ମଧ୍ୟ ପ୍ରଦେଶର ରାଜ୍ୟସଭାକୁ ନିର୍ବାଚିତ ହେବା ପରେ ଓଡିଶା ଆସୁଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ! ସ୍ୱାଗତ ପାଇଁ ବିଜେପିର ବ୍ୟାପକ ପ୍ରସ୍ତୁତି
କନକ ବ୍ୟୁରୋ: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦ୍ୱିତୀୟ ଇନିଂସ । ମଧ୍ୟପ୍ରଦେଶରୁ ରାଜ୍ୟସଭାକୁ ନିର୍ବାଚିତ ହେବା ପରେ ଆଜି ଓଡିଶା ଆସୁଛନ୍ତି ଧର୍ମେନ୍ଦ୍ର ପ୍ରଧାନ । ଆଉ ଏଥିପାଇଁ ରାଜ୍ୟ ବିଜେପି ପକ୍ଷରୁ ବ୍ୟାପକ ଆୟୋଜନ କରାଯାଇଛି । ଭୁବମେଶ୍ୱର ବିମାନବନ୍ଦରରୁ ଏକ ବିରାଟ ପଟୁଆରରେ ଧର୍ମେନ୍ଦ୍ରଙ୍କୁ ରାଜ୍ୟ ବିଜେପି କାର୍ଯ୍ୟାଳୟ ଆଣିବା ପାଇଁ ପ୍ରସ୍ତୁତି କରାଯାଇଛି । ହଜାର ହଜାର କର୍ମୀଙ୍କୁ ନେଇ ବିଶାଳ ପଟୁଆରରେ ଧର୍ମେନ୍ଦ୍ରଙ୍କୁ ସ୍ୱାଗତ କରିବା ପାଇଁ ଯୋଜନା କରାଯାଇଛି । ଏନେଇ ରାଜ୍ୟ ବିଜେପି ପକ୍ଷରୁ ସୂଚନା ଦିଆଯାଇଛି । ସେପଟେ ବିଜେପୁରରେ ବିଜେପିର ଶୋଚନୀୟ ପରାଜୟ ପରେ ଧର୍ମେନ୍ଦ୍ରଙ୍କ ଗସ୍ତ ମଧ୍ୟ ଅନେକ ଗୁରୁତ୍ୱ ରଖୁଛି । ବିଜେପୁର ବିପର୍ଯ୍ୟୟ ନେଇ ଦଳର ନେତାମାନେ ବିଶେଷ କିଛି ପ୍ରତିକ୍ରିୟା ରଖିନାହାନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଏ ବାବଦରେ କିଛି ଟିପ୍ପଣୀ କରିନାହାନ୍ତି । ମଧ୍ୟପ୍ରଦେଶରୁ ରାଜ୍ୟସଭାକୁ ଦ୍ୱିତୀୟଥର ପାଇଁ ଯାଇଥିବା ଧର୍ମେନ୍ଦ୍ର ପ୍ରଧାନ ୨୦୧୯ ସାଧାରଣ ନିର୍ବଚନ ଲାଗି କିଛି ସ୍ୱତନ୍ତ୍ର ରଣନୀତି ସହ ଓଡିଶା ଫେରିଥିବା ଅନୁମାନ କରାଯାଉଛି । ଏହି ଗସ୍ତକୁ ଦଳ ସଂଗଠନରେ ନୂଆ ଉତ୍ସାହ ଭରିବା ଦିଗରେ ଉପଯୋଗ କରିବାକୁ ଚାହୁଁଛି ।
Kanak News is now on WhatsApp
Join and get latest news updates delivered to you via WhatsApp
ଉଲ୍ଲେଖ ଥାଉ କି, ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥିପତ୍ର ପ୍ରତ୍ୟାହାରର ଗତକାଲି ଥିଲା ଶେଷ ଦିବସ। ନାମାଙ୍କନ ପ୍ରତ୍ୟାହାର ପରେ ଅନେକ ପ୍ରାର୍ଥୀଙ୍କୁ ନିର୍ଦ୍ୱନ୍ଦ୍ୱରେ ନିର୍ବାଚିତ ଘୋଷଣା କରାଯାଇ ଥିଲା । ସେମାନଙ୍କ ମଧ୍ୟରୁ ଧର୍ମେନ୍ଦ୍ର ପ୍ରଧାନଙ୍କ ସମେତ ମଧ୍ୟ ପ୍ରଦେଶରୁ ୫ ଜଣ ନିର୍ବାଚିତ ହୋଇଥିବା ବେଳେ ରବିଶଙ୍କର ପ୍ରସାଦଙ୍କ ସମେତ ୬ ଜଣ ବିହାରରୁ ନିର୍ବାଚିତ ହୋଇଛନ୍ତି । କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ରଙ୍କୁ ବିଜେପି ମଧ୍ୟ ପ୍ରଦେଶରୁ ପ୍ରାର୍ଥୀ କରିଥିଲା । ତାଙ୍କୁ ମିଶାଇ ବିଜେପିର ୪ ଜଣ ପ୍ରାର୍ଥୀ ଏଠାରୁ ନିର୍ବାଚିତ ହୋଇଛନ୍ତି ।
ସେହିଭଳି ଗୁଜରାଟରେ ୪ ଜଣ ପ୍ରାର୍ଥୀ ନିର୍ବାଚିତ ହୋଇଛନ୍ତି। ଶେଷ ମୁହୂର୍ତରେ ବିଜେପି ଏହାର ତୃତୀୟ ପ୍ରାର୍ଥୀଙ୍କୁ ପ୍ରତ୍ୟାହାର କରିବା ପରେ ଏହା ସମ୍ଭବ ହୋଇଛି । ରାଜ୍ୟରୁ ବିଜେପି ଏବଂ କଂଗ୍ରେସର ଦୁଇଟି ଲେଖାଏଁ ପ୍ରାର୍ଥୀ ନିର୍ବାଚିତ ହୋଇଛନ୍ତି । ରାଜସ୍ଥାନରୁ ସମସ୍ତ ତିନିଟି ଆସନରେ ବିଜେପି ପ୍ରାର୍ଥୀ ବିଜୟୀ ହୋଇଥିବା ବେଳେ ଓଡ଼ିଶାରୁ ସମସ୍ତ ୩ଟି ଆସନରେ ବିଜେଡି ପ୍ରାର୍ଥୀଙ୍କୁ ବିଜୟୀ ଘୋଷଣା କରାଯାଇଛି । ଆନ୍ଧ୍ର ପ୍ରଦେଶରେ ଟିଡିପିର ୨ ଏବଂ ଓ୍ଵାଇଏସଆର କଂଗ୍ରେସର ଜଣେ ପ୍ରାର୍ଥୀ ବିଜୟୀ ହୋଇଛନ୍ତି ।
ତେବେ ଉତ୍ତର ପ୍ରଦେଶ, ମହାରାଷ୍ଟ୍ର ଓ ପଶ୍ଚିମ ବଙ୍ଗରେ ନିର୍ବାଚନ ନିଶ୍ଚିତ । ୟୁପିର ୧୦ଟି ଆସନ ମଧ୍ୟରୁ ବିଜେପି ୮ଟି ଜିତିବା ନିଶ୍ଚିତ ଥିବା ବେଳେ ଏହା ୯ ଜଣଙ୍କୁ ପ୍ରାର୍ଥୀ କରିଛି । ଏଠାରେ ସମାଜବାଦୀ ଏବଂ ବହୁଜନ ସମାଜ ପାର୍ଟି ଜଣେ ଲେଖାଏଁ ପ୍ରାର୍ଥୀ ଅଛନ୍ତି । କେନ୍ଦ୍ର ମନ୍ତ୍ରୀ ଅରୁଣ ଜେଟଲୀ ୟୁପିରୁ ରାଜ୍ୟସଭା ପ୍ରାର୍ଥୀ ଅଛନ୍ତି । ସେହିଭଳି ପଶ୍ଚିମ ବଙ୍ଗରେ ୫ଟି ଆସନରେ ୬ ଜଣ ପ୍ରାର୍ଥୀ ଅଛନ୍ତି । ତୃଣମୂଳ କଂଗ୍ରେସର ୪ ଏବଂ କଂଗ୍ରେସର ଜଣେ ପ୍ରାର୍ଥୀ ବିଜୟୀ ହେବା ନିଶ୍ଚିତ ଥିବା ବେଳେ ସିପିଏମ୍ ଜଣେ ପ୍ରାର୍ଥୀ ଦେଇଛି । ନିର୍ବାଚନ ୨୩ ତାରିଖରେ ଅନୁଷ୍ଠିତ ହେବ। ସୂଚନାଯୋଗ୍ୟ, ୧୬ଟି ରାଜ୍ୟରୁ ୫୮ଟି ରାଜ୍ୟସଭା ଆସନ ପାଇଁ ନିର୍ବାଚନ ବିଜ୍ଞପ୍ତି ପ୍ରକାଶ ପାଇଥିଲା ।