କନକ ବ୍ୟୁରୋ : ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କୁ ତାଙ୍କ ବାସଭବନରେ ସାକ୍ଷାତ କଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଆସନ୍ତାକାଲି ମନ୍ତ୍ରିମଣ୍ଡଳ ଅଦଳବଦଳ ପୂର୍ବରୁ ଶାହାଙ୍କ ବାସଭବନରେ ବସିଛି ଗୁରୁତ୍ୱପୂର୍ଣ୍ଣ ବୈଠକ । କୁହାଯାଉଛି ନୂଆ ମନ୍ତ୍ରିମଣ୍ଡଳରେ କେଉଁମାନଙ୍କୁ ସ୍ଥାନ ଦିଆଯିବ ସେନେଇ ତାଲିକା ଚୂଡାନ୍ତ କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ । ସମ୍ଭାବ୍ୟ ମନ୍ତ୍ରୀମାନେ ଶାହାଙ୍କୁ ଭେଟୁଥିବା ଚର୍ଚ୍ଚା ଭିତରେ ଧର୍ମେନ୍ଦ୍ର ପ୍ରଧାନଙ୍କ ସାକ୍ଷାତକୁ ନେଇ ଭିନ୍ନ ଆକଳନ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ମୋଦି ମନ୍ତ୍ରିମଣ୍ଡଳରେ ରାଷ୍ଟ୍ରମନ୍ତ୍ରୀ ଭାବେ ଗୁରୁତ୍ୱପୂର୍ଣ୍ଣ ପେଟ୍ରୋଲିୟମ ବିଭାଗର ସ୍ୱାଧୀନ ଦାୟିତ୍ୱରେ ଥିବା ଧର୍ମେନ୍ଦ୍ରଙ୍କ ପଦୋନ୍ନତି ହୋଇପାରେ ବୋଲି ଚର୍ଚ୍ଚା ଜୋର ଧରିଛି । ଉଭୟ ପ୍ରଧାନମନ୍ତ୍ରୀ ମୋଦି ଓ ଦଳର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ଗୁଡବୁକରେ ଥିବା ଧର୍ମେନ୍ଦ୍ରଙ୍କୁ କ୍ୟାବିନେଟ ପାହ୍ୟା ମିଳିବାର ଯଥେଷ୍ଟ ସମ୍ଭାବନା ରହିଛି । ତେବେ ଦେଖିବାର କଥା ଆସନ୍ତାକାଲି ଦିନ ୧୦ଟାରେ ମନ୍ତ୍ରିମଣ୍ଡଳ ଅଦଳବଦଳରେ ଧର୍ମେନ୍ଦ୍ରଙ୍କୁ ମିଳୁଛି କେଉଁ ବିଭାଗ ।
ଚର୍ଚ୍ଚା ହେଉଛି ମୋଦିଙ୍କ ନୂଆ ଟିମରେ ସାମିଲ ହେବାକୁ ଯାଉଛନ୍ତି ପ୍ରାୟ ଗୋଟିଏ ଡଜନ୍ ନୂଆ ଚେହେରା ।୨୦୧୯ ନିର୍ବାଚନକୁ ଦୃଷ୍ଟିରେ ରଖି ମନ୍ତ୍ରୀମଣ୍ଡଳର ସ୍ୱରପ ନିର୍ଦ୍ଧାରଣ କରିଛନ୍ତି ମୋଦି-ଶାହା ଯୋଡ଼ି । ଆଉ ଏହି ତାଲିକାରେ ରାଜସ୍ତାନର ଯୁବ ନେତା ସିପି ଯୋଶୀ, କର୍ଣ୍ଣାଟକର ଲିଙ୍ଗାୟତ ସଂପ୍ରଦାୟର ନେତା ସୁରେଶ ଅଙ୍ଗାଡି, ଦିଲ୍ଲୀର ପ୍ରବେଶ ବର୍ମାଙ୍କ ଭଳି ଚେହେରା, ମନ୍ତ୍ରୀମଣ୍ଡଳରେ ସ୍ଥାନ ପାଇବା ନେଇ ଚର୍ଚ୍ଚା ହେଉଛି ।
ଏସବୁ ଭିତରେ ଏନଡିଏ ସହଯୋଗୀ ଦଳକୁ କେମିତି ସନ୍ତୁଷ୍ଟ କରିବେ ମୋଦି, ତାକୁ ନେଇ ଦେଖା ଦେଇଛି ବଡ ପ୍ରଶ୍ନବାଚୀ । କ’ଣ ରହିବ ସହଯୋଗୀ ଦଳର ଭୂମିକା । କୁହାଯାଉଛି-ବିଜେପିର ଅଫରରେ ଖୁସ୍ ନାହାଁନ୍ତି ଜେଡିୟୁ ମୁଖ୍ୟ ନୀତିଶ କୁମାର । ଏମିତିକି ଅମିତ ଶାହା ଏହି ପ୍ରସଙ୍ଗରେ କୌଣସି ଆଲୋଚନା କରିନଥିବା ଖୋଲାଖୋଲି ଦଳୀୟ ନେତା କହିବୁଲୁଛନ୍ତି । ଅନ୍ୟପଟେ ଏଆଇଡିଏମକେ ଦଳୀୟ କନ୍ଦଳ ଭିତରେ ଛନ୍ଦି ହୋଇଥିବାରୁ ଏଯାଏଁ ନିଷ୍ପତି ନେଇପାରିନି, ମୋଦିଙ୍କ ହାତଧରିବ କି ନାହିଁ । ଶିବସେନା କିନ୍ତୁ ମନ୍ତ୍ରୀମଣ୍ଡଳ ଅଦଳବଦଳ ନେଇ କୌଣସି ଦାବି ରଖିନି ।
ଚର୍ଚ୍ଚାରେ ଗୁଡବୁକରେ ଥିବା ୩ ମନ୍ତ୍ରୀ ! ପ୍ରୋଫାଇଲରେ ପ୍ରମୋସନ ନେଇ ଚର୍ଚ୍ଚା :
ମୋଦି ମନ୍ତ୍ରୀମଣ୍ଡଳର ଗୁଟ୍ବୁକ ତାଲିକାରେ ଅଛନ୍ତି ୩ଜଣମନ୍ତ୍ରୀ । ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ମାନବ ସମ୍ବଳ ବିକାଶମନ୍ତ୍ରୀ ପ୍ରକାଶ ଜାଭଡେକର ଏବଂ ଶକ୍ତିମନ୍ତ୍ରୀ ପିୟୁଷ ଗୋୟଲ । ପ୍ରଦର୍ଶନ ଭିତିରେ ଧର୍ମେନ୍ଦ୍ରଙ୍କୁ କ୍ୟାବିନେଟ୍ ପାହ୍ୟା ମିଳିବା ନେଇ ଚର୍ଚ୍ଚା ହେଉଥିବା ବେଳେ ପିୟୁଷ ଗୋୟଲ ଏବଂ ପ୍ରକାଶ ଜାଭଡେକରଙ୍କୁ ମଧ୍ୟ ମିଳିପାରେ ପ୍ରମୋସନ ।
କ’ଣ ହେବ ମନ୍ତ୍ରୀମଣ୍ଡଳର ସ୍ୱରୁପ ! ଛୋଟ କ୍ୟାବିନେଟ ବାଛିବେ କି ମୋଦି :
ମିନିମମ୍ ଗଭମେଂଟ୍, ମେକ୍ସିମମ୍ ଗଭର୍ଣ୍ଣାସର ନାରା ଦେଉଥିବା ମୋଦି, ଏଥର କ’ଣ କରିବେ? ବର୍ତମାନ ମନ୍ତ୍ରୀମଣ୍ଡଳର ସଂଖ୍ୟା ୭୩ ଥିବା ବେଳେ ଏହାକୁ ସର୍ବାଧିକ ୮୧ ଯାଏଁ ବଢ଼ାଯାଇପାରିବ । ପୂର୍ବରୁ ଦୁଇ ଦୁଇ ଥର ମନ୍ତ୍ରୀମଣ୍ଡଳ ଅଦଳବଦଳ ବେଳେ ଏହି ସଂଖ୍ୟାକୁ ସୀମିତ ରଖିଥିଲେ ମୋଦି ସରକାର । ତେଣୁ ସମସ୍ତଙ୍କ ନଜର ଏଥର କଣ କରିବେ ।
୨୦୧୪ରେ ମୋଦି କ୍ଷମତାକୁ ଆସିବା ପରେ ଏହା ହେଉଛି ତୃତୀୟ ମନ୍ତ୍ରୀମଣ୍ଡଳ ଅଦଳବଦଳ । ଆଉ ୨୦୧୯ ନିର୍ବାଚନ ପୂର୍ବରୁ ହୁଏତ ମନ୍ତ୍ରୀମଣ୍ଡଳ ଅଦଳବଦଳର ଏହା ଶେଷ ପ୍ରୟାସ । ତେଣୁ ଏବେ ସମସ୍ତଙ୍କ ନଜର କାହାକୁ କେଉଁ ବିଭାଗର ଦାୟିତ୍ୱ ମିଳୁଛି । ଆଉ ମାତ୍ର ଗୋଟିଏ ଦିନ ପରେ ସ୍ପଷ୍ଟ ହୋଇଯିବ ଚିତ୍ର ।