କନକ ବ୍ୟୁରୋ : ଗୁରୁଦିବସରେ ଶିକ୍ଷକ କାର୍ଡ ଖେଳିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସୋସିଆଲ ମିଡିଆରେ ରାଜ୍ୟ ସରକାରଙ୍କ ‘ଟିଚର ଅନ କଲ’ ଯୋଜନାକୁ ପୁଣି ସମାଲୋଚନା କରିଛନ୍ତି କେନ୍ଦ୍ରମନ୍ତ୍ରୀ । ନିଜ ଫେସବୁକ ପେଜରେ ଧର୍ମେନ୍ଦ୍ର ଲେଖିଛନ୍ତି, ରାଜ୍ୟ ସରକାର ଶୈକ୍ଷିକ ଭିତିଭୂମିର ବିକାଶ ଓ ଖାଲି ପଡିଥିବା ଶିକ୍ଷକ ପଦବୀ ପୂରଣ କରନ୍ତୁ । ଶିକ୍ଷକମାନଙ୍କୁ ଠିକାରେ କାମ କରାଇ ଉବେର ଏବଂ ଓଲା ଭଡା ଗାଡି ଭଳି ଅଳ୍ପ ପାରିଶ୍ରମିକ ଦେଇ ବିଦା କରାନଯାଉ ବୋଲି କଡା ଭାଷାରେ ଟିପ୍ପଣି କରିଛନ୍ତି ପେଟ୍ରୋଲିୟମ ମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ନିଜ ଅଫିସିଆଲ ଫେସବୁକ ପେଜରେ ରାଜ୍ୟ ଗଣଶିକ୍ଷା ବ୍ୟବସ୍ଥାର ଏକ ଲମ୍ବା ଚଉଡା ବିବରଣୀ ଦେଇଛନ୍ତି ଧର୍ମେନ୍ଦ୍ର। ରାଜ୍ୟରେ ହାଇସ୍କୁଲଗୁଡିକରେ ୧୩ ହଜାର ୯ଶହ ୭୭ ଶିକ୍ଷକ ପଦବୀ ଖାଲି ପଡିଛି । ୩୮ଟି ଗ୍ରାମ ପଂଚାୟତରେ ଆଜି ବି ହାଇସ୍କୁଲ ନାହିଁ । ୩ଶହ ୭୬ ସ୍କୁଲର ନିଜସ୍ୱ ଘର ନାହିଁ । ରାଜ୍ୟରେ ମୋଟ ୫୩ ହଜାର ୨୫୨ ସ୍କୁଲରୁ ୪୨ହଜାର ୭୦ଟିର ନିଜସ୍ୱ ଖେଳ ପଡିଆ ନାହିଁ ।
ସେହିପରି ରାଜ୍ୟରେ ୪୧ ହଜାର ୬୭୦ ଏପରି ସ୍କୁଲ ରହିଛି ଯେଉଁଠି ପ୍ରତି ଶ୍ରେଣୀ ପାଇଁ ଗୋଟିଏ ବଖରା ଶ୍ରେଣୀଗୃହ ଉପଲବ୍ଧ ନାହିଁ । ମୋଟ ୧ ଲକ୍ଷ ୭ ହଜାର ୭୫୨ ଶିକ୍ଷକ ଶିକ୍ଷୟିତ୍ରୀ ପୂର୍ଣ୍ଣ ଦରମା ବିନା ଏକପ୍ରକାର ଠିକାରେ କାମ କରୁଛନ୍ତି । ତେଣୁ ପ୍ରଥମେ ଠିକାରେ କାମ କରୁଥିବା ଶିକ୍ଷକ ବନ୍ଧୁମାନଙ୍କୁ ନିୟମିତ କରାଯାଉ ବୋଲି ଧର୍ମେନ୍ଦ୍ର ପ୍ରସ୍ତାବ ରଖିଛନ୍ତି।