ବେ ଓଭାଲରେ ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଦିନିକିଆରେ ସହଜ ବିଜୟ ହାସଲ କରିଛି ଟିମ୍ ଇଣ୍ଡିଆ । ନ୍ୟୁଜିଲାଣ୍ଡକୁ ୯୦ ରନରେ ମାତ୍ ଦେଇ ସାଧରଣତନ୍ତ୍ର ଦିବସରେ ଦେଶବାସୀଙ୍କୁ ଏକ ବଡ ଉପହାର ଦେଇଛି ବିରାଟ ବାହିନୀ । ପ୍ରଥମେ ବ୍ୟାଟିଂ କରି ଭାରତ ୪ ୱିକେଟ ବିନିମୟରେ ୩୨୪ ରନ କରିଥିବା ବେଳେ କିୱି ଟିମ୍ ମାତ୍ର ୨୩୪ ରନରେ ଅଲଆଉଟ ହୋଇଥିଲା । ଏହି ମ୍ୟାଚରେ ରୋହିତ ଶର୍ମା ସର୍ବାଧିକ ୮୭ ରନ କରିଥିବା ବେଳେ ଶିଖର ଧୱନ ୬୬ , ଉଭୟ କୋହଲି ଓ ରାୟଡୁ ୪୩ ରନ ଲେଖାଏଁ କରି ପ୍ୟାଭିଲିୟନ ଫେରିଥିଲେ । ତେବେ ଶେଷ ପର୍ଯ୍ୟନ୍ତ ଧୋନି ଓ କେଦାର ଯାଦବ କ୍ରିଜରେ ରହି ଯଥାକ୍ରମେ ୪୮ ଓ ୨୨ ରନ କରିଥିଲେ । ତେବେ ଧୋନି ଏହି ୪୮ ରନ କରିବା ସହ ଦିନିକିଆ କ୍ୟାରିୟରରେ ଏକ ନୂଆ ରେକର୍ଡ ନିଜ ନାଁରେ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ଧୋନି ଅପରାଜିତ ୪୮ ରନର ଇନିଂସ ଖେଳିବା ସହ ଦିନିକିଆ କ୍ରିକେଟରେ ସର୍ବାଧିକ ରନ ସ୍କୋର କରିବା ତାଲିକାରେ ୱେଷ୍ଟଇଣ୍ଡିଜରେ ବ୍ରାଏନ ଲାରାଙ୍କୁ ପଛରେ ପକାଇ ୧୧ ତମ ସ୍ଥାନରେ ପହଞ୍ଚିଛନ୍ତି । ଧୋନି ମୋଟ ୩୩୭ ମ୍ୟାଚରୁ ୧୦୪୧୪ ରନ କରିବା ସହ ଲାରାଙ୍କ (୧୦୪୦୫) ରନକୁ ପଛରେ ପକାଇଛନ୍ତି । ତେବେ ବିରାଟ କୋହଲି ପୂର୍ବତନ ଅଧିନାୟକ ଧୋନିଙ୍କ ଠାରୁ ଏହି ରେସରେ ଆଗରେ ରହିଛନ୍ତି । କୋହଲି ଏବେ ଦିନିକିଆ କ୍ରିକେଟରେ ୧୦୪୭୩ ରନ କରିଛନ୍ତି ।
ଦିନିକିଆ କ୍ରିକେଟରେ ସର୍ବାଧିକ ରନ ସ୍କୋର କରିବାର ରେକର୍ଡ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ନାଁରେ ରହିଛି । ସଚିନ ନିଜ କ୍ୟାରିୟରରେ ୧୮୪୨୬ ରନ କରିଥିବା ବେଳେ କୁମାର ସାଙ୍ଗାକାର ୧୪୨୩୪ ରନ ଦ୍ୱିତୀୟ ସ୍ଥାନରେ ରହିଛନ୍ତି । ସବୁଠାରୁ ବଡ କଥା ହେଉଛି, ଦିନିକିଆରେ ସର୍ବାଧିକ ରନ କରିଥିବା ଟପ୍-୧୧ ଖେଳାଳିଙ୍କ ମଧ୍ୟରୁ ଭାରତର ୫ ଜଣ ବ୍ୟାଟସମ୍ୟାନ୍ ରହିଛନ୍ତି । ସଚିନଙ୍କ ସମେତ ଦ୍ରାବିଡ, ଗାଙ୍ଗୁଲି, ବିରାଟ ଓ ଧୋନି ଏହି ତାଲିକାରେ ରହିଛନ୍ତି । ଏହାବାଦ୍ ଶ୍ରୀଲଙ୍କାର ୩ ଜଣ, ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା ଓ ପାକିସ୍ତାନର ଜଣେ ଜଣେ ଖେଳାଳି ଏହି ତାଲିକାରେ ରହିଛନ୍ତି ।