିବରାଜ ସରକାର ବିଜେପିର ପୂର୍ବତନ ମୁଖ୍ୟମନ୍ତ୍ରୀଙ୍କ ଧ୍ୟାନ ରଖିଲେ ସତ କିନ୍ତୁ କଂଗ୍ରେସ ସରକାରରେ ମୁଖ୍ୟମନ୍ତ୍ରୀ ଥିବା ଦିଗବିଜୟ ସିଂହଙ୍କ ସହ ପକ୍ଷପାତ କଲେ ଶିବରାଜ । ସେତେବେଳେ ଶିବରାଜ ସରକାର ଯେଉଁ ପୂର୍ବତନ ମୁଖ୍ୟମନ୍ତ୍ରୀମାନଙ୍କୁ ସରକାରୀ ବଙ୍ଗଳା ଆବଣ୍ଟନ କରିଥିଲେ, ସେଥିରେ ଥିଲେ ବିଜେପିର ଉମା ଭାରତୀ, ବାବୁଲାଲ ଗୌର ଏବଂ କୈଳାଶ ଜୋଶୀଙ୍କ ନାମ ସାମିଲ ଥିଲା । କିନ୍ତୁ ୧୦ ବର୍ଷ ଧରି ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଥିବା କଂଗ୍ରେସର ଦିଗବିଜୟ ସିଂହଙ୍କ ନାମ ସାମିଲ ନଥିଲା । ଏନେଇ ପୂର୍ବରୁ କଂଗ୍ରେସ ଶିବରାଜ ସରକାରଙ୍କ ଉପରେ ଭେଦଭାବର ଆରୋପ ଲଗାଇଥିଲେ ।